ກົມຕຳຫຼວດຈາລະຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ (ປກສ) ໄດ້ລາຍງານໃຫ້ຮູ້ວ່າ: ເດືອນກຸມພາ 2024 ທົ່ວປະເທດມີອຸບັດເຫດເກີດຂຶ້ນທັງໝົດ 630 ລາຍ, ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 143 ລາຍ, ພາຫະນະເປ່ເພ 1.387 ຄັນ, ຫຼຸດລົງ 277 ຄັນ, ຄົນໄດ້ຮັບບາດເຈັບ 1.192 ຄົນ ຍິງ 255 ຄົນ, ຫຼຸດລົງ 225 ຄົນ, ເສຍຊີວິດ 101 ຄົນ ຍິງ 31 ຄົນ, ຫຼຸດລົງ 18 ຄົນ.

ສະເພາະຢູ່ນະຄອນຫຼວງວຽງຈັນ ອຸບັດເຫດເກີດຂຶ້ນ 91 ລາຍ, ຫຼຸດລົງ 45 ລາຍ, ພາຫະນະເປ່ເພ 189 ຄັນ, ຫຼຸດລົງ 90 ຄັນ, ຄົນໄດ້ຮັບບາດເຈັບ 94 ຄົນ, ຫຼຸດລົງ 66 ຄົນ, ຄົນເສຍຊີວິດ 13 ຄົນ, ຫຼຸດລົງ 5 ຄົນ.

ສາເຫດຂອງການເກີດອຸບັດເຫດ: ຍ້ອນການດື່ມເຄື່ອງດື່ມທີ່ມີທາດເຫຼົ້າ, ໃຊ້ຄວາມໄວເກີນ, ບໍ່ປ່ອຍສິດ, ຊີງຂຶ້ນໜ້າບໍ່ຮັບປະກັນ, ປ່ຽນທິດທາງເດີນ, ເຕັກນິກບໍ່ຮັບປະກັນ, ລ່ວງປ້າຍຫ້າມ ແລະ ອື່ນໆ. ສຳລັບການຈັດອັນດັບແຂວງທີ່ເກີດອຸບັດເຫດຫຼາຍກວ່າໝູ່ແມ່ນ ນະຄອນຫຼວງວຽງຈັນ, ແຂວງຈຳປາສັກ, ແຂວງວຽງຈັນ, ແຂວງສະຫວັນນະເຂດ, ແລະ ແຂວງອັດຕະປື, ແຂວງ ທີ່ມີຜູ້ເສຍຊີວິດຫຼາຍກວ່າໝູ່ມີ ນະຄອນຫຼວງວຽງຈັນ, ແຂວງສະຫວັນນະເຂດ, ບໍ່ແກ້ວ, ອັດຕະປື, ຫຼວງພະບາງ ແລະ ອຸດົມໄຊ.

ຂໍ້ມູນຈາກກົມຕຳຫຼວດຈະລາຈອນ: ຮຽບ​ຮຽງໂດຍ: ບຸນອູ້ມ