ຂ່າວຕ່າງປະເທດລາຍງານ ເມື່ອບໍ່ດົນມານີ້, ປະເທດສະມາຊິກສະຫະພາບເອີຣົບ (EU) ໄດ້ອະນຸມັດກົດລະບຽບສຳຄັນກ່ຽວກັບການຄວບຄຸມປັນຍາປະດິດ (AI) ພາຍຫຼັງການເຈລະຈາຂັ້ນສຸດທ້າຍທີ່ເປັນໄປຢ່າງຍາກລຳບາກໃນບັນຫາກົດໝາຍຄວບຄຸມ AI ຊຸດທຳອິດຂອງໂລກ.

ຝ່າຍບໍລິຫານ EU ໃນນະຄອນຫຼວງບຣຸກແຊນ ປະເທດແບນຊິກ ໄດ້ສະເໜີກົດໝາຍ AI ຄັ້ງທຳອິດເມື່ອປີ 2021 ແຕ່ໃຊ້ເວລາຮີບເລັ່ງດຳເນີນການເພື່ອໃຫ້ໄດ້ຮັບການອະນຸມັດໃນປີທີ່ຜ່ານມາ ຫຼັງຈາກແຊັດບອດ (ChatGPT) ປະກົດຂຶ້ນໃນໄລຍະທ້າຍປີ 2022. ປະເທດສະມາຊິກ EU ແລະ ຝ່າຍນິຕິບັນຍັດຂອງ EU ເຫັນດີກັບຮ່າງກົດລະບຽບຄວບຄຸມ AI ໃນເດືອນທັນວາຜ່ານມາ ເຖິງແມ່ນວ່າບາງປະເທດເຊັ່ນ: ຝຣັ່ງ ແລະ ເຢຍລະມັນ ສະແດງຄວາມກັງວົນວ່າ ກົດໝາຍ AI ຈະບໍ່ປະສົບຜົນສຳເລັດໃນໄລຍະສຸດທ້າຍ ແລະ ນຳໄປສູ່ການເຈລະຈາຮອບໃໝ່ ແຕ່ທ້າຍທີ່ສຸດເອກອັກຄະລັດຖະທູດຂອງ EU ໄດ້ລົງນາມໃນກົດລະບຽບຄວບຄຸມ AI ຢ່າງເປັນເອກະພາບກັນ. ທ່ານ ຕິແຢຣິ ເບຣຕອງ ກຳມາທິການດ້ານການຕະຫຼາດພາຍໃນຂອງ EU ກ່າວວ່າ: ໃນວັນນີ້ປະເທດສະມາຊິກໄດ້ຮັບຮອງຂໍ້ຕົກລົງທາງການເມືອງທີ່ບັນລຸໃນເດືອນທັນວາ ຜ່ານມາ ໂດຍເນັ້ນໜັກເຖິງຄວາມສົມດູນທີ່ສົມບູນແບບ ຊຶ່ງບັນດາຜູ້ເຈລະຈາພົບເຫັນລະຫວ່າງນະວັດຕະກຳ ແລະ ຄວາມປອດໄພ. ທັງນີ້, ກົດໝາຍຂອງ EU ຈະຄວບຄຸມລະບົບ AI ຕາມການປະເມີນຄວາມສ່ຽງຂອງໂມເດວຊັອບແວທີ່ກ່ຽວຂ້ອງໂດຍລະບຸວ່າ: AI ມີຄວາມສ່ຽງຕໍ່ດ້ານຕ່າງໆຂອງແຕ່ລະບຸກຄົນເຊັ່ນ ສິດທິ ຫຼື ສຸຂະພາບຢູ່ໃນລະດັບສູງເທົ່າໃດພາລະຜູກພັນຂອງລະບົບກໍຍິ່ງຈະຫຼາຍຂຶ້ນເຊັ່ນກັນ.

ລັດຖະສະພາເອີຣົບ (EP) ມີກຳນົດລົງມະຕິຮັບຮອງກົດໝາຍຄວບຄຸມ AI ໃນເດືອນມີນາ ຫຼື ເດືອນເມສານີ້ ຊຶ່ງຝ່າຍນິຕິບັນຍັດຂອງ EU ກ່າວວ່າ: ຮ່າງກົດລະບຽບດັ່ງກ່າວຈະຜ່ານໄດ້ໂດຍບໍ່ມີບັນຫາ ແລະ ໜ້າຈະໄດ້ຮັບການອະນຸມັດຢ່າງເປັນທາງການໃນເດືອນພຶດສະພາໜ້ານີ້. ເຖິງຢ່າງໃດກໍຕາມ, ກົດໝາຍຂ້າງເທິງຈະບໍ່ມີຜົນບັງຄັບໃຊ້ທັນທີ ໂດຍກົດບາງຂໍ້ຈະມີຜົນບັງຄັບໃຊ້ພາຍໃນ 6 ເດືອນ ຂະນະທີ່ກົດລະບຽບອື່ນໆຈະມີຜົນບັງຄັບໃຊ້ໃນອີກ 2 ປີຫຼັງຈາກນັ້ນ.