ທ່ານ ບົວເງິນ ຫຸມໄຊຍະພົມ ຮອງເຈົ້າແຂວງຊຽງຂວາງ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ເຮັດວຽກຢູ່ກຸ່ມບໍກໍ ແລະ ກຸ່ມບໍເຍຍ ເມືອງໜອງແຮດ ໃນວັນທີ6-7 ຜ່ານມາ ໂດຍການຕ້ອນຮັບຂອງທ່ານພັນໂທ ຄຳເມິງ ກອງວິໄລ ຫົວໜ້າການເມືອງ ກອງຮ້ອຍທະຫານຊາຍແດນ223 ພ້ອມດ້ວຍຄະນະ.
ທ່ານພັນໂທ ຄຳເມິງ ກອງວິໄລ ຍັງໄດ້ລາຍງານວ່າ: ກອງຮ້ອຍທະຫານຊາຍແດນ223 ປະຈຳຢູ່ກຸ່ມບໍເຍຍ ບ້ານພຽງຫົ່ງ. ເປັນກຳລັງຕົ້ນຕໍໃນການປົກປັກຮັກສາຊາຍແດນແຫ່ງຊາດ, ປະສານສົມທົບກັບກຳລັງ, ບັນດາຂະແໜງການທີ່ກ່ຽວຂ້ອງຂອງລັດ ແລະ ປະຊາຊົນ ເພື່ອຮັກສາຄວາມສະຫົງບ ແລະ ຄວາມເປັນລະບຽບຮຽບຮ້ອຍ ຕາມບໍລິເວນຊາຍແດນແຫ່ງຊາດ, ເປັນກຳລັງຈັ້ງທ່າຢູ່ດ້ານໜ້າ, ພົວພັນກັບກຳລັງປ້ອງກັນຊາຍແດນ ຂອງບັນດາປະເທດໄກ້ຄຽງ. ຈຳກັດ ແລະ ສະກັດກັ້ນການເຄື່ອນໄຫວຂ້າມຊາຍແດນຕາມລຳພັງໄຈ, ເຂົ້າຮ່ວມວຽກງານໂຄສະນາຂົນຂວາຍ ກໍ່ສ້າງຮາກຖານການເມືອງ, ການພັດທະນາຊົນນະບົດ, ເປັນແບບຢ່າງໃນການຜະລິດ, ສ້າງເສດຖະກິດ ແກ້ໄຂຊີວິດການເປັນຢູ່, ສ້າງກົມກອງໃຫ້ເຂັ້ມແຂງ, ຊ່ວຍເຫຼືອປະຊາຊົນ.
ໂອກາດນີ້, ທ່ານຮອງເຈົ້າແຂວງຊຽງຂວາງ ໄດ້ກ່າວສະແດງຄວາມຊົມເຊີຍ ໃນການປະຕິບັດໜ້າທີ່ ທີ່ພັກ-ລັດ ມອບໝາຍໃຫ້ສຳເລັດເປັນກ້າວໆມາ ໃຫ້ສືບຕໍ່ສຶກສາອົບຮົມການເມືອງແນວຄິດ, ສ້າງສາພັດທະນາກົມກອງ, ເຕົ້າໂຮມຄວາມສາມັກຄີກັບປະຊາຊົນບັນດາເຜົ່າ, ຊ່ວຍເຫຼືອປະຊາຊົນ, ກຳໄດ້ຄົນເຂົ້າ-ອອກເມືອງ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆ, ຮ່ວມມືກັບ ສສ ຫວຽດນາມ ໃນການປ້ອງກັນຊາຍແດນໃຫ້ມີຄວາມສະຫົງບ. ພ້ອມນີ້ກໍໄດ້ມອບລົກຈັກ ເວບ100 ຈຳນວນ1ຄັນ ແລະ ເຄື່ອງບໍລິໂພກ ຈຳນວນໜຶ່ງໃຫ້ກອງຮ້ອຍທະຫານຊາຍແດນ223.ຈາກນັ້ນ, ກໍໄດ້ໄປກວດກາການກໍ່ສ້າງຂົວຂ້າມນ້ຳເນີນ ບ້ານພຽງຫົ່ງ ເຫັນວ່າມີຄວາມຄືບໜ້າ, ປຸກລະດົມ ປະຊາຊົນຄຸ້ມປ່າເລົ່າ ບ້ານນາ ກຸ່ມບໍກໍ ໃຫ້ຍົກຍ້າຍໄປເຕົ້າໂຮມຢູ່ບ້ານນາ ເພາະວ່າບ້ານນາມີໂຮງຮຽນ ແລະ ສຸກສາລາ, ນອກນີ້ ໄດ້ມອບເຄ່ືອງນຸ່ງຫົ່ມຈຳນວນໜຶ່ງໃຫ້ປະຊາຊົນຄຸ້ມປ່າເລົ່າ ແລະ ບ້ານນາ
(ຂ່າວ: ບຸນມີ ແສງທຸມມີ)