ຂ່າວສານຫວຽດນາມລາຍງານວ່າ: ເມື່ອບໍ່ດົນມານີ້, ທ່ານ ໂອຊາມາ ຣາບີ ປະທານອົງການຄຸ້ມຄອງບໍລິຫານຄອງຊູເອສ (SCA) ໃຫ້ຮູ້ວ່າ: ເອຢິບ ພວມສຶກສາການຂະຫຍາຍ ແລະ ສ້າງສຳເລັດຊ່ອງທາງທີ່ສອງຂອງຄອງແມ່ນ້ຳຊູເອສ. ໂຄງການນີ້ໄດ້ຮັບທຶນຈາກ SCA ຊຶ່ງຈະຊ່ວຍເພີ່ມຄວາມສາມາດໃນການຮັບເຮືອ ແລະ ຊ່ວຍຫຼຸດຜ່ອນບັນຫາການຈາລະຈອນຕິດຄັດທາງນ້ຳຜ່ານຄອງນີ້.
ຂ່າວລາຍງານວ່າ: ທ່ານ ໂອຊາມາ ຣາບີ ໃຫ້ຮູ້ວ່າ: ໂຄງການນີ້ຍັງຢູ່ໃນຂັ້ນຕອນຂອງການສຶກສາຜົນກະທົບຕໍ່ສິ່ງແວດລ້ອມ, ການສຶກສາດ້ານວິຊາການ, ການສຶກສາດິນ, ຂະບວນການຂຸດເຈາະ ແລະ ການສຶກສາອື່ນໆ. ການດໍາເນີນການສຶກສາເຫຼົ່ານີ້ SCA ໄດ້ຮ່ວມມືກັບບໍລິສັດທີ່ປຶກສາສາກົນລາຍໃຫຍ່ ແລະ ຄາດວ່າຈະສໍາເລັດໃນປະມານ 16 ເດືອນ. ຈາກນັ້ນ, ໂຄງການຂະຫຍາຍຄອງຊູເອສຈະນຳສະເໜີຕໍ່ ລັດຖະບານ ເອຢີບ ເພື່ອຂໍອະນຸມັດ. ທ່ານຢືນຢັນວ່າ, ທຶນດັ່ງກ່າວຈະສະໜອງໂດຍງົບປະມານການລົງທຶນຂອງ SCA ແລະ ຈະບໍ່ວາງພາລະເພີ່ມເຕີມຕໍ່ງົບປະມານທົ່ວປະເທດ. ທ່ານຍັງຊີ້ແຈງວ່າ: ໂຄງການມີເປົ້າໝາຍທີ່ຈະຂະຫຍາຍຄອງຊູເອສທັງສອງທິດທາງ ເພີ່ມຂີດຄວາມສາມາດໃນການຮອງຮັບເຮືອທຸກປະເພດ ແລະ ທຸກຂະໜາດ.