ຕາມການລາຍງານຂອງ ທ່ານ ຄໍາພັນ ພະສະແຫວງ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງເຊກອງ ເມື່ອບໍ່ດົນນີ້ວ່າ: ໃນປີ 2023 ແຂວງເຊກອງສາມາດສົ່ງອອກຜະລິດຕະພັນກະສິກໍາມີມູນຄ່າທັງໝົດ 25,3 ລ້ານໂດລາສະຫະລັດ. ໃນນີ້, ມັນຕົ້ນແຫ້ງ 1.587 ໂຕນ ມູນຄ່າ 251.260 ໂດລາ; ແປ້ງມັນຕົ້ນ 29.886 ໂຕນ ມູນຄ່າ 13.684.757 ໂດລາ; ກາກມັນຕົ້ນ 2.814 ໂຕນ ມູນຄ່າ 259.720 ໂດລາ; ກາເຟ 1.620 ໂຕນ ມູນຄ່າ 3.897.600 ໂດລາ; ຢາງພາລາກ້ອນ 4.460 ໂຕນ ມູນຄ່າ 5.136.238 ໂດລາ; ມັນຝຣັ່ງ 230 ໂຕນ ມູນຄ່າ 92.000 ໂດລາ; ມັນດ້າງ 0,5 ໂຕນ ມູນຄ່າ 850 ໂດລາ ແລະ ຜະລິດຕະພັນໄມ້ແປຮູບ 8.142 ແມັດກ້ອນ ມູນຄ່າ 1.802.367 ໂດລາ.

ໃນປີ 2023 ທົ່ວແຂວງມີເນື້ອທີ່ປູກເຂົ້າທັງໝົດ 11.224 ເຮັກຕາ ເນື້ອທີ່ເກັບກ່ຽວ 11.171 ເຮັກຕາ, ຜົນຜະລິດລວມ 45.457 ໂຕນ; ເນື້ອທີ່ປູກພືດສະບຽງອາຫານ 5.747 ເຮັກຕາ, ເນື້ອທີ່ເກັບກ່ຽວ 5.229 ເຮັກຕາ, ຜົນຜະລິດໄດ້ 44.364 ໂຕນ ແລະ ເນື້ອທີ່ປູກພືດເປັນສິນຄ້າ 30.485 ເຮັກຕາ, ເນື້ອທີ່ເກັບກ່ຽວ 28.576 ເຮັກຕາ, ຜົນຜະລິດ 377.510 ໂຕນ. ໃນນີ້, ເນື້ອທີ່ປູກກາເຟ 10.907 ເຮັກຕາ, ເນື້ອທີ່ໃຫ້ໝາກ 9.750 ເຮັກຕາ, ຜົນຜະລິດ 41.324 ໂຕນ; ໝາກແໜ່ງ 561 ເຮັກຕາ, ຜົນຜະລິດ 662 ໂຕນ; ມັນຕົ້ນທາດແປ້ງ 13.820 ເຮັກຕາ, ຜົນຜະລິດ 267.597 ໂຕນ; ສາລີ 141 ເຮັກຕາ, ຜົນຜະລິດ 819 ໂຕນ; ກ້ວຍ 633 ເຮັກຕາ, ຜົນຜະລິດ 10.676 ໂຕນ; ໂສມ 314 ເຮັກຕາ, ຜົນຜະລິດ 650 ໂຕນ ແລະ ຜັກກະລໍ່າປີ 548 ໂຕນ, ຜົນຜະລິດ 31.634 ໂຕນ.

ທ່ານ ຄໍາພັນ ພະສະແຫວງ ໃຫ້ຮູ້ຕື່ມວ່າ: ນອກຈາກການປູກພືດ, ແຂວງຍັງໄດ້ສົ່ງເສີມການລ້ຽງສັດເປັນສິນຄ້າ ດ້ວຍການລ້ຽງເປັນຟາມ, ນໍາໃຊ້ແນວພັນທີ່ດີ, ນໍາໃຊ້ເຕັກນິກແບບໃໝ່ ແລະ ການຜະລິດອາຫານທີ່ມີຄຸນນະພາບໃຫ້ສັດລ້ຽງ. ປັດຈຸບັນ ມີການລ້ຽງສັດແບບເປັນຟາມ 17 ຟາມ. ໃນນີ້, ຟາມລ້ຽງງົວ 3 ຟາມ; ລ້ຽງໝູ 4 ຟາມ; ລ້ຽງສັດປີກ 3 ຟາມ ແລະ ລ້ຽງປາ 7 ຟາມ; ສາມາດຜະລິດຊີ້ນ, ໄຂ່ ແລະ ສັດນໍ້າໄດ້ທັງໝົດ 5.718 ໂຕນ, ສະເລ່ຍການບໍລິໂພກ 42,47 ກິໂລຕໍ່ຄົນຕໍ່ປີ; ຈໍາໜ່າຍໝູຊີ້ນ 150 ໂຕ, ໄກ່ພັນໄຂ່ 12 ພັນໂຕ; ໄຂ່ 312.815 ແຕະ, ສົ່ງອອກສັດປະເພດ ຄວາຍ, ງົວ, ໝູ, ແບ້ ແລະ ສັດປີກ 27.924 ໂຕ.

(ຂ່າວ-ພາບ: ສັນຍາ)