ຂ່າວສານຊີອາໄອລາຍງານໃນ 6 ກຸມພາ ນີ້, ອົງການຮ່ວມມືເສດຖະກິດ ແລະ ການພັດທະນາ ຫຼື OECD ໄດ້ເຜີຍແຜ່ບົດລາຍງານວິໄສທັດເສດຖະກິດ ໃນວັນທີ 5 ກຸມພາ ຜ່ານມາ ໂດຍຄາດຄະເນວ່າ: ປີ 2024 ເສດຖະກິດໂລກຈະເຕີບໂຕ 2,9%, ສ່ວນປີ 2025 ຈະເຕີບໂຕ 3%. ໃນປີ 2024 ແລະ ປີ 2025, ເຂດອາຊີຈະສືບຕໍ່ປະກອບສ່ວນກວມເອົາສ່ວນໃຫຍ່ຂອງການເຕີບໂຕເສດຖະກິດໂລກຄືກັນກັບປີ 2023.

ບົດລາຍງານໄດ້ເນັ້ນໜັກວ່າ: ສະພາບການເຄັ່ງຕຶງຂອງພູມສາດການເມືອງຍັງຄົງເປັນແຫຼ່ງທີ່ມາອັນຕົ້ນຕໍຂອງປັດໄຈທີ່ບໍ່ແນ່ນອນ, ບວກກັບການປະທະກັນຢູ່ເຂດຕາເວັນອອກກາງ, ການຂົນສົ່ງທາງເຮືອຢູ່ທະເລແດງປະເຊີນກັບບັນຫາ ເຮັດໃຫ້ຕົ້ນທຶນການຂົນສົ່ງເພີ່ມຂຶ້ນ, ທັງໄດ້ແກ່ຍາວເວລາການມອບສົ່ງສິນຄ້າຂອງບໍລິສັດຜູ້ສະໜອງນໍາອີກ. ຖ້າຫາກວ່າການປະທະກັນຮ້າຍແຮງຂຶ້ນຕື່ມ, ປັດໄຈເຫຼົ່ານີ້ອາດຈະນຳເອົາຄວາມກົດດັນມາໃຫ້ແກ່ລາຄາສິນຄ້າອີກເທື່ອໜຶ່ງ.

ບົດລາຍງານຢໍ້າວ່າ: ການຟື້ນຟູການຄ້າໂລກນັ້ນ, ແມ່ນມີຄວາມໝາຍສໍາຄັນຍິ່ງຕໍ່ການເພີ່ມທະວີການເຕີບໂຕກໍຄືອະນາຄົດການພັດທະນາເສດຖະກິດຢູ່ບ່ອນຕ່າງໆຂອງໂລກ.