ເພື່ອເປັນການສະເຫຼີມສະຫຼອງ ວັນແມ່ຍິງສາກົນ (ວັນທີ 8 ມີນາ 1910-8 ມີນາ 2024) ຄົບຮອບ 114 ປີ ໃຫ້ເຕັມໄປດ້ວຍຄວາມໝາຍຄວາມສໍາຄັນ. ດັ່ງນັ້ນ, ວັນທີ 6 ມີນາຜ່ານມານີ້,  ສະຫະພັນແມ່ຍິງເມືອງປາກລາຍ ແຂວງໄຊຍະບູລີ ໄດ້ຈັດພິທີປາຖະກະຖາ ມູນເຊື້ອປະຫວັດຄວາມເປັນມາຂອງວັນແມ່ຍິງສາກົນຂຶ້ນຢູ່ທີ່ຫໍປະຊູມໃຫຍ່ຂອງເມືອງ ໂດຍການເຂົ້າຮ່ວມຂອງທ່ານ ບຸນຫຼາຍ ວົງດາລາ ວ່າການເຈົ້າເມືອງປາກລາຍ, ມີພະນັກງານອາວຸໂສບຳນານ, ສະຫະພັນແມ່ຍິງໜ່ວຍອ້ອມຂ້າງເມືອງ ແລະ ແຂກເຂົ້າຮ່ວມ 
ໃນພິທີທ່ານ ບຸນຫຼາຍ ວົງດາລາ ໄດ້ຫວນຄືນປະຫັວດຄວາມເປັນມາຂອງວັນແມ່ຍິງສາກົນວ່າ: ວັນທີ່ 8 ມີນາ 1910 ແມ່ນເຫດການການເມືອງທີ່ສຳຄັນໜຶ່ງ ອັນເປັນຂີດໝາຍແຫ່ງໄຊຊະນະອັນເປັນພື້ນຖານຂອງຂະບວນການແມ່ຍິງສາກົນ, ໃນການຕໍ່ສູ້ທວງເອົາສິດ ແລະ ຜົນປະໂຫຍດອັນຊອບທຳໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ແມ່ນບາດລ້ຽວທາງດ້ານປະຫວັດສາດທີ່ສຳຄັນ ແລະ ໃຫຍ່ຫຼວງ, ກ້າວສູ່ການປະຕິບັດສິດສະເໝີພາບຍິງ-ຊາຍ, ເປັນການເປີດສັງກາດໃໝ່ສ້າງເງື່ອນໄຂໃຫ້ແມ່ຍິງໃນທົ່ວໂລກ ກໍຄືແມ່ຍິງລາວບັນດາເຜົ່າ ໄດ້ມີໂອກາດພັດທະນາຕົນເອງຮອບດ້ານຄຽງຄູ່ກັບເພດຊາຍ, ທັງນີ້ກໍເພື່ອແນໃສ່ເຮັດໃຫ້ສະມາຊິກສະຫະພັນແມ່ຍິງພາຍໃນເມືອງປາກລາຍ ໄດ້ຮັບຮູ້ເຂົ້າໃຈ ແລະ ກໍາໄດ້ປະຫວັດການກໍາເນີດ, ການເຄື່ອນໄຫວ ແລະ ເຕີບໃຫຍ່ຂະຫຍາຍຕົວຂອງວັນແມ່ຍິງສາກົນ ແລະ ຜົນງານການເຄື່ອນໄຫວຂອງສະຫະພັນແມ່ຍິງຍາດມາໄດ້ຕະຫຼອດໄລຍະຜ່ານມາ ຊຶ່ງເປັນການປະກອບສ່ວນສໍາຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
 (ຂ່າວ: ກ່າ ຄຸດທະວົງສັກ)