ເມື່ອບໍ່ດົນມານີ້,ສອງກອງບັນຊາການ ປ້ອງກັນຊາດ - ປ້ອງກັນຄວາມສະຫງົບ ແຂວງບໍ່ແກ້ວ ໄດ້ນຳເອົາກະຕ່າດອກໄມ້ ແລະ ກະຕ່າຂອງຂວັນເຂົ້າອວຍພອນພະນັກງານຕຳຫຼວດລາດຕະເວນທາງນ້ຳທີ່ປະຈຳຢູ່ສູນປະສານງານ ລາວ - ຈີນ ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ເນື່ອງໃນໂອກາດວັນຊາດ ສປ ຈີນ (ວັນທີ 1 ຕຸລາ 1949 ຄົບຮອບ 74 ປີ), ນຳໂດຍ ສະຫາຍ ພົນຈັດຕະວາ ບຸນມີ ພາມີໄຊ ຄະນະປະຈຳພັກແຂວງເລຂາຄະນະພັກຫົວໜ້າການເມືອງກອງບັນຊາການທະຫານແຂວງບໍ່ແກ້ວ ແລະ ສະຫາຍ ພັນເອກ ຄຳແດງ ວັນນະສິດ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງບໍ່ແກ້ວ ພ້ອມຄະນະ, ເປັນກຽດຕ້ອນຮັບຂອງ ສະຫາຍ ພັນຕີ ໂຈກົວໝິງ ຫົວໜ້າສູນປະສານງານ ປະຈຳແຂວງບໍ່ແກ້ວ.
    ໂອກາດນີ້, ສະຫາຍ ພົນຈັດຕະວາ ບຸນມີ ພາມີໄຊ ໄດ້ຕາງໜ້າສອງກຳລັງປ້ອງກັນຊາດ - ປ້ອງກັນຄວາມສະຫງົບ ໃຫ້ ຄະນະພັກ - ຄະນະບັນຊາ, ພະນັກງານ-ນັກຮົບພາຍໃນກົມກອງທົ່ວແຂວງ ຝາກຄວາມຢ້ຽມຢາມຖາມຂ່າວ ແລະ ຄຳອວຍພອນ ອັນຈົບງາມຂອງສາຍພົວພັນມິດຕະພາບລະຫວ່າງສອງຊາດທີ່ເຄີຍມີມູນເຊື້ອອັນດີຮ່ວມກັນຕະຫຼອດມາ. ໂດຍສືບຕໍ່ສາຍພົວພັນຮ່ວມມືໃຫ້ໜັກແໜ້ນເຂັ້ມແຂງຂຶ້ນເລື່ອຍໆ ໃນການປະຕິບັດໜ້າທີ່ວຽກງານທີ່ຕົນເອງຮັບຜິດຊອບໃຫ້ມີຄວາມສະຫງົບໂດຍພື້ນຖານ, ຈາກນັ້ນສະຫາຍຍັງຝາກຄຳອວຍພອນໄປຍັງກອງບັນຊາການຕຳຫຼວດລາດຕະເວນທາງນ້ຳ ແຂວງ
ຢຸນນານ ໂດຍສະເພາະ ພະນັກງານ - ນັກຮົບ ທີ່ປະຈຳການຢູ່ສູນປະສານງານ ລາວ-ຈີນ ປະຈຳບ້ານມອມ ເມືອງຕົ້ນເຜິ້ງ ຈົ່ງມີສຸຂະພາບເຂັ້ມແຂງ ສືບຕໍ່ປະຕິບັດໜ້າທີ່ການເມືອງຂອງຕົນໃຫ້ສຳເລັດຜົນຢ່າງຈົບງາມ. 
ພ້ອມນີ້, ສະຫາຍ ພັນຕີ ໂຈກົວໝິງ ກໍໄດ້ກ່າວສະແດງຄວາມຂອບອົກຂອບໃຈຕໍ່ ຄະນະພັກ-ຄະນະບັນຊາ ສອງກຳລັງປ້ອງກັນຊາດ - ປ້ອງກັນຄວາມສະຫງົບ ທີ່ໄດ້ນໍາເອົາຄໍາອວຍພອນອັນອົບອຸ່ນ, ໄມຕີຈິດມິດຕະພາບມາອວຍພອນໃນຄັ້ງນີ້ພ້ອມທັງອວຍພອນໃຫ້ ຄະນະພັກ - ຄະນະບັນຊາ, ພະນັກງານ - ນັກຮົບ ຕະຫຼອດຮອດ ປະຊາຊົນລາວບັນດາເຜົ່າ ຈົ່ງມີສຸຂະພາບເຂັ້ມແຂງ, ເຮັດສໍາເລັດໜ້າທີ່ວຽກງານ. ສືບຕໍ່ຮັກສາ ແລະ ເສີມຂະຫຍາຍໄມຕິຈິດມິດຕະພາບ ແລະ ການພົວພັນຮ່ວມມືຊ່ວຍເຫຼືອຊຶ່ງກັນ ແລະ ກັນ ລະຫວ່າງ ລາວ - ຈີນ, ຈີນ-ລາວ ໃຫ້ນັບມື້ກ້າວຂຶ້ນຢ່າງບໍ່ຢຸດຢັ້ງ. 
ຂ່າວ: ວໍລະສິດ ພິດສະຫາຍ