ບ້ານຍານ ເມືອງເລົ່າງາມ ແຂວງສາລະວັນ ໄດ້ຈັດພິທີເປີດການນໍາໃຊ້ຂົວຫ້ວຍເຕນ ບ້ານຍານ ຢ່າງເປັນທາງການ ເມື່ອບໍ່ດົນມານີ້ ໂດຍການເຂົ້າຮ່ວມຂອງທ່ານ ສັງວານ ແສງສາຍ ຮອງເລຂາພັກເມືອງ ປະທານກວດກາ ເມືອງ ທັງແມ່ນຫົວໜ້າຄະນະສະພາປະຊາຊົນແຂວງ ປະຈໍາເຂດເລືອກຕັ້ງເມືອງເລົ່າງາມ, ມີພະນັກງານກໍ່ສ້າງຮາກຖານຂັ້ນແຂວງ, ຕ່າງໜ້າບໍລິສັດ ພ້ອມດ້ວຍອົງການຈັດຕັ້ງບ້ານ ແລະ ພໍ່ແມ່ປະຊາຊົນບ້ານຍານເຂົ້າຮ່ວມ.

ໃນພິທີ, ທ່ານ ຄໍາໃບ ອິດທິພົນພານິດ ຮອງປະທານກວດກາເມືອງ ຫົວໜ້າເຂດ 11 ໄດ້ຂຶນຜ່ານບົດລາຍງານການກໍ່ສ້າງຂົວເບຕົງຂ້າມຫ້ວຍເຕນ ແລະ ສ້າງທາງຄອນກີດເຂົ້າ ບ້ານຍານ ໂດຍແມ່ນການລະດົມທຶນນໍາພໍ່-ແມ່ປະຊາຊົນພາຍໃນບ້ານຍານ, ນໍາບຸກຄົນ ແລະ ບໍລິສັດ ທີ່ໄດ້ປະກອບສ່ວນເປັນວັດຖຸ, ເງິນ, ເຫື່ອແຮງ.

ການກໍ່ສ້າງຂົວເບຕົງຂ້າມຫ້ວຍເຕນ ແລະ ສ້າງທາງຄອນກີດເຂົ້າບ້ານຍານ ໄດ້ເລີ່ມລົງມືກໍ່ສ້າງ ມາແຕ່ວັນທີ 21 ກຸມພາ 2024 – 8 ມີນາ 2024 ຈິ່ງສໍາເລັດ ລວມມູນຄ່າທັງໝົດ 300 ລ້ານກີບ, ການກໍ່ສ້າງຂົວເບຕົງເສີ່ມເຫຼັກມີຄວາມຍາວ 5 ແມັດ, ກວ້າງ 3,20 ແມັດ, ມີຄວາມສູງ 3 ແມັດ, ສາມາດຮັບນໍ້າໜັກໄດ້ 15-20 ໂຕນ, ແລະ ເທທາງຄອນກີດເຂົ້າບ້ານມີຄວາມ ຍາວ 100 ແມັດ, ໂດຍແມ່ນ ທ່ານ ແຫຼ້ ຈັນທະວົງ ເປັນຜູ້ຮັບເໝົາກໍ່ສ້າງທົ່ວໄປ. ຈາກນັ້ນ, ທ່ານ ບຸນເພັງ ເລຂາພັກ-ນາຍບ້ານໆຍານ ໄດ້ກ່າວສະແດງຄວາມດີໃຈ ແລະ ຍ້ອງຍໍຊົມເຊີຍ, ບໍລິສັດນິຄົມ 2, ນິຄົມ 4 ການຈັດຕັ້ງ ແລະ ພໍ່ແມ່ປະຊາຊົນທີ່ໄດ້ປະກອບສ່ວນທືນຮອນ, ອອກແຮງ ສາມະຄີກັນໃນການກໍ່ສ້າງຂົວ ແລະ ເທທາງຄອນກີດເຂົ້າບ້ານຈື່ງມີຜົນສໍາເລັດ.

(ຂ່າວ: ພອນໄຊ ແກ້ວມະນີ)