ຂ່າວຕ່າງປະເທດລາຍງານ ຫວ່າງບໍ່ດົນມານີ້ວ່າ: ເລີ່ມແຕ່ວັນທີ 1 ກໍລະກົດ 2024 ເປັນຕົ້ນໄປ ຜູ້ທີ່ຈະປີນພູເຂົາໄຟຟູຈິ ໂດຍໃຊ້ເສັ້ນທາງໂຍຊິດະ (Yoshida Trail) ຈະຕ້ອງເສຍຄ່າທຳນຽມ 2.000 ເຢນ (ສະກຸນເງິນຍີ່ປຸ່ນ) ຈາກນະໂຍບາຍຂອງທາງການທີ່ພະຍາຍາມຈໍາກັດຈໍານວນນັກທ່ອງທ່ຽວໃນແຕ່ລະມື້ເທິງພູເຂົາໄຟທີ່ມີຊື່ສຽງແຫ່ງນີ້.
ໃນເດືອນກໍລະກົດ - ເດືອນກັນຍາ ປີຜ່ານມາ ມີນັກທ່ອງທ່ຽວປີນພູເຂົາໄຟຟູຈິ ໂດຍໃຊ້ເສັ້ນທາງໂຍຊິດະ ຫຼາຍກວ່າ 220.000 ຄົນ ເຮັດໃຫ້ເສັ້ນທາງແອອັດ, ເກີດການບາດເຈັບ ແລະ ເຮັດໃຫ້ມີຂີ້ເຫຍື້ອຢ່າງຫຼວງຫຼາຍຕາມເສັ້ນທາງດັ່ງກ່າວ.ທາງການຍີ່ປຸ່ນຈຶ່ງຕັດສິນໃຈອອກມາດຕະການທີ່ຈະຄວບຄຸມຈຳນວນນັກທ່ອງທ່ຽວ ເພື່ອຮັກສາຄວາມເປັນລະບຽບຮຽບຮ້ອຍ ແລະ ຄວາມສວຍງາມຂອງເສັ້ນທາງນີ້ໄວ້.
ນອກຈາກນັ້ນ, ໃນປີນີ້ ຈະອະນຸຍາດໃຫ້ນັກທ່ອງທ່ຽວຂຶ້ນໄປເສັ້ນທາງໂຍຊິດະ ພຽງ 4.000 ຄົນຕໍ່ມື້ເທົ່ານັ້ນ ແລະ ຫ້າມບໍ່ໃຫ້ໃຊ້ເສັ້ນທາງດັ່ງກ່າວໃນເວລາ 16:00 – 2:00 ໂມງ.ເສັ້ນທາງໂຍຊິດະ ໄດ້ຮັບຄວາມນິຍົມເພາະເດີນທາງຈາກນະຄອນຫຼວງໂຕກຽວໄດ້ງ່າຍ ໂດຍນັກທ່ອງທ່ຽວຫຼາຍກວ່າ 60% ທີ່ຂຶ້ນພູເຂົາໄຟຟູຈິມັກຈະເລືອກເສັ້ນທາງນີ້.
ຂະນະດຽວກັນໃນປີຜ່ານມາ, ມີການແຈ້ງຂໍຄວາມຊ່ວຍເຫຼືອ 61 ຄັ້ງ ໄປຫາເຈົ້າໜ້າທີ່ຕຳຫຼວດແຂວງຊິຊູໂອກະ ເພາະສູນຊ່ວຍເຫຼືອເທິງເສັ້ນທາງບໍ່ພຽງພໍ ໂດຍສ່ວນຫຼາຍແມ່ນການປັບຕົວເຂົ້າກັບຄວາມສູງບໍ່ໄດ້, ອຸນຫະພູມຮ່າງກາຍຕໍ່າກວ່າປົກກະຕິ ຫຼື ອຸປະກອນທີ່ຈະປີນເຂົາບໍ່ດີພໍ.
ເມື່ອຄຳນຶງເຖິງເລື່ອງທັງໝົດ ເຈົ້າໜ້າທີ່ຈຶ່ງຕັດສິນໃຈວ່າເຖິງເວລາແລ້ວຕ້ອງດຳເນີນການ ແລະ ກົດລະບຽບໃໝ່ມີຜົນບັງຄັບໃຊ້ໃນວັນທີ 1 ກໍລະກົດ 2024  ໂດຍໄດ້ຮັບການອະນຸມັດໃນວັນທີ 4 ມີນາ ຜ່ານມາ ໂດຍອຳນາດການປົກຄອງແຂວງຍາມານາຊິ.