ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ມະຫາວິທະຍາໄລບາ-ອິລານ ຂອງອິດສະຣາແອນໄດ້ພັດທະນາວິທີຮັກສາຄວາມສົດຂອງຜັກ ແລະ ໝາກໄມ້ ໂດຍປະຍຸກຈາກການໃຊ້ຄື່ນສຽງ.
    ແນວທາງໃໝ່ດັ່ງກ່າວຈະເປັນການເຄືອບຜັກ ແລະ ໝາກໄມ້ ດ້ວຍອະນຸພາກນາໂນທີ່ຮັບປະທານໄດ້ ໂດຍໃຊ້ວິທີການໂຊໂນເຄມີ (Sonochemistry) ຊຶ່ງໂມເລກຸນໄດ້ຮັບປະຕິກິລິຍາທາງເຄມີຈາກການໃຊ້ຣັງສີອັນຕຣາຊາວ. ທັງນີ້, ການເຄືອບຜັກ ແລະ ໝາກໄມ້ດ້ວຍວິທີຄື່ນສຽງນີ້ເຮັດງ່າຍ ວ່ອງໄວ ແລະ ເປັນມິດກັບສິ່ງແວດລ້ອມ. ທີມງານອິດສະຣາແອນສ້າງການເຄືອບອະນຸພາກນາໂນຈາກໄຄໂຕຊານທີ່ເປັນສານທຳມະຊາດ ຊຶ່ງໄດ້ມາຈາກໂພລີເມີເຊັ່ນ ໄຄຕິນ ໂພລີແຊກຄາໄຣ ແລະ ໂປຣຕິນ ໂດຍໃນຂະບວນການນີ້ ອະນຸພາກໄຄໂຕຊານ ຊຶ່ງເປັນມິດຕໍ່ສິ່ງແວດລ້ອມ ແລະ ສະຫຼາຍຕົວຕາມທຳມະຊາດຈະເກາະຕິດກັບພື້ນຜິວຜັກ ຫຼື ໝາກໄມ້ເຮັດໃຫ້ເກີດສານເຄືອບທີ່ໃຫ້ຄຸນສົມບັດຕ້ານເຊື້ອແບັກທີເຣຍເທິງພື້ນຜິວ. ອີກຢ່າງໜຶ່ງ, ການທົດສອບສະຕໍເບີຣີເພື່ອຫາລິດຕ້ານເຊື້ອແບັກທີເຣຍ ແລະ ຄຸນລັກສະນະຕ່າງໆເຊັ່ນ: ລະດັບນ້ຳຕານ, ຄວາມເປັນກົດ ແລະ ອັດຕາການສະຫຼາຍຕົວພົບວ່າສະຕໍເບີຣີ ຊຶ່ງເຄືອບດ້ວຍອະນຸພາກນາໂນໄຄໂຕຊານທີ່ຮັບປະທານໄດ້ ມີຄວາມຕ້ານທານເພີ່ມຂຶ້ນ ຊຶ່ງຊ່ວຍຢືດອາຍຸການເກັບຮັກສາໄດ້ດົນເຖິງ 15 ວັນ.