ໃນວັນທີ່ 26 ມີນາ 2024ນີ້ ຫ້ອງການແຮງງານ ແລະ ສະຫວັດດີການສັງຄົມ ເມືອງແບງ ແຂວງອຸດົມໄຊ ສົມທົບກັບ ການນໍາເມືອງ ໄດ້ນໍາເອົາເຄື່ອງນຸ່ງຫົ່ມ, ເຄື່ອງໃຊ້ຈໍານວນໜຶ່ງ ໄປຊ່ວຍເຫຼືອໃຫ້ແກ່ຄອບຄົວທີ່ປະສົບເຄາະຮ້າຍຈາກເຫດການໄຟໄໝ້ເຮືອນ (ອັກຄີໄພ) 2 ຫຼັງ ມີ 5 ຄອບຄົວ ຢູ່ບ້ານມົກວຽງ ເມື່ອບໍ່ດົນມານີ້, ນໍາໂດຍທ່ານ ຄໍາພອນ ພີມມະລາດ ຮອງເລຂາພັກເມືອງ ປະທານກວດກາພັກ-ລັດເມືອງແບງ ມີບັນດາອໍານາດການປົກຄອງບ້ານ ແລະ ຄອບຄົວຜູ້ທີ່ຖືກຜົນກະທົບເຂົ້າຮ່ວມ.

ເຄື່ອງທີ່ນຳມາມອບໃນຄັ້ງນີ້, ປະກອບມີ ສັງກະສີ 100 ແຜ່ນ, ເຫຼັກຕະປູ 20 ກິໂລ, ຜ້າເສື້ອ, ຜ້າຫົ່ມ, ແລະ ເຄື່ອງນຸ່ງຫົ່ມ, ເຄື່ອງໃຊ້ຄົວເຮືອນອື່ນໆ ລວມມູນຄ່າທັງໝົດ 11 ລ້ານກວ່າກີບ ໃຫ້ຄອບຄົວທີຖືກອັກຄີໄພ (ໄຟໄໝ້ເຮືອນ) ໃນວັນທີ 24 ມີນາ 2024 ເວລາປະມານ 14 ໂມງ ໂດຍບໍຮູ້ສາເຫດ ຊຶ່ງຄອບຄົວດັ່ງກ່າວບໍໄດ້ຢູ່ເຮືອນ ເຫດການເກີດຂຶ້ນຢ່າງໄວວາ ພໍ່ແມ່ປະຊາຊົນທີ່ເຫັນເຫດການໄດ້ພ້ອມກັນສະກັດກັ້ນ ເເຕ່ບໍສາມາດດັບໄຟໄດ້ ເນື່ອງຈາກໄຟລຸກລາມແຮງ ບວກກັບສະພາບອາກາດຮ້ອນເອົ້າ ພ້ອມທັງມີລົມພັດແຮງ ຈຶ່ງເຮັດໃຫ້ເກີດມີຜົນກະທົບ ແລະ ເສຍຫາຍທັງໝົດ 5 ຄອບຄົວ, ເຮືອນ 2 ຫຼັງ, ເລົ້າເຂົ້າ 3 ຫຼັງ, ໂຮງສີເຂົ້າ 1 ເຄື່ອງ ແລະ ເຄື່ອງໃຊ້ໃນຄົວເຮືອນ ລວມມູນຄ່າການເສຍຫາຍ 425.900.000 ກີບ.

(ຂ່າວ: ຖວທ ເມືອງແບ່ງ)