ຂ່າວສານຊີອາໄອລານງານ, ໃນວັນທີ 24 ກຸມພາ ຜ່ານມາກະຊວງສາທາລະນະສຸກອາກຊັງຕິນໄດ້ອອກຖະແຫຼງການພະຍາດຕິດແປດວິທະຍາແຫ່ງຊາດໂດຍລະບຸວ່າ: ນັບແຕ່ວັນທີ 1 ມັງກອນປີ 2024 ມາຮອດປັດຈຸບັນ, ອາກຊັງຕິນມີຜູ້ຖືກບົ່ງມະຕິເປັນພະຍາດໄຂ້ເລືອດອອກຫຼາຍກວ່າ 40.000 ກໍລະນີ.
ກະຊວງສາທາລະນະສຸກອາກຊັງຕິນຢືນຢັນວ່າ: ປີນີ້ໄດ້ມີການລາຍງານວ່າມີຜູ້ເປັນພະຍາດໄຂ້ເລືອດອອກ 40.137 ກໍລະນີ. ຍ້ອນມີຜູ້ເປັນພະຍາດເພີ່ມຂຶ້ນຫຼາຍ ແລະ ມີອາກາດຮ້ອນຢ່າງຕໍ່ເນື່ອງ, ສາທາລະນະສຸກອາກຊັງຕິນຈຶ່ງເຕືອນໃຫ້ປະຊາຊົນຈົ່ງເພີ່ມທະວີການປ້ອງກັນຕົວ ຊຶ່ງລວມທັງມາດຕະການຕ່າງໆ ເຊັ່ນ: ຂ້າເຊື້ອບ່ອນທີ່ອາດຈະເກີດມີຍຸງ, ນຳໃຊ້ຢາຂ້າຍຸງເພື່ອຫຼີກເວັ້ນບໍ່ໃຫ້ຍຸງກັດ ແລະ ເມື່ອມີອາການກໍຕ້ອງໄປກວດຢູ່ໂຮງໝໍໂດຍໄວ.