ວິທະຍຸກະຈາຍສຽງຫວຽດນາມລາຍງານວ່າ: ຕົ້ນປີ 2024, ເສດຖະກິດ ຫວຽດນາມ ມີສັນຍານທີ່ໜ້າປະທັບໃຈ. ນັກຊ່ຽວຊານເສດຖະກິດຫຼາຍທ່ານກ່າວວ່າ:ຈຸດເດັ່ນນັບແຕ່ຕົ້ນປີ 2024 ຂອງເສດຖະກິດ ຫວຽດນາມ ແມ່ນຂະແໜງຜະລິດອຸດສາຫະກຳ.
ຂ່າວລະບຸວ່າ: ຂະແໜງປຸງແຕ່ງ, ຜະລິດເພີ່ມຂຶ້ນ 19,3% ເມື່ອທຽບໃສ່ໄລຍະດຽວກັນຂອງປີ 2023. ທົ່ວປະເທດມີວິສາຫະກິດສ້າງຕັ້ງໃໝ່ 13.500 ແຫ່ງ, ເພີ່ມຂຶ້ນ 2,2% ເມື່ອທຽບໃສ່ເດືອນມັງກອນ ແລະ ເພີ່ມຂຶ້ນ 24,8% ເມື່ອທຽບໃສ່ໄລຍະດຽວກັນຂອງປີ 2023.
ຄຽງຄູ່ກັນນັ້ນ, ຕາມກົມໃຫຍ່ສະຖິຕິ ໃຫ້ຮູ້ວ່າ: ຍອດຂາຍຍ່ອຍສິນຄ້າ ແລະ ການບໍລິການໃຊ້ສອຍເດືອນ ມັງກອນ 2024 ຄາດວ່າບັນລຸ 524,1 ຕື້ດົງ, ເພີ່ມຂຶ້ນ 1,6% ເມື່ອທຽບໃສ່ເດືອນກ່ອນ ແລະ ເພີ່ມຂຶ້ນ 8,1% ເມື່ອທຽບໃສ່ໄລຍະດຽວກັນຂອງປີ 2023. ສິ່ງທີ່ໜ້າສົນໃຈແມ່ນເງິນລົງທຶນປະຕິບັດຈາກແຫຼ່ງງົບປະມານຂອງລັດໃນຕົ້ນປີ 2024 ຄາດວ່າບັນລຸ 31,1 ຕື້ດົງ, ເພີ່ມຂຶ້ນ 12,5% ເມື່ອທຽບໃສ່ໄລຍະດຽວກັນຂອງປີ 2023.
ໃນໄລຍະຜ່ານມາ, ມີຫຼາຍອົງການສາກົນໄດ້ຍົກການຄາດຄະເນທີ່ໜ້າປະທັບໃຈກ່ຽວກັບພື້ນຖານເສດຖະກິດ ຫວຽດນາມ ໃນປີ 2024, ສ່ວນຫຼາຍໄດ້ຕີລາຄາວ່າ: ຫວຽດນາມ ຈະບັນລຸລະດັບເຕີບໂຕຍອດຜະລິດຕະພັນພາຍໃນ (GDP) ກວ່າ 6%. ມີບາງການຄາດຄະເນຍັງຖືວ່າ, ຫວຽດນາມ ອາດຈະບັນລຸລະດັບເຕີບໂຕ 6,7%, ສູງກວ່າຄາດໝາຍຊຶ່ງສະພາແຫ່ງຊາດ ຫວຽດນາມ ໄດ້ວາງອອກໃຫ້ປີ 2024.