ລັດວິສາຫະກິດຖືຮຸ້ນລາວ (ລຮລ)ໄດ້ຈັດກອງປະຊຸມສະຫຼຸບວຽກງານປະຈຳປີ 2023 ແລະ ຜ່ານທິດທາງແຜນການປີ 2024 ຂຶ້ນໃນວັນທີ 26 ມີນາ ນີ້ທີ່ຫໍຊຸມແຫ່ງຊາດໂດຍການໃຫ້ກຽດເຂົ້າຮ່ວມຂອງທ່ານ ຈັນທະບູນ ສຸກອາລຸນຮອງລັດຖະມົນຕີກະຊວງພະລັງງານແລະ ບໍ່ແຮ່, ມີຄະນະສະພາບໍລິຫານ ລຮລ, ຫ້ອງການ, ບັນດາກົມ, ຕາງໜ້າກະຊວງການເງິນ, ກະຊວງແຜນການ ແລະ ການລົງທຶນ, ລັດວິສາຫະກິດໃນຂະແໜງພະລັງງານ ແລະ ບໍ່ແຮ່, ທະນາຄານ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ມານະສິນ ວົງໄຊ ຜູ້ອໍານວຍການ ລັດວິສາຫະກິດຖືຮຸ້ນລາວ ໄດ້ລາຍງານຜົນສຳເລັດໃນການດຳເນີນທຸລະກິດປະຈຳປີ 2023ວ່າ: ລຮລ ສາມາດສ້າງລາຍຮັບໄດ້ 50,51 ລ້ານໂດລາ, ມີຜົນກຳໄລທາງການບັນຊີ 21,86 ລ້ານໂດລາ, ໄດ້ຊຳລະຕົ້ນທຶນ-ດອກເບັ້ຍໃຫ້ກະຊວງການເງິນ ແລະ ທະນາຄານທຸລະກິດພາຍໃນປະເທດ ຕາມສັນຍາແລະ ປະຕິບັດພັນທະອາກອນ 5,51 ລ້ານໂດລາ;4 ໂຄງການທີ່ ລຮລ ຮ່ວມຖືຮຸ້ນໃນປັດຈຸບັນ ສາມາດຜະລິດພະລັງງານໄຟຟ້າໄດ້ທັງໝົດ 19.688 ລ້ານ kWhປະກອບມີ: ໂຄງການໄຟຟ້ານ້ຳເທີນ 2 ຜະລິດໄດ້ 4.432 ລ້ານkWh, ໂຄງການໄຟຟ້າຄວາມຮ້ອນຫົງສາ 12.077 ລ້ານ kWh, ໂຄງການໄຟຟ້າເຊປຽນ-ເຊນໍ້ານ້ອຍ 1.856ລ້ານ kWh ແລະ ໂຄງການໄຟຟ້ານໍ້າງຽບ 1 ຜະລິດໄດ້ 1.323 ລ້ານ kWh, ລວມລາຍຮັບຈາກການຂາຍໄຟຟ້າທັງໝົດ 1.206 ລ້ານໂດລາ, ລວມພັນທະທີ່ໄດ້ມອບໃຫ້ລັດຖະບານ 85,70 ລ້ານໂດລາ (ຄ່າພາກຫຼວງ 32,02 ລ້ານໂດລາ, ອາກອນກໍາໄລ 37,20 ໂດລາ ແລະ ຄ່າທໍານຽມແຮ່ທາດ 16,48 ລ້ານໂດລາ). 
ທ່ານ ມານະສິນ ວົງໄຊ ກ່າວອີກວ່າ:ສໍາລັບທິດທາງແຜນການປີ 2024 ລຮລ ຈະພະຍາຍາມສູ້ຊົນໃຫ້ມີລາຍຮັບເພີ່ມຂຶ້ນ ໂດຍວາງຄາດໝາຍສ້າງລາຍຮັບ ປະມານ 60 ລ້ານໂດລາ, ມີຜົນປະກອບການທີ່ດີກວ່າເກົ່າ ແລະ ມອບພັນທະອາກອນໃຫ້ລັດຖະບານໄດ້ຫຼາຍຂຶ້ນ. ລຮລ ຈະສືບຕໍ່ເອົາໃຈໃສ່ປະຕິບັດວຽກງານຕາມພາລະບົດບາດ ແລະ ໜ້າທີ່ຮັບຜິດຊອບຂອງຕົນໃຫ້ດີທີ່ສຸດ ເພື່ອເປັນຫົວໜ່ວຍທຸລະກິດໜຶ່ງຂອງລັດທີ່ມີຄວາມເຂັ້ມແຂງ, ປະກອບສ່ວນສ້າງລາຍຮັບທີ່ໝັ້ນຄົງ, ມີກຳໄລຍືນຍົງ ເພື່ອສົ່ງມອບໃຫ້ລັດຖະບານນັບມື້ຫຼາຍຂຶ້ນຕາມ 5 ວິໄສທັດໃນການຄຸ້ມຄອງບໍລິຫານທຸລະກິດ: ລົງທຶນຢ່າງມີປະສິດທິຜົນ; ສ້າງຜົນກຳໄລໃຫ້ຫຼາຍເທົ່າທີ່ຈະຫຼາຍໄດ້;ສ້າງຄວາມເຊື່ອຖືຈາກສະຖາບັນການເງິນສາກົນແລະຜູ້ສະໜອງທຶນ;ສ້າງຄວາມເຂັ້ມແຂງໃຫ້ແກ່ອົງກອນຢ່າງຕໍ່ເນື່ອງ; ບໍລິຫານລາຍຮັບ ແລະລາຍຈ່າຍຢ່າງໂປ່ງໃສ.
ໃນພິທີດັ່ງກ່າວຍັງໄດມີພິທີມອບໃບຍ້ອງຍໍຂັ້ນກະຊວງພະລັງງານແລະບໍ່ແຮ່ ແລະຂອງລັດວິສາຫະກິດຖືຮຸ້ນລາວໃຫ້ແກ່ພະນັກງານທີ່ມີຜົນງານດີເດັ່ນ ປະຈຳປີ 2023 ຈຳນວນໜຶ່ງ.
ຂ່າວ-ພາບ:ພູວຽງຄຳ