ຂ່າວສານຊີອາໄອລາຍງານວ່າ: ວັນທີ12ມີນາເປັນວັນປູກຕົ້ນໄມ້ແຫ່ງຊາດຄົບຮອບ46ປີຂອງຈີນ, ສຳນັກງານຫ້ອງວ່າການຄະນະກຳມະການສ້າງປ່າອະນຸລັກສິ່ງແວດລ້ອມແຫ່ງຊາດຈີນໄດ້ເຜີຍແຜ່ບົດລາຍງານສະພາບການປູກໄມ້ສ້າງປ່າແລະສ້າງພື້ນທີ່ສີຂຽວຂອງຈີນ ຊຶ່ງບົດລາຍງານໄດ້ສະແດງໃຫ້ເຫັນວ່າ: ປີ2023ຜ່ານມາ, ຈີນໄດ້ປູກຕົ້ນໄມ້ເພື່ອສ້າງປ່າສຳເລັດແລ້ວ3.998.000 ເຮັກຕາ, ປູກຕົ້ນຫຍ້າເພື່ອປັບປຸງສິ່ງແວດລ້ອມທົ່ງຫຍ້າປະມານ 4.379.000 ເຮັກຕາ, ປັບປຸງດິນທີ່ເປັນທະເລຊາຍແລະທະເລຫີນ 1.905.000 ເຮັກຕາ.
ນັບຕັ້ງແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18ຂອງພັກກອມມູນິດຈີນໃນປີ2012ເປັນຕົ້ນມາ, ທົ່ວປະເທດສາມາດປະຕິບັດໜ້າທີ່ການປູກຕົ້ນໄມ້ສ້າງປ່າແລະສ້າງພື້ນທີ່ສີຂຽວສຳເລັດ112ລ້ານເຮັກຕາ, ເນື້ອທີ່ປ່າໄມ້ແລະປະລິມານສະສົມປ່າໄມ້ໃນທົ່ວປະເທດຈີນສາມາດຮັກສາການເຕີບໂຕເປັນເວລາຫຼາຍປີຕິດຕໍ່ກັນ, ເນື້ອທີ່ປູກປ່າບັນລຸເຖິງ87,6 ລ້ານເຮັກຕາ ເປັນອັນດັບໜຶ່ງຂອງໂລກ.

ຕາມແຜນການປີ2024, ຈີນຈະປູກຕົ້ນໄມ້ສ້າງປ່າແລະສ້າງພື້ນທີ່ສີຂຽວໃຫ້ໄດ້ປະມານ6,7ລ້ານເຮັກຕາ, ໃນນີ້ປູກຕົ້ນໄມ້ສ້າງປ່າ 3,6 ລ້ານເຮັກຕາ. ອີງຕາມໂຕເລກສະຖິຕິຫຼ້າສຸດຂອງອົງການປ່າໄມ້ແລະທົ່ງຫຍ້າແຫ່ງຊາດຈີນສະແດງໃຫ້ເຫັນວ່າ:ນັບແຕ່ຕົ້ນປີມາຮອດປັດຈຸບັນ, ສາມາດປູກສຳເລັດແລ້ວປະມານ467.000 ເຮັກຕາ.