ກອງປະຊຸມສະຫຼູບການຈັດຕັ້ງປະຕິບັດວຽກງານພາຍໃນ ປະຈຳປີ 2023 ແລະ ເປີດຂະບວນການຍ້ອງຍໍ ພາຍໃຕ້ຄໍາຂວັນ “ຮັກຊາດ ແລະ ພັດທະນາ”.ພະແນກພາຍໃນແຂວງຄຳມ່ວນ ໄດ້ຈັດຂຶ້ນໃນວັນທີ 7 ມີນາຜ່ານມາທີ່ແຂວງດັ່ງກ່າວ ໂດຍການເຂົ້າຮ່ວມຂອງທ່ານ ສົມໃຈ ພານີຈັນ ຫົວໜ້າຄະນະຈັດຕັ້ງແຂວງ, ທ່ານ ນາງ ອາລີ ບົວຈູມ ຫົວໜ້າພະແນກພາຍໃນແຂວງ, ມີບັນດາຄະນະພະແນກການຂັ້ນແຂວງ, ຄະນະນຳຂອງບັນດາເມືອງ, ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
ການເຄື່ອນໄຫວຈັດຕັ້ງປະຕິບັດວຽກງານພາຍໃນ, ໃນໄລຍະ 1 ປີຜ່ານມາ ໄດ້ຊຸກຍູ້ຫ້ອງການພາຍໃນເມືອງ ປັບປຸງອົງການຈັດຕັ້ງບ້ານໃນ 10ເມືອງ, ນາຍບ້ານທົ່ວແຂວງ ມີ 570 ທ່ານຍິງ 16 ທ່ານ. ຮັບຮອງ ແລະ ອອກໃບຢັ້ງຢືນ ເປັນອົງການປົກຄອງບ້ານ ເຂັ້ມແຂງ ໜັກແໜ້ນ ປະຕິບັດໄດ້ 18 ບ້ານ ເທົ່າກັບ 72%, ເກັບກໍາຂໍ້ມູນຄວາມເປັນໄປໄດ້ໃນການສ້າງຕັ້ງຕາແສງ ພ້ອມທັງລາຍງານຕໍ່ກະຊວງພາຍໃນແລ້ວ, ສໍາເລັດການແກ້ໄຂເຂດແດນເຊື່ອມຕໍ່ ລະຫວ່າງ ແຂວງຄໍາມ່ວນ ກັບ ແຂວງສະຫວັນນະເຂດ 3 ຈຸດ, ການສ້າງບ້ານ ເປັນຫົວໜ່ວຍພັດທະນາໃນ 4 ດ້ານ 30 ຕົວຊີ້ບອກ ປະຕິບັດໄດ້ 150 ບ້ານ ເທົ່າກັບ 100%, ໄດ້ປັບປຸງພາລະບົດບາດ, ສິດ,ໜ້າທີ່ ຊຶ່ງຕິດພັນກັບການກໍານົດຕໍາແໜ່ງງານ, ພະແນກການ, ອົງການທຽບເທົ່າ ແລະ ບັນດາຫ້ອງການ 10 ຕົວເມືອງ ໄດ້ 26 ພາກສ່ວນ ເທົ່າກັບ 89,56%, ຂັ້ນເມືອງໄດ້ 194 ຫ້ອງການ ເທົ່າກັບ 87,87%, ການກຳນົດຕຳແໜ່ງງານຂັ້ນແຂວງໄດ້ 8 ພາກສ່ວນ ເທົ່າກັບ 25%, ການກໍານົດຕໍາແໜ່ງງານຂັ້ນເມືອງໄດ້ 21 ພາກສ່ວນ ເທົ່າກັບ 9,05%, ຄຸ້ມຄອງຖານຂໍ້ມູນລັດຖະກອນແບບເອເລັກໂຕນິກ ແລະ ກວດຜ່ານບັນຊີຈຳນວນພົນ ໃຫ້ພະແນກການ ອ້ອມຂ້າງແຂວງ ສຳເລັດ 100%, ວຽກງານຄຸ້ມຄອງເອກະສານ, ແຂ່ງຂັນ ແລະ ຍ້ອງຍໍບັນດາພະແນກການ, ອົງການທຽບເທົ່າ ແລະ ເມືອງ ໄດ້ເປີດຂະບວນການແຂ່ງຂັນ ພາຍໃຕ້ຄໍາຂວັນ  “ຮັກຊາດ ແລະ ພັດທະນາ” ປະຕິບັດໄດ້ 99% ຂອງແຜນປີ, ເກັບກຳສະຖິຕິນັກຮົບແຂ່ງຂັນ ທົ່ວແຂວງ ມີ 34 ທ່ານຍິງ 2 ທ່ານ, ວິລະຊົນ 8 ທ່ານຍິງ 2 ທ່ານ, ສະ ເໜີຍ້ອງຍໍຂັ້ນແຂວງໄດ້ທັງໝົດ 5.005 ທ່ານຍິງ 2.983 ທ່ານ, ກົມກອງ 619 ກົມກອງ, ພ້ອມນັ້ນກໍ່ໄດ້ປະເມີນຜົນການຈັດຕັ້ງປະຕິບັດວາລະແຫ່ງຊາດ ຂອງຂະແໜງພາຍໃນ, ໃນ 7 ໜ້າວຽກ ບັນລຸເຖິງ 60% ຂຶ້ນໄປ, ຊຸກຍູ້, ຕິດຕາມ ການປັບປຸງກົງຈັກການຈັດຕັ້ງເຂົ້າໃສ່ຕໍາແໜ່ງງານສໍາເລັດ 4 ເມືອງ ຄື: ເມືອງຄູນຄໍາ, ຍົມມະລາດ, ນາກາຍ ແລະ ເມືອງໜອງບົກ.
ໃນຕອນທ້າຍ, ຍັງໄດ້ເປີດຂະບວນການແຂ່ງຂັນ-ຍ້ອງຍໍ ປະຈຳປີ 2024ພາຍໃຕ້ຄໍາຂວັນ “ຮັກຊາດ ແລະ ພັດທະນາ”ໂດຍມີຕາງໜ້າຈາກຂະແໜງການ, ຫ້ອງການພາຍໃນ 10 ເມືອງ ຂຶ້ນຈັບມືແຂ່ງຂັນ.
(ຂ່າວ-ພາບ: ກອງຄຳ)