ຂ່າວຕ່າງປະເທດລາຍງານ ເມື່ອບໍ່ດົນມານີ້, ທ່ານນາງ ອິນດຣານີ ຣາຈາ ລັດຖະມົນຕີປະຈຳສຳນັກງານນາຍົກລັດຖະມົນຕີສິງກະໂປ ໄດ້ເປີດເຜີຍບົດລາຍງານຕໍ່ລັດຖະສະພາວ່າ: ໂຕເລກການຄາດຄະເນໃນເບື້ອງຕົ້ນຊີ້ໃຫ້ເຫັນວ່າ ອັດຕາການຈະເລີນພັນໂດຍລວມໃນສິງກະໂປຫຼຸດລົງຢູ່ທີ່ 0,97 ເມື່ອປີຜ່ານມາ ຊຶ່ງຫຼຸດລົງຕ່ຳກວ່າ 1 ເປັນຄັ້ງທຳອິດ.
    ທ່ານນາງ ອິນດຣານີ ຣາຈາ ກ່າວວ່າ: ສິງກະໂປມີການແຕ່ງງານຂອງຜູ້ທີ່ມີບ່ອນພັກອາໄສໃນທ້ອງຖິ່ນ 26.500 ຄັ້ງ ໃນປີ 2023 ແລະ ການເກີດຂອງຜູ້ມີບ່ອນພັກອາໄສໃນທ້ອງຖິ່ນ 30.500 ຄົນ ຂະນະທີ່ຊາວສິງກະໂປແຕ່ງງານ ແລະ ມີລູກກັນໜ້ອຍລົງ ຖ້າຫາກຄິດສະເລ່ຍໃນໄລຍະ 5 ປີຜ່ານມາ ເມື່ອທຽບກັບໄລຍະ 5 ປີກ່ອນໜ້າ. ອັດຕາການຈະເລີນພັນທີ່ຫຼຸດລົງມີສາເຫດຫຼາຍຢ່າງ ລວມເຖິງການແຜ່ລະບາດຂອງພະຍາດໂຄວິດ-19, ການຢຸດຕິແຜນການແຕ່ງງານ ແລະ ມີລູກຂອງຄູ່ສາມີພັນລະຍາບາງສ່ວນ, ແຮງກົດດັນທາງການເງິນໃນການລ້ຽງລູກ, ຄວາມກັງວົນກ່ຽວກັບຄວາມສົມດູນຊີວິດ - ການເຮັດວຽກ ແລະ ແນວຄິດລຳດັບຄວາມສຳຄັນໃນຊີວິດທີ່ປ່ຽນແປງໄປ. ສ່ວນການເກີດທີ່ຫຼຸດລົງສະແດງໃຫ້ເຫັນເຖິງຄວາມກັງວົນບາງຢ່າງ ຊຶ່ງລວມເຖິງການເປັນສັງຄົມຜູ້ອາຍຸສູງ ແລະ ການຫຼຸດລົງຂອງເສດຖະກິດ ໂດຍພົນລະເມືອງອາຍຸ 65 ປີຂຶ້ນໄປກວມອັດຕາສ່ວນເກືອບ 1 ໃນ 5 ຂອງປະຊາກອນສິງກະໂປເມື່ອນັບເຖິງກາງປີ 2023. ທ່ານນາງ ອິນດຣານີ ຣາຈາ ກ່າວຕື່ມວ່າ: ການເກີດທີ່ຫຼຸດລົງຈະເຮັດໃຫ້ສິງກະໂປປະເຊີນກັບບັນຫາແຮງງານຫຼຸດລົງ ຊຶ່ງຈະເປັນຄວາມທ້າທາຍຢ່າງຍິ່ງໃຫຍ່ໃນການດຶງດູດທຸລະກິດລະດັບໂລກ ແລະ ສ້າງໂອກາດໃຫ້ກັບຄົນຮຸ່ນຕໍ່ໄປ.
    ລັດຖະບານສິງກະໂປກຳລັງດຳເນີນມາດຕະການຕ່າງໆເພື່ອກະຕຸ້ນໃຫ້ປະຊາຊົນມີລູກເຊັ່ນ: ເພີ່ມຈຳນວນມື້ພັກເກີດລູກ ແລະ ການເພີ່ມຈຳນວນມື້ລາພັກເບິ່ງແຍງລູກແບບບໍ່ຈ່າຍຄ່າຈ້າງ ແລະ ການສະ                ໜັບສະໜູນເຄື່ອງໃຊ້ພາຍໃນເຮືອນໃຫ້ແກ່ຄອບຄົວທີ່ມີລູກ.