ສຳນັກຂ່າວສານຫວຽດນາມປະຈຳໂຕກຽວ ລາຍງານເມື່ອບໍ່ດົນມານີ້ ວ່າ: ຄະນະຄົ້ນຄວ້າຮ່ວມຈາກມະຫາວິທະຍາໄລ ຄຽວໂຕະ, ບໍລິສັດ IBM ຍີ່ປຸ່ນ ແລະ ບັນດາບໍລິສັດອື່ນໆ ໄດ້ປະສົບຜົນສໍາເລັດໃນການພັດທະນາລະບົບທີ່ນຳໃຊ້ປັນຍາປະດິດ (AI) ໃຫ້ຄຳແນະນຳບົ່ງມະຕິຊື່ພະຍາດໂດຍອີງໃສ່ອາການຂອງຄົນເຈັບ. ພ້ອມກັນນັ້ນ, ກໍຊ່ວຍທ່ານໝໍໃນການວິນິດໄສພະຍາດທີ່ຫາຍາກ.
ຂ່າວລາຍງານວ່າ: ລະບົບດັ່ງກ່າວແມ່ນນຳໃຊ້ AI ຮຽນຮູ້ຈາກຖານຂໍ້ມູນຂະໜາດໃຫຍ່ ແລະ ປະຫວັດທາງການແພດກ່ຽວກັບພະຍາດທີ່ຫາຍາກ ແລະ ຮັກສາຍາກ ຈາກຂໍ້ມູນເບື້ອງຕົ້ນຂອງອາການຄົນເຈັບ ເພື່ອໃຫ້ຄຳແນະນຳບົ່ງມະຕິຊື່ພະຍາດ. ຄະນະຄົ້ນຄວ້າຍັງສະໜອງລະບົບທີ່ອະນຸຍາດ ໃຫ້ຜູ້ຊ່ຽວຊານດ້ານການແພດປະຕິບັດການຄົ້ນຫາທີ່ຖືກຕ້ອງໂດຍໃຊ້ຄໍາສັບທາງການແພດພິເສດ. ນອກຈາກນັ້ນ, ຄະນະຄົ້ນຄວ້າຍັງມີເວັບໄຊສໍາລັບຄົນເຈັບ ໂດຍສາມາດຄົ້ນຫາຂໍ້ມູນໂດຍການປ້ອນອາການດ້ວຍຄໍາສັບທີ່ງ່າຍດາຍ.
ສາດສະດາຈານ ຟູມິຮິໂກະ ມາຊູດະ ຈາກມະຫາວິທະຍາໄລ ແພດສາດມະຫາວິທະຍາໄລ ຄຽວໂຕະ ກ່າວວ່າ: ໃນການສະໜັບສະໜູນການບົ່ງມະຕິ, ພວກເຮົາມີຈຸດປະສົງເພື່ອໃຫ້ຄົນເຈັບ ໄດ້ຮັບການຮັກສາຈາກຜູ້ຊ່ຽວຊານສະເພາະດ້ານໂດຍໄວທີ່ສຸດ.