ພິທີເຊັນສັນຍາໂຄງການປູກກາເຟ ຢູ່ກຸ່ມເຂດພູຈະເເລ ຂອງບໍລິສັດພູດອຍ ກະສິກໍາສະອາດ ຈໍາກັດຜູ້ດຽວ ທີ່ເມືອງນາເເລ ເເຂວງຫຼວງນໍ້າທາ ໄດ້ຈັດຂຶ້ນເມື່ອບໍ່ດົນມານີ້ ທີ່ຫ້ອງການແຜນການ ເເລະ ການລົງທຶນ ເມືອງນາເເລ ໂດຍການເຂົ້າຮ່ວມຂອງທ່ານ ຄໍາພອຍ ເເກ້ວບົວພາ ຮອງເຈົ້າເມືອງ ຜູ້ຊີ້ນໍາຂົງເຂດເສດຖະກິດ, ມີຕາງໜ້າບໍລິສັດພູດອຍກະສິກໍາສະອາດ ຈໍາກັດຜູ້ດຽວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ຜ່ານສັນຍາຄັ້ງນີ້, ບໍລິສັດພູດອຍ ກະສິກໍາສະອາດ ຈໍາກັດຜູ້ດຽວ ເປັນຜູ້ລົງທຶນທັງໝົດ 836 ລ້ານກີບ ແລະ ທຶນຈົດທະບຽນ 500 ລ້ານກີບ ໂດຍຮູບເເບບການລົງທຶນ (2+3), ປະຊາຊົນເປັນດິນ ແລະ ເເຮງງານ. ຜູ້ລົງທຶນຈະຊຸກຍູ້ສົ່ງເສີມເເນວພັນ, ອຸປະກອນ, ຕະຫຼາດ. ຊຶ່ງມີ 2 ບ້ານ ລວມເນື້ອທີ່ 30-40 ເຮັກຕາ. ຈາກນັ້ນ, ທັງສອງຝ່າຍກໍໄດ້ເຊັນສັນຍາໂຄງການດັ່ງກ່າວຢ່າງເປັນທາງການ.

ໃນໂອກາດນີ້, ທ່ານ ຄໍາພອຍ ເເກ້ວບົວພາ ໄດ້ສະເເດງຄວາມຊົມເຊີຍທີ່ທາງຄະນະຮັບຜິດຊອບ, ຜູ້ລົງທຶນທີ່ໄດ້ນໍາເອົາເເຫຼ່ງທຶນມາສົ່ງເສີມປະຊາຊົນຢູ່ພາຍໃນເມືອງ, ໂດຍສະເພາະປະຊາຊົນພາຍໃນບ້ານສາມາດສ້າງລາຍຮັບເຂົ້າສູ່ຄອບຄົວ. ທ່ານຍັງຮຽກຮ້ອງໃຫ້ຄະນະຮັບຜິດຊອບໂຄງການເພີ່ມທະວີລົງຊຸກຢູ້ຕິດຕາມການເຮັດວຽກຂອງບໍລິສັດ, ປະຕິບັດຕາມສັນຍາໃຫ້ຖືກຕ້ອງ, ຊັດເຈນ ເເລະ ສອດຄ່ອງກັບທາງດ້ານເນື້ອໃນຂອງບົດສັນຍາໃຫ້ລະອຽດຈະເເຈ້ງ.

(ຂ່າວ: ອຸດົມສຸກ ວັນສະໝອນ)