ຂ່າວສານຫວຽດນາມລາຍງານວ່າ: ທ້າຍອາທິດຜ່ານມາ,ດາວທຽມອຸຕຸນິຍົມໜ່ວຍຫຼ້າສຸດຂອງອົງການອາວະກາດອາເມຣິກາ (NASA) ໄດ້ຍິງຂຶ້ນສູ່ວົງໂຄຈອນຢ່າງສຳເລັດຜົນ, ເພື່ອແນໃສ່ຕິດຕາມມະຫາສະໝຸດ ແລະ ບັນຍາກາດຂອງໂລກຢ່າງລະອຽດທີ່ສຸດ.ໂດຍສະເພາະ, ບໍລິສັດ SpaceX ໄດ້ປະສົບຜົນສໍາເລັດໃນການສົ່ງດາວທຽມ PACE ມູນຄ່າ 964 ລ້ານໂດລາຂຶ້ນສູ່ວົງໂຄຈອນໂລກ.
ຂ່າວລະບຸວ່າ: ດາວທຽມດວງນີ້ຈະໃຊ້ເວລາຢ່າງໜ້ອຍ 3 ປີ ເພື່ອສຶກສາຊັ້ນບັນຍາກາດ ແລະ ມະຫາສະໝຸດຈາກໄລຍະຫ່າງ 676 ກິໂລແມັດ, ໂດຍນຳໃຊ້ເຄື່ອງມືວິທະຍາສາດ 2 ເຄື່ອງເພື່ອສະແກນໜ່ວຍໂລກໃນແຕ່ລະມື້ ແລະ ອີກໜຶ່ງເຄື່ອງມືວິທະຍາສາດເພື່ອກວດວັດແທກໃນແຕ່ລະເດືອນ. PACE ຄາດວ່າຈະຊ່ວຍນັກວິທະຍາສາດປັບປຸງຄວາມສາມາດໃນການພະຍາກອນພາຍຸ, ປະກົດການສະພາບອາກາດທີ່ຮ້າຍແຮງ, ລາຍລະອຽດການປ່ຽນແປງຂອງໂລກຍ້ອນວ່າອຸນຫະພູມເພີ່ມຂຶ້ນ ແລະ ກວດສອບປະກົດການດ້ານຊີວະວິທະຍາຂອງມະຫາສະໝຸດ.