ພິທີເປີດງານແຂ່ງຂັນກິລາ ປະຈໍາປີ ຄັ້ງທີ II ທົ່ວນະຄອນຫຼວງວຽງຈັນ ຈັດຂຶ້ນລະຫວ່າງວັນທີ 16-22 ມີນາ 2024 ທີ່ສະໜາມກິລາວິທະຍາໄລ ພະລະ ສຶກສາ ພາຍໃຕ້ການເປັນປະທານຂອງ ທ່ານ ທະວິໄຊ ເໝົາຊົມພູ ເຈົ້າເມືອງສີໂຄດຕະບອງ ທັງເປັນປະທານຈັດງານແຂ່ງຂັນກິລາທົ່ວນະຄອນ ຫຼວງວຽງຈັນ ຄັ້ງທີ II ທີ່ເມືອງສີໂຄດເປັນເຈົ້າພາບ ໂດຍມີ ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ, ບັນດາເຈົ້າເມືອງ, ຮອງເຈົ້າເມືອງ, ຫົວໜ້າພະແນກ, ຮອງຫົວໜ້າພະແນກ, ຫ້ອງການ, ຂະແໜງການ ພະນັກງານຄູ-ອາຈານ ແລະ ນັກຮຽນເຂົ້າຮ່ວມ.

ທ່ານ ທະວິໄຊ ເໝົາຊົມພູ ຂຶ້ນຜ່ານບົດລາຍງານການກະກຽມຄວາມພ້ອມງານແຂ່ງຂັນກິລາທົ່ວນະຄອນຫຼວງວຽງຈັນ ຄັ້ງທີ II ໃຫ້ຮູ້ວ່າ: ພາຍຫຼັງທີ່ອົງຄະນະພັກ-ອົງການປົກຄອງນະຄອນຫຼວງວຽງຈັນ ໄດ້ມອບໝາຍໃຫ້ເມືອງສີໂຄດຕະບອງ ເປັນເຈົ້າພາບຈັດງານແຂ່ງຂັນກິລານັກຮຽນ ທົ່ວນະຄອນຫຼວງວຽງຈັນ ຄັ້ງທີ II ຈາກນັ້ນ ຄະນະພັກ ອົງການປົກຄອງເມືອງສີໂຄດຕະບອງ ໄດ້ມີການຫ້າງຫາກະກຽມ ໂດຍສົມທົບກັບພະແນກສຶກສາທິການ ແລະ ກິລາ ນະຄອນ ຫຼວງວຽງຈັນ ແລະ ວິທະຍາໄລພາລະສຶກສາ ເພື່ອປັບປຸງພື້ນຖານໂຄງລ່າງ ເປັນຕົ້ນສະຖານທີ່ເປີດ-ປິດ, ສະໜາມກິລາແຂ່ງຂັນ, ກະກຽມດ້ານງົບປະມານ ກະກຽມຄູຝຶກ ແລະ ນັກກິລາ ພ້ອມທັງອອກໜັງສືແຈ້ງການເຖິງ 8 ຕົວເມືອງ ເພື່ອເຂົ້າຮ່ວມ.

ງານກິລາ ຄັ້ງນີ້ ມີ 5 ປະເພດຄື: ກິລາເຕະບານ ຍິງ-ຊາຍ, ກິລາ ແລ່ນ-ລານ ຍິງ-ຊາຍ, ບານສົ່ງ ຍິງ-ຊາຍ, ກະຕໍ້ ຍິງ-ຊາຍ ແລະ ກິລາ ເປຕັງ ຍິງ-ຊາຍ ຕາມລະບຽບການແຂ່ງຂັນແມ່ນຈັດຂຶ້ນໃນທຸກໆປີ ຊຶ່ງໝູນວຽນກັນໃນແຕ່ລະເມືອງ ທົ່ວນະຄອນຫຼວງວຽງຈັນ ຜັດປ່ຽນກັນເປັນເຈົ້າພາບ ເພື່ອພ້ອມກັນ ປຸກລະດົມ ຊຸກຍູ້ ແລະ ສົ່ງເສີມວຽກງານກິລາມວນຊົນທົ່ວນະຄອນຫຼວງວຽງຈັນ ແນໃສ່ເສີມສ້າງສຸຂະພາບ, ມິດຕະພາບ, ການພັດທະນາ, ການຮ່ວມມື ແລະ ຄວາມສາມັກຄີ ທີ່ເປັນປຶກແຜ່ນ ຂອງຊາວນະຄອນຫຼວງວຽງຈັນ ເປັນງານທີ່ມີ ຄວາມໝາຍສໍາຄັນຕໍ່ການພັດທະນາຊັບພະຍາກອນມະນຸດຂອງຊາດ ກໍຄືຂອງຊາວນະຄອນຫຼວງວຽງຈັນ ເປັນການປຸກລະດົມຊາວໜຸ່ມ, ນັກຮຽນ, ນັກສຶກສາ ໃຫ້ມີສ່ວນຮ່ວມໃນການຫຼິ້ນກິລາ ແລະ ແຂ່ງຂັນກິລາ ປະເພດຕ່າງໆ ເພື່ອຫ່າງໄກຈາກຢາເສບຕິດ ແລະ ປະກົດການຫຍໍ້ທໍ້ຕ່າງໆ.

ຂ່າວ-ພາບ: ວຽງຈັນໃໝ່