ເພື່ອເປັນການລະນຶກເຖິງຄຸນງາມຄວາມດີຂອງບັນພະບຸລຸດໃນສະໄໝເຮັດການຕໍ່ສູ້ກູ້ຊາດຕ້ານກັບຈັກກະພັດຜູ້ມາຮຸກຮານເພື່ອພາລະກິດປົດປ່ອຍຊາດ ແລະ ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວຂຶ້ນໃນວັນທີ 2 ທັນວາ 1975. ໃນວັນທີ 27 ມີນາຜ່ານມາ ຢູ່ທີ່ຫ້ອງປະຊຸມຂອງພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ (ຖວທ) ແຂວງຄໍາມ່ວນໄດ້ຈັດພິທີຮັບຟັງປາຖະກະຖາເນື່ອງໃນໂອກາດວັນສໍາຄັນຕ່າງໆຂອງຊາດ-ຂອງພັກ ໂດຍການເປັນປະທານ ແລະ ປາຖະກະຖາຂອງສະຫາຍ ໄຊສົມບູນ ສຸວັນດາລາ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກ ຖວທ ແຂວງ, ມີບັນດາສະຫາຍໃນຄະນະພັກ, ຄະນະພະແນກ, ຄະນະຂະແໜງ ຕະຫຼອດເຖິງພະນັກງານວິຊາການເຂົ້າຮ່ວມຮັບຟັງ. 
ສໍາລັບເອກະສານສໍາຄັນຕ່າງໆທີ່ນໍາມາເຜີຍແຜ່ເຊື່ອມຊຶມໃນຄັ້ງນີ້ ປະກອບມີ 4 ເອກະສານຄື: ເອກະສານໂຄສະນາ-ປາຖະກະຖາ ວັນສ້າງຕັ້ງພັກປະຊາຊົນ ປະຕິວັດລາວ (22/3/1955–22/3/2024)ຄົບຮອບ 69 ປີ, ເອກະສານວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ (21/3/1946–21/ 3/2024) ຄົບຮອບ 78 ປີ, ເອກະສານວັນເກີດປະທານ ຄໍາໄຕ ສີພັນດອນ (8/2/1924–8/2/2024) ຄົບຮອບ 100 ປີ, ເອກະສານມູນເຊື້ອກອງທັບປະຊາຊົນລາວ (20/1/1949–20/1/2024) ຄົບຮອບ 75 ປີ ໃຕ້ການນໍາພາເດັດຂາດໂດຍກົງ ແລະ ຮອບດ້ານຂອງພັກປະຊາຊົນປະຕິວັດລາວ.
(ຂ່າວ-ພາບ: ແດງສະຫວັດ ແສນພານິດ).