ກອງປະຊຸມໃຫຍ່ຄັ້ງທີ V ຂອງກຳມະບານຮາກຖານ ທະນາຄານນະໂຍບາຍ ສາຂາ ແຂວງຈໍາປາສັກ ໄດ້ສຳເລັດໃນທ້າຍອາທິດຜ່ານມາ ທີ່ຫ້ອງປະຊຸມຂອງທະນາຄານດັ່ງກ່າວ,ໂດຍການເປັນປະທານຮ່ວມຂອງ ທ່ານ ແສງສຸກ ແກ້ວພົນເດດ ຄະນະບໍລິຫານງານສະຫະພັນກຳມະບານແຂວງ ປະທານຄະນະບໍລິຫານງານ ສາຂາທະນາຄານ ສປປ ລາວ ພາກໃຕ້ ຈຳປາສັກ, ທ່ານ ທິບພະກອນ ສູນດາລາ ຫົວໜ້າສາຂາທະນາຄານນະໂຍບາຍ ແຂວງຈໍາປາສັກ.

ທ່ານ ສົມພົນ ພົງເສນາ ຮັກສາການປະທານກຳມະບານຮາກຖານທະນາຄານນະໂຍບາຍ ສາຂາແຂວງຈຳປາສັກ ຜ່ານບົດລາຍງານການເມືອງ 2 ພາກ, ຊຶ່ງໄດ້ຍົກໃຫ້ເຫັນເຖິງຜົນສຳເລັດ ແລະ ການຈັດຕັ້ງປະຕິບັດວຽກງານກຳມະບານ ແລະ ການສະຫຼູບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ໃນໄລຍະ 5 ປີຜ່ານມາ ແລະ ທິດທາງແຜນການ 5 ປີຕໍ່ໜ້າ. ກໍາມະບານຮາກຖານ ໄດ້ສຸມໃສ່ວຽກງານຕົວຈິງຂອງແຕ່ລະພາກສ່ວນ,ໂດຍຖືເອົາເນື້ອໃນຂໍ້ແຂ່ງຂັນ 5 ເປັນເຈົ້າເປັນບ່ອນອີງໃນການຈັດຕັ້ງປະຕິບັດວຽກງານກຳມະບານ ແລະ ມີການປະເມີນຜົນສະມາຊິກກຳມະບານໃນແຕ່ລະປີ, ສາມາດໄດ້ຮັບໃບຢັ້ງຢຶນຂະບວນການແຂ່ງຂັນ 5 ເປັນເຈົ້າຈຳນວນ 5 ໃບໃນ 5 ປີຜ່ານມາ, ນອກນີ້ ຍັງໄດ້ພ້ອມກັນຈັດຕັ້ງປະຕິບັດວຽກງານວິຊາສະເພາະໃນການຜັນຂະຫຍາຍວຽກງານມາເປັນແຜນການ, ແຜນງານ, ໂຄງການລະອຽດເພື່ອເຮັດໃຫ້ວຽກງານມີຜົນສຳເລັດຕາມຈຸດປະສົງລະດັບຄາດໝາຍທີ່ວາງໄວ້, ພ້ອມນີ້ຍັງຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ພ້ອມກັນປະຕິບັດໃນຕໍ່ໜ້າ. ຈາກນັ້ນ, ກອງປະຊຸມໄດ້ດຳເນີນການປ່ອນຄັດເລືອກເອົາຄະນະບໍລິຫານງານຊຸດໃໝ່, ໃນນັ້ນມີຜູ້ສະໝັກ 5 ທ່ານ. ຜ່ານການປ່ອນບັດເລືອກໄດ້ ທ່ານ ສອນພະຈັນ ສຸລິຍະວົງ ເປັນປະທານ, ທ່ານ ນາງ ສັນຍາຮັກ ສຸລະວົງ ເປັນຮອງ ແລະ ທ່ານ ນາງ ແສງອຳພອນ ໄຊຍະວົງ ເປັນຮອງ ທັງເປັນປະທານກວດກາ.

(ພາບ - ຂ່າວ: ວິຊານ ສິມະນີວົງ)