ເມືອງໄຊຍະບູລີ ແຂວງໄຊຍະບູລີ ໄດ້ຈັດພິທີປະກາດ 4 ໂຮງຮຽນຄື: ໂຮງຮຽນ ມສ ນາຫຼາ, ມສ ເອກະພາບ, ມສ ພັດທະນາ ແລະ ໂຮງຮຽນ ມຕ ມິດຕະພາບ ເປັນກົມກອງວັດທະນະທຳ ຂຶ້ນໃນວັນທີ 12 ມີນາຜ່ານມາ ທີ່ໂຮງຮຽນ ມສ ເອກະພາບ ໂດຍການເຂົ້າຮ່ວມຂອງທ່ານ ເສນ ພັນລັກ ວ່າການເຈົ້າເມືອງ ໄຊຍະບູລີ, ທ່ານ ກອງໄລ ວິໄລພອນ ຮອງຫົວໜ້າພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງ, ມີຫົວໜ້າ, ຮອງຫົວໜ້າຫ້ອງການ, ຄູອາຈານ ແລະ ນ້ອງນັກຮຽນເຂົ້າຮ່ວມ.
    ໃນພິທີ, ທ່ານ ນາງ ຂັນທະລີ ສິດຕະຜົນ ຫົວໜ້າຫ້ອງການ ຖວທ ເມືອງ ໄດ້ຜ່ານບົດລາຍງານ ການຈັດຕັ້ງປະຕິບັດຂະບວນການແຂ່ງຂັນສ້າງກົມກອງວັດທະນະທຳ. ພາຍຫຼັງໄດ້ຮັບຄໍາແນະນໍາຂອງພະແນກ ຖວທ ສະບັບເລກທີ 1278/ຖວທ.ຊຍ, ລົງວັນທີ 11 ພະຈິກ 2019 ວ່າດ້ວຍມາດຖານການສ້າງຄອບຄົວ, ບ້ານ, ກົມກອງ ເມືອງ ວັດທະນະທຳ. ຫ້ອງການ ຖວທ ເມືອ ໄດ້ຂໍທິດຊີ້ນຳຈາກຄະນະປະຈຳພັກເມືອງເພື່ອເປັນທິດໃນການຈັດຕັ້ງປະຕິບັດການສ້າງກົມກອງວັດທະນະທຳມີທັງໝົດ 5 ບາດກ້າວ ເປັນຕົ້ນແມ່ນໄດ້ກະກຽມບັນດາເອກະສານຕ່າງໆເພື່ອຈັດຕັ້ງເຊື່ອມຊືມ; ສ້າງໂຄງການ, ສ້າງແຜນດຳເນີນງານອັນລະອຽດເພື່ອເປັນພື້ນຖານໃນການຈັດຕັ້ງປະຕິບັດ, ເຊື່ອມຊືມ ເອກະສານ, ມາດຖານຂອງການສ້າງຄົນ, ຄອບຄົວ, ບ້ານ, ກົມກອງ ແລະ ເມືອງ ວັດທະນະທໍາຢ່າງທົ່ວເຖິງໃນຂົງເຂດສຳນັກງານ, ຜ່ານແຜນດຳເນີນງານການແຂ່ງຂັນແບບຟອມ, ການກວດກາຕິດຕາມການຈັດຕັ້ງປະຕິບັດຂະບວນການແຂ່ງຂັນກົມກອງວັດທະນະທຳກຳນົດເວລາ 1 ປີຂຶ້ນໄປ. ຜ່ານການປະເມີນຕາມ 6 ມາດຖານຂອງການສ້າງຄົນ ແລະ 4 ມາດຖານຂອງການສ້າງກົມກອງວັດທະນະທຳເຫັນວ່າທັງ 4 ໂຮງຮຽນດັ່ງກ່າວ ແມ່ນມີມາດຖານ ແລະ ເງື່ອນໄຂຄົບຖ້ວນເທົ່າກັບ 30,77%. ຈາກນັ້ນ, ໃນພິທີ ກໍ່ໄດ້ມອບໃບຢັ້ງຢືນກົມກອງວັດທະນະທຳໃຫ້ທັງ 4 ໂຮງຮຽນ, ໃຫ້ກຽດມອບໂດຍທ່ານ ເສນ ພັນລັກ ພ້ອມທັງລັ່ນຄ້ອງເກົ້າບາດ ແລະ ເປີດປ້າຍ 4 ໂຮງຮຽນເປັນກົມກອງວັດທະນະທຳຢ່າງເປັນທາງການ.
(ຂ່າວ-ພາບ: ສົມພົງ ສີສະຫວັດ)