ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ພ້ອມຄະນະ ໄດ້ເຄື່ອນໄຫວຕິດຕາມການພັດທະນາເສດຖະກິດ-ສັງຄົມຢູ່ເມືອງພະລານໄຊ ໃນວັນທີ 28 ມີນານີ້. ທ່ານເຈົ້າແຂວງໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມຂອງເມືອງໂດຍຫຍໍ້ ຈາກທ່ານ ຄຳເກິ່ງ ສຸດທິເດດ ເຈົ້າເມືອງພະລານໄຊ ໂດຍທ່ານໃຫ້ຮູ້ວ່າ: ເມືອງພະລານໄຊ ມີຊາຍແດນຕິດຈອດກັບ 5 ເມືອງ, ມີເນື້ອທີ່ປະມານ 204.000 ເຮັກຕາ, ມີ 54 ບ້ານ, ມີ 4 ຈຸດສຸມ, ມີພົນລະເມືອງ 43.188 ຄົນ ຍິງ 21.945 ຄົນ. ດ້ານປ້ອງກັນຊາດ-ປ້ອງກັນຄວາມສະຫງົບ. ໄດ້ສຸມໃສ່ສ້າງບ້ານປ້ອງກັນຊາດເຂັ້ມແຂງໄດ້ 54 ບ້ານ 100%, ສ້າງບ້ານປ້ອງກັນຄວາມສະຫງົບດີໄດ້ 53 ບ້ານ ກວມເອົາ 98,14%, ສ້າງບ້ານປອດຢາເສບຕິດໄດ້ 31 ບ້ານ ກວມເອົາ 57,40% ຂອງບ້ານທັງໝົດ. ດ້ານການຜະລິດເຂົ້າ ທົ່ວເມືອງມີເນື້ອທີ່ນາປີ 10.969 ເຮັກຕາ, ເນື້ອທີ່ນາແຊງ 200 ເຮັກຕາ, ທົ່ວເມືອງຜະລິດເຂົ້າໄດ້ 42.902 ໂຕນ, ສະເລ່ຍເຂົ້າເປືອກໃສ່ຫົວຄົນໄດ້ 928 ກິໂລ/ຄົນ/ປີ. ດ້ານການຈັດເກັບລາຍຮັບເຂົ້າງົບປະມານໃນປີ 2023 ໄດ້ 2,87 ຕື້ກວ່າກີບ. ໃນໂອກາດນີ້, ທ່ານເຈົ້າແຂວງໄດ້ເປີດໂອກາດ ໃຫ້ພະແນກການ ແລະ ກົມກອງ ປະກອບຄຳຄິດເຫັນໃນດ້ານຄວາມຮັບຜິດຊອບໜ້າທີ່ຂອງໃຜລາວ ເປັນຕົ້ນແມ່ນ: ປກສ ແຂວງ, ພະແນກແຜນການ ແລະ ການລົງທຶນ, ພະແນກກະສິກຳ-ປ່າໄມ້, ພະແນກພະລັງງານ-ບໍ່ແຮ່.

ໃນໂອກາດນີ້, ທ່ານເຈົ້າແຂວງ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ການພັດທະນາເສດຖະກິດ-ສັງຄົມພາຍໃນເມືອງພະລານໄຊ ທີ່ເຫັນວ່າມີຫຼາຍດ້ານພົ້ນເດັ່ນ ແລະ ທ່ານຍັງໄດ້ເນັ້ນ ບັນຫາສຳຄັນແມ່ນການສ້າງຂະບວນການກະກຽມໃຫ້ກອງປະຊຸມໃຫຍ່ 3 ຂັ້ນຂອງພັກຕິດພັນກັບການລົງກໍ່ສ້າງຮາກຖານການເມືອງແກ້ໄຂຄວາມທຸກຍາກຂອງປະຊາຊົນ ຊຶ່ງກອງປະຊຸມອົງຄະນະພັກເມືອງພະລານໄຊຈະຈັດຂຶ້ນໃນລະຫວ່າງຕົ້ນປີ 2025, ພ້ອມນັ້ນກໍໃຫ້ປະເມີນທ່າແຮງແຕ່ລະບ້ານ, ສ້າງລະບົບການເມືອງຢູ່ຂັ້ນຮາກຖານໃຫ້ເຂັ້ມແຂງ, ຜັນຂະຫຍາຍມະຕິຂອງອົງຄະນະພັກແຂວງຢ່າງຕັ້ງໜ້າ, ສູ້ຊົນເຮັດໃຫ້ເມືອງພະລານໄຊກາຍເປັນເມືອງພົ້ນທຸກກ່ອນເປີດກອງປະຊຸມໃຫຍ່ອົງຄະນະພັກເມືອງທີ່ຈະມາເຖິິງໃນຕໍ່ໜ້ານີ້.ຈາກນັ້ນ, ທ່ານ ເຈົ້າແຂວງ ພ້ອມຄະນະໄດ້ລົງພົບປະຄະນະພັກ ແລະ ພໍ່ແມ່ປະຊາຊົນຢູ່ກຸ່ມບ້ານນາລາຍ ໂດຍທ່ານເຈົ້າແຂວງໄດ້ຮັບຟັງການສະເໜີຂອງປະຊາຊົນ ແລະ ຄໍາຖາມເຈາະຈີ້ມບັນຫາຕ່າງໆຢ່າງກົງໄປກົງມາ ເພື່ອຫາທາງແກ້ໄຂບັນຫາຄົງຄ້າງໃຫ້ຖືກຈຸດ. ຈາກນັ້ນ ຄະນະນຳຂອງແຂວງກໍ້ໄດ້ລົງຊຸກຍູ້ການຜະລິດຢູ່ບ້ານເທີບນ້ອຍ, ບ້ານ ເທີບໃຫຍ່ຕ່ື່ມອີກ./.

(ຂ່າວ: ສະຫວັນ)