ພະອາຈານ ລິນທອງ ຄໍາສະຫວ່າງ ພ້ອມຄະນະ ອົງການພຸດທະສາສະໜາສໍາພັນລາວ (ອພສ) ເມືອງເລົ່າງາມ ຕາງໜ້າພະອາຈານ ສີປະເສີດ ໄຊຍະປັນຍາ ກໍາມະການສູນກາງ ອພສ ຮອງປະທານ ອພສ ແຂວງສາລະວັນ ປະທານ ອພສ ເມືອງເລົ່າງາມ ໄດ້ມອບເຄື່ອງອັດເອກະສານ (ປິນເຕີ), ຊຸດກິລາ, ຂັນລາງວັນ ແລະ ເຄື່ອງດື່ມ ລວມມູນຄ່າ 10.175.000 ກີບ ໃຫ້ໂຮງຮຽນມັດທະຍົມສົມບູນອົ້ນນ້ອຍ ເມືອງເລົ່າງາມ ເມື່ອບໍ່ດົນມານີ້ ທີ່ໂຮງຮຽນດັ່ງກ່າງ ໂດຍມີທ່ານ ໄຊຍະເດດ ແກ້ວພູຫົງ ຮອງຫົວໜ້າເຂດ 8 ຜູ້ອໍານວຍການໂຮງຮຽນ ມັດທະຍົມສົມບູນອົ້ນນ້ອຍ ເມືອງເລົ່າງາມ ເຂົ້າຮ່ວມການມອບຮັບຄັ້ງນີ້..
ພະອາຈານ ລິນທອງ ຄຳສະຫວ່າງ ໄດ້ກ່າວມອບເຄື່ອງຊ່ວຍເຫຼືອວ່າ: ເຄື່ອງອັດເອກະສານ, ຂັນລາງວັນ, ຊຸດກິລາ ແລະ ເຄື່ອງດື່ມດັ່ງກ່າວນີ້ ແມ່ນພາຍໃຕ້ການຊີ້ນຳຂອງພະອາຈານ ສີປະເສີດ ໄຊຍະປັນຍາ ຍ້ອນເຫັນໄດ້ຄວາມສຳຄັນຕໍ່ກັບວຽກງານການສຶກສາ ກໍຄືວຽກງານກິລາ ແລະ ສິລະປະ ຈຶ່ງໄດ້ລະດົມ ເຄື່ອງດັ່ງກ່າວ ນຳລູກສິດລູກຫາ ຄົນລະໜ້ອຍ ເພື່ອເປັນກຳລັງສັດທາອັນໃຫຍ່. ຕໍ່ກັບການຊ່ວຍເຫຼືອດັ່ງກ່າວນີ້, ທ່ານ ໄຊຍະເດດ ແກ້ວພູຫົງ ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ ພະອາຈານ ສີປະເສີດ ໄຊຍະປັນຍາ ທີ່ໄດ້ນໍາເອົາເຄື່ອງຊ່ວຍເຫຼືອດັ່ງກ່າວ ມາມອບໃຫ້ໃນຄັ້ງນີ້, ຊຶ່ງຍາມໃດກໍເຫັນໄດ້ຄວາມໝາຍຄວາມສໍາຄັນ ແລະ ໃຫ້ການຊ່ວຍເຫຼືອພວກເຮົາຕະຫຼອດມາ. ການມອບວັດຖຸປັດໄຈດັ່ງກ່າວ, ເປັນການປະກອອບສ່ວນໃຫ້ແກ່ການກະກຽມ ແລະ ນໍາໃຊ້ເຂົ້າໃນການແຂ່ງຂັນກິລາ ບານເຕະຊາຍ ຊາວໜຸ່ມທົ່ວໄປ ພາຍໃນເຂດບ້ານທີ 8 ທີ່ຈະຈັດມໍໆນີ້.
(ຂ່າວ: ສາລະວັນ)