ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 3 ມີນາ ຜ່ານມາຢູ່ ຮ່າໂນ້ຍ, ຄະນະປະຈຳລັດຖະບານ ຫວຽດນາມ ໄດ້ມີການພົບປະຕົ້ນລະດູບານໃໝ່ກັບບັນດາລັດວິສາຫະກິດທີ່ດີເດັ່ນໃນທົ່ວປະເທດ. ກອງປະຊຸມພົບປະຄັ້ງນີ້ມີ ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ແລະ ທ່ານ ເລມີງຄາຍ ຮອງນາຍົກລັດຖະມົນຕີ,  ທ່ານ ເຈີ່ນລວກວາງ ຮອງນາຍົກລັດຖະມົນຕີ ເປັນປະທານຮ່ວມ.
ທ່ານ ຟ້າມມິງຈິງ ກ່າວຄຳເຫັນໃນກອງປະຊຸມວ່າ: ລັດວິສາຫະກິດຈະເຂົ້າຮ່ວມຢ່າງເລິກເຊິ່ງຂຶ້ນກວ່າເກົ່າອີກໃນການຜັນຂະຫຍາຍປະຕິບັດ 3 ບຸກທະລຸຍຸດທະສາດກ່ຽວກັບການປັບປຸງລະບອບລະບຽບການໃຫ້ສົມບູນແບບ, ກໍ່ສ້າງແຫຼ່ງຊັບພະຍາກອນມະນຸດ ແລະ ພັດທະນາພື້ນຖານໂຄງລ່າງ. ພິເສດແມ່ນບັນດາກະຊວງ, ຂະແໜງການ, ວິສາຫະກິດຈົ່ງຄົ້ນຄວ້າປະຕິບັດການປັບປຸງໂຄງປະກອບການຄຸ້ມຄອງ, ການເງິນ, ສົ້ນເຂົ້າ, ຕ່ອງໂສ້ການສະໜອງຂອງວິສາຫະກິດ, ພັດທະນາລັດວິສາຫະກິດໃຫ້ກາຍເປັນພາກສ່ວນເສດຖະກິດທີ່ສຳຄັນຂອງພື້ນຖານເສດຖະກິດ.
     ທ່ານ ຟ້າມມິງຈິງ ເນັ້ນໜັກວ່າ: ລັດວິສາຫະກິດຕ້ອງເຄື່ອນໄຫວລົງທຶນ, ພັດທະນາການຜະລິດ, ດຳເນີນທຸລະກິດ.  ຕ້ອງປ່ຽນໃໝ່ບັນດາກຳລັງໜູນ ເຊັ່ນ: ການບໍລິໂພກ, ການລົງທຶນ, ການສົ່ງອອກ ໂດຍມີບົດບາດນຳພາ, ສ້າງກຳລັງໜູນ, ຈຸດສຸມໃຫ້ແກ່ບັນດາຂະແໜງການໃໝ່ຄື: ການຫັນເປັນດີຈີຕອນ, ຫັນເປັນສີຂຽວ, ເສດຖະກິດໝູນວຽນ, ເສດຖະກິດພູມປັນຍາ ແລະ ເສດຖະກິດແບ່ງປັນ.