ເວລາ 20 ໂມງ ວັນທີ 9 ກຸມພານີ້ ຕາມເວລາປັກກິ່ງ, ງານລາຕີສະຫຼອງບຸນກຸດຈີນທີ່ຈັດໂດຍວິທະຍຸໂທລະພາບສູນກາງຈີນ ຫຼື CMG ໄດ້ພົບກັບຜູ້ຊົມທົ່ວໂລກຕາມກຳນົດເວລາ. ຕະຫຼອດໄລຍະ 40 ກວ່າປີ ຜ່ານມານີ້, “ງານລາຕີສະຫຼອງບຸນກຸດຈີນ” ໄດ້ບັນຈຸຄວາມຜູກພັນດ້ານຈິດໃຈອັນພິເສດຂອງຊາວຈີນທົ່ວໂລກ ຈົນໄດ້ກາຍເປັນ “ງານວັດທະນະທຳສົ່ງທ້າຍປີເກົ່າຕ້ອນຮັບປີໃໝ່” ທີ່ຂາດບໍ່ໄດ້ສຳລັບການສະຫຼອງປີໃໝ່ຂອງຄົນຈີນ.
ນັບແຕ່ປີ 1983 ເປັນຕົ້ນມາ, ໂທລະພາບສູນກາງຈີນ ຊຶ່ງເປັນໂທລະພາບແຫ່ງຊາດຈີນເມື່ອຮອດຄືນສົ່ງທ້າຍປີເກົ່າຕ້ອນຮັບປີໃໝ່ທຸກໆປີກໍຕ້ອງຈັດງານລາຕີສະໂມສອນສິລະປະວັດທະນະທຳສັງລວມຄັ້ງໜຶ່ງ ທີ່ປະຊາຊົນຈີນເອີ້ນກັນວ່າ “ງານລາຕີສະຫຼອງບຸນກຸດຈີນ” ຊຶ່ງເປັນຕົວແທນໃຫ້ກັບລາຍການບັນເທິງທາງໂທລະພາບຈີນທີ່ມີລະດັບສູງສຸດ.
ເວທີ “ງານລາຕີສະຫຼອງບຸນກຸດຈີນ 2024” ໄດ້ປະຕິບັດຕາມຫຼັກການ “ງານລາຕີສະຫຼອງບຸນກຸດຈີນຂອງປະຊາຊົນ”, ເຮັດໃຫ້ຄົນທຳມະດາສາມັນທຸກສາຂາອາຊີບກາຍເປັນ “ຕົວສະແດງເອກ” ຂອງງານ, ລາຍການຕ່າງໆແມ່ນເຕັມໄປດ້ວຍບັນຍາກາດຍຸກໃໝ່ທີ່ມີຊີວິດຊີວາ ແລະ ຄຶກຄື້ນມ່ວນຊື່ນ ຊຶ່ງໄດ້ສະແດງໃຫ້ເຫັນເຖິງຄົນຈີນພະຍາຍາມສູ້ຊົນຢ່າງບໍ່ລົດລະເພື່ອສະແຫວງຫາຊີວິດທີ່ດີງາມ.
ຊົມງານລາຕີສະຫຼອງບຸນກຸດຈີນຄັ້ງໜຶ່ງກໍປຽບເໝືອນການເດີນທາງຄັ້ງໜຶ່ງແຫ່ງການສຳຜັດມົນສະເໜ່ອະລິຍະທຳຈີນປະຫວັດ 5.000 ປີ.
ງານລາຕີສະຫຼອງບຸນກຸດຈີນປີນີ້ຍັງໄດ້ນຳໃຊ້ເຕັກນິກ VP ແບບຖ່າຍທຳຮູບເງົາຢ່າງມີຫົວຄິດປະດິດສ້າງ, ສ້າງໃຫ້ມີລະບົບເຕັກນິກ XP+VP ທີ່ສ້າງພາບຈຳລອງຄວາມຊັດເຈນສູງ ໂດຍນຳໃຊ້ວິທີການຖ່າຍທຳແບບໃໝ່ເພື່ອສ້າງເວທີແບບປະສົມປະສານພາບຈຳລອງກັບພາບຕົວຈິງທີ່ສວຍສົດງົດງານແລະມີຊີວິດຊີວາ.
ງານລາຕີສະຫຼອງບຸນກຸດຈີນປີນີ້ເປັນງານຍິ່ງໃຫຍ່ທີ່ປະຊາຊົນຈີນທົ່ວທັງຊາດສັງສັນມ່ວນຊື່ນຢ່າງຄຶກຄື້ນຄັ້ງໜຶ່ງ ແລະ ຍັງເປັນງານສັງສັນມ່ວນຊື່ນສຳລັບຊາວໂລກນຳອີກ. ໜ້າຈໍໂທລະພາບ 3.000 ກວ່າແຜ່ນໃນ 90 ຕົວເມືອງຂອງ 49 ປະເທດໃນທົ່ວໂລກໄດ້ຖ່າຍທອດສົດແລະລາຍງານງານລາຕີສະຫຼອງບຸນກຸດຈີນຂອງCMG ຊຶ່ງເຮັດໃຫ້ຜູ້ຊົມຈຳນວນອັນມະຫາສານໃນທົ່ວໂລກຮ່ວມກັນແບ່ງປັນຄວາມມ່ວນຊື່ນຄຶກຄື້ນ ແລະ ສິລິມຸງຄຸນແຫ່ງການສະຫຼອງບຸນກຸດຈີນໂດຍຮ່ວມກັນສຳຜັດກັບມົນສະເໜ່ທີ່ມີເອກະລັກພິເສດຂອງບຸນກຸດຈີນ ແລະ ວັດທະນະທຳຈີນທ່າມກາງບັນຍາກາດສຽງເພງແລະການຟ້ອນຢ່າງມ່ວນຊື່ນຄຶກຄື້ນເພື່ອພ້ອມກັນຕ້ອນຮັບປີໃໝ່ທີ່ໜ້າຄອງຄອຍນີ້.
ຂ່າວ: ຊີອາໄອ
