ໃນໂອກາດທີ່ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ເຄື່ອນໄຫວເຮັດວຽກຢູ່ເມືອງຊຽງຮ່ອນໃນລະຫວ່າງວັນທີ 12-13 ມີນາຜ່ານມາ. ທ່ານເຈົ້າແຂວງ ແລະ ພາກສ່ວນທີ່ກ່ຽວຂ້ອງ ໄດ້ລົງສໍາຫຼວດກວດກາຄວາມເປັນໄປໄດ້ ທີ່ຈະສ້າງຕັ້ງໂຮງງານແປຮູບແປ້ງມັນຕົ້ນຢູ່ເມືອງຊຽງຮ່ອນ. ໃນການສຳຫຼວດຄວາມເປັນໄປໄດ້ໃນການກໍ່ສ້າງຄັ້ງນີ້ ໄດ້ກວດກາຢູ່ 3 ຈຸດຄື: ຢູ່ຈຸດບ້ານປ່າຫວ້ານ, ບ້ານ ປົ່ງ ແລະ ບ້ານ ນໍ້າແປ.
 ທ່ານເຈົ້າແຂວງ ໄດ້ມີຄວາມເປັນຫ່ວງເປັນໄຍຕໍ່ກັບການສ້າງຕັ້ງໂຮງງານ ເພື່ອບໍ່ໃຫ້ມີຜົນກະທົບຕໍ່ດິນທຳການຜະລິດຂອງປະຊາຊົນ ແລະ ສິງແວດລ້ອມ. ທ່ານເຈົ້າແຂວງ ໄດ້ຮຽກຮ້ອງໃຫ້ການນຳເມືອງຈົ່ງໄດ້ສົມທົບກັບການຈັດຕັ້ງບ້ານ ແລະ ພໍ່ແມ່ປະຊາຊົນໃຫ້ມີຄວາມເຂົ້າໃຈຕໍ່ການສ້າງຕັ້ງໂຮງງານດັ່ງກ່າວ ຖ້າຫາກການສ້າງຕັ້ງໂຮງງານສຳເລັດ ຈະເປັນການຊຸກຍູ້ສົ່ງເສີມການປູກມັນຕົ້ນ ແລະ ລາຄາມັນຕົ້ນມີຄວາມໝັ້ນທ່ຽງ ແລະ ອິກດ້ານໜຶ່ງກໍເພື່ອເປັນການກະຕຸ້ນເສດຖະກິດຂອງເມືອງໃຫ້ມີການຂະຫຍາຍຕົວດີຂຶ້ນ.
(ຂ່າວ: ຖວທ ເມືອງຊຽງຮ່ອນ)