ກອງປະຊຸມເສີມສ້າງຊາຍແດນສັນຕິພາບມິດຕະພາບລາວ-ກຳປູເຈຍຄັ້ງທີ3ຈັດຂຶ້ນຢ່າງເປັນທາງການຝ່າຍລາວນຳໂດຍທ່ານຄຳໄຫຼສີປະເສີດກຳມະການສູນກາງພັກຮອງປະທານຜູ້ປະຈຳການສູນກາງແນວລາວສ້າງຊາດຝ່າຍກຳປູເຈຍນຳໂດຍທ່ານແຍມວາລີກຳມະການສູນກາງພັກປະຊາຊົນກຳປູເຈຍຮອງປະທານສະພາແນວໂຮມສາມັກຄີພັດທະນາມາຕຸພູມຣາຊະອານາຈັກກຳປູເຈຍ, ເຂົ້າຮ່ວມມີທ່ານສາຍທອງໄຊຍະວົງຮອງເລຂາພັກແຂວງປະທານສະພາປະຊາຊົນແຂວງຈຳປາສັກ, ມີຜູ້ຕາງໜ້າຈາກຄະນະພົວພັນຕ່າງປະເທດສູນກາງພັກ, ຄະນະກຳມະການຊາຍແດນແຫ່ງຊາດກະຊວງການຕ່າງປະເທດ, ທະຫານຊາຍແດນກະຊວງປ້ອງກັນປະເທດ,  ພ້ອມດ້ວຍຄະນະຜູ້ແທນສອງຝ່າຍລາວ-ກຳປູເຈຍເຂົ້າຮ່ວມທີ່ເມືອງໂຂງແຂວງຈຳປາສັກ, ໃນວັນທີ3ຕຸລາ ນີ້.
ໃນກອງປະຊຸມຄັ້ງນີ້,ທັງສອງຝ່າຍໄດ້ທົບທວນການຜັນຂະຫຍາຍຈັດຕັ້ງປະຕິບັດຂໍ້ຕົກລົງຮ່ວມມືລະຫວ່າງຄະນະກຳມະການສູນກາງແນວລາວສ້າງຊາດແລະສະພາແນວໂຮມສາມັກຄີພັດທະນາມາຕຸພູມຣາຊະອານາຈັກກຳປູເຈຍໄລຍະ2019-2023ແລະບົດລົງນາມການຮ່ວມມືທີ່ໄດ້ລົງນາມປີ2020ທີ່ແຂວງຊຽງແຕງຣາຊະອານາຈັກກຳປູເຈຍ, ຕີລາຄາຜົນການຈັດຕັ້ງປະຕິບັດຖະແຫຼງການຮ່ວມກອງປະຊຸມເສີມສ້າງຊາຍແດນສັນຕິພາບມິດຕະພາບຄັ້ງທີ2ປີ2019ຜ່ານມາ; ພ້ອມກັນນີ້, ທ່ານຮອງປະທານຜູ້ປະຈໍາການສູນກາງແນວລາວສ້າງຊາດໄດ້ມີຄຳເຫັນຕໍ່ກອງປະຊຸມທີ່ມີຄວາມໝາຍສຳຄັນນີ້ວ່າ: ຕະຫຼອດໄລຍະຜ່ານມາສອງປະເທດກໍຄືປະຊາຊົນສອງຊາດລາວ-ກໍາປູເຈຍໄດ້ປະກອບສ່ວນເອົາໃຈໃສ່ສຶກສາອົບຮົມປຸກລະດົມເຕົ້າໂຮມຄວາມສາມັກຄີ,ປົກປັກຮັກສາເສັ້ນຊາຍແດນເປັນຊາຍແດນສັນຕິພາບ-ມິດຕະພາບ, ຮັກສາໄດ້ຄວາມສະຫງົບ, ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ, ປະຊາຊົນຢູ່ລຽບຕາມຊາຍແດນສາມາດໄປມາຫາສູ່, ມີຄວາມຮັກແພງທີ່ສະໜິດແໜ້ນ, ແລກປ່ຽນວັດທະນະທຳ, ສິລະປະວັນນະຄະດີ, ດ້ານເສດຖະກິດແລະການຄ້າຂາຍໄດ້ມີການຮ່ວມມືກັນເປັນຢ່າງດີ; ກອງປະຊູມຄັ້ງນີ້ໄດ້ຜ່ານບົດສະຫຼຸບຕີລາຄາຜົນການຈັດຕັ້ງປະຕິບັດຖະແຫຼງການຮ່ວມໄລຍະ5ປີຜ່ານມາ2019-2023ຊຶ່ງໄດ້ຍົກໃຫ້ເຫັນດ້ານຕັ້ງໜ້າທີ່ພົ້ນເດັ່ນເປັນຕົ້ນແມ່ນສາມາດຮັກສາເສັ້ນຊາຍແດນລາວ-ກຳປູເຈຍເປັນຊາຍແດນສັນຕິພາບ, ມິດຕະພາບເວົ້າລວມ, ເວົ້າສະເພາະແມ່ນປະຊາຊົນຢູ່ລຽບຕາມຊາຍແດນລາວ-ກຳປູເຈຍສາມາດຮັກສາໄດ້ຄວາມສາມັກຄີ, ຄວາມເປັນລະບຽບຮຽບຮ້ອຍໄປມາຫາສູ່, ແລກປ່ຽນຄ້າຂາຍ, ແລກປ່ຽນວັດທະນະທຳຊຶ່ງໄດ້ບັນລຸໝາກຜົນຫຼາຍດ້ານເປັນໜ້າເພິ່ງພໍໃຈນີ້ແມ່ນສະແດງເຖິງຜົນສຳເລັດຂອງສອງປະເທດກໍຄືສອງອົງການແນວໂຮມ, ບັນດາແຂວງຂອງລາວແລະແຂວງຂອງກຳປູເຈຍທີ່ມີຊາຍແດນຕິດຈອດກັນໄດ້ປະກອບຄຳເຫັນຕໍ່ກອງປະຊຸມເພື່ອເປັນການຢັ້ງຢືນເຖິງຄວາມສາມັກຄີມິດຕະພາບ, ຄວາມຮັດແໜ້ນສາຍພົວພັນຂອງບັນແຂວງທີ່ມີຊາຍແດນຕິດຈອດກັນຄື: ແຂວງຈຳປາສັກ-ແຂວງຊຽງແຕງ, ແຂວງອັດຕະປື-ແຂວງລັດຕະນະຄີຣີແລະແຂວງເພຣຍວິເຮຍ;
ກອງປະຊຸມເສີມສ້າງຊາຍແດນສັນຕິພາບມິດຕະະພາບຄັ້ງທີ3ນີ້ທັງສອງຝ່າຍໄດ້ພ້ອມກັນລົງນາມບົດຖະແຫຼງການຮ່ວມແລະສືບຕໍ່ການຈັດຕັ້ງປະຕິບັດ7ບັນຫາທີ່ສຳຄັນຄື: (1) ສືບຕໍ່ຜັນຂະຫຍາຍການໂຄສະນາ, ສຶກສາອົບຮົມຢ່າງມີປະສິດທິຜົນສາຍພົວພັນລະຫວ່າງລາວ-ກຳປູເຈຍແຕ່ປີ2023-2027; (2) ເສີມຂະຫຍາຍສາຍພົວພັນຮ່ວມມືທາງດ້ານການເມືອງ, ແລກປ່ຽນຄະນະຜູ້ແທນຂັ້ນສູງ, ຮ່ວມມືດ້ານເສດຖະກິດ, ດ້ານການທ່ອງທ່ຽວແລະອື່ນໆ; (3) ສອງອົງການແນວໂຮມສືບຕໍ່ຢຶດໝັ້ນປະຫວັດມູນເຊື້ອຄວາມສາມັກຄີທີ່ເຄີຍມີມາແຕ່ດົນນານ; (4) ເພີ່ມທະວີເປີດກວ້າງການພົວພັນລະຫວ່າງແນວໂຮມ, ບັນດາອົງການພາຄີຂອງສອງປະເທດ (5) ສົ່ງເສີມໃຫ້ປະຊາຊົນສອງປະເທດມີການແລກປ່ຽນຄ້າຂາຍສິນຄ້າທີ່ຖືກຕ້ອງຕາມລະບຽບກົດໝາຍຢູ່ລຽບຕາມບໍລິເວນຊາຍແດນໃຫ້ຫຼາຍຂຶ້ນ; (6) ຊຸກຍູ້, ສົ່ງເສີມ, ຮັດແໜ້ນຄວາມສາມັກຄີຊ່ວຍເຫຼືອຊອ່ງກັນແລະກັນໃນຂົງເຂດພຸດທະສາສະໜາ, ວັດທະນະທຳອັນດີງາມຂອງທ້ອງຖິ່ນ; (7) ກົນໄກການເສີມສ້າງຊາຍແດນສັນຕິພາບມິດຕະພາບແມ່ນຊຸກຍູ້ໃຫ້ອົງການປົກຄອງຂັ້ນບ້ານ, ເມືອງ, ແນວໂຮມເມືອງ, ແຂວງທີ່ມີຊາຍແດນຕິດຈອດກັນຕ້ອງມີການແລກປ່ຽນຄະນະຜູ້ແທນແລະໃຫ້ສືບຕໍ່ໃກ້ຊິດໄປມາຫາສູ່ກັນແບບຍາດພີ່ນ້ອງຕະຫຼອດໄປ.
(ຂ່າວ-ພາບ: ເລົ່າລໍ່; ບກ: ກົງແກ້ວທຳມະໂຄດ)