ວັນທີ 28 ມີນາຜ່ານມາ ຢູ່ທີ່ສະໂມສອນແຂວງຫຼວງນໍ້າທາ ໄດ້ຈັດກອງປະຊູມແລກປ່ຽນ ແລະ ຖອດຖອນບົດຮຽນ ວຽກງານແຜນການ ແລະ ການລົງທືນ 10 ແຂວງພາກເໜືອ, ໃຫ້ກຽດເຂົ້າຮ່ວມຂອງທ່ານ ວຽງສະຫວັດ ສີພັນດອນ ເຈົ້າແຂວງຫຼວງນ້ຳທາ, ທ່ານ ອຸຕະແກ້ວ ແກ້ວດວງສີນ ຫົວໜ້າຫ້ອງການ ກະຊວງແຜນການ ແລະ ການລົງທືນ, ມີຫົວໜ້າພະແນກ, ຮອງຫົວໜ້າພະແນກແຜນການຈາກແຂວງ ຫຼວງນໍ້າທາ, ວຽງຈັນ, ຊຽງຂວາງ, ໄຊສົມບູນ, ຫຼວງພະບາງ, ອຸດົມໄຊ, ໄຊຍະບູລີ, ຫົວພັນ, ຜົ້ງສາລີ ແລະ ແຂວງບໍ່ແກ້ວ ຕະຫຼອດຮອດພະນັກງານວິຊາການກ່ຽວຂ້ອງເຂົ້າຮ່ວມ.

ທ່ານ ວົງມະນີ ເພື່ອປະຊາ ຫົວໜ້າພະແນກແຜນການ ແລະ ການລົງທືນ ແຂວງຫຼວງນໍ້າທາ ໄດ້ຜ່ານຮ່າງບົດສະຫຼູບການຈັດຕັ້ງປະຕິບັດ ວຽກງານແຜນການ ແລະ ການລົງທືນ ປີ 2023 ຂອງ 10 ແຂວງ ພາກເໜືອ ພະແນກແຜນການ ແລະ ການລົງທຶນຂອງບັນດາແຂວງພາກເໜືອ ໄດ້ມີການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX (2021-2025), ແຜນວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດ ໂດຍປະຕິບັດ ພາລະບົດບາດໃນການຄົ້ນຄວ້າ, ວາງແຜນ, ຈັດຕັ້ງ ແລະ ຄຸ້ມຄອງວຽກງານ ແຜນການ ແລະ ການລົງທຶນ ດ້ວຍຄວາມຮັບຜິດຊອບສູງ, ມີຜົນສຳເລັດຕາມລະດັບຄາດໝາຍ ແລະ ຕາມແຜນຍຸດທະສາດຂອງກະຊວງ ແຜນການ ແລະ ການລົງທືນ ກໍານົດໄວ້ຄື (ສ້າງການຫັນປ່ຽນໃໝ່ວຽກງານແຜນການ ແລະ ການລົງທຶນໃນເງື່ອນໄຂໃໝ່ຢ່າງແຂງແຮງ ແລະ ເລິກເຊິ່ງ). ຂະແໜງການແຜນການ ແລະ ການລົງທຶນ 10 ແຂວງ ລວມມີພະນັກງານລັດຖະກອນຂັ້ນແຂວງ 424 ທ່ານ, ຂັ້ນເມືອງ 455 ທ່ານ. ໄດ້ສຳເລັດການສະຫຼຸບແຜນພັດທະນາເສດຖະກິດ-ສັງຄົມປະຈຳປີ 2023 ແລະ ຄາດຄະເນແຜນການປີ 2024, ສະຫຼູບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກາງສະໄໝ ຂອງແຜນພັດທະນາ ເສດຖະກິດ-ສັງຄົມ 5 ປີ ຂອງແຕ່ລະແຂວງ, ສໍາເລັດການສ້າງຄໍາແນະນຳກ່ຽວກັບການສ້າງແຜນພັດທະນາ ເສດຖະກິດ - ສັງຄົມ ແລະ ແຜນລົງທຶນຂອງລັດ ປະຈຳປີ 2024, ໄດ້ຊຸກຍູ້ພະແນກການຂອງແຂວງ ແລະ ເມືອງ ໃນການສ້າງແຜນພັດທະນາເສດຖະກິດ-ສັງຄົມ ປະຈຳປີ ແລະ ກະກຽມສ້າງແຜນ 5 ປີ ເປັນປົກກະຕິ, ສັງລວມການອະນຸຍາດການລົງທຶນ ສໍາລັບ 10 ແຂວງພາກເໜືອ ເຫັນວ່າ ສາມາດອະນຸຍາດການລົງທຶນຂອງເອກະຊົນພາຍໃນ ແລະ ຕ່າງປະເທດ ທີ່ສະເໜີໃໝ່ໃນປີ 2023 ໄດ້ທັງໝົດ 220 ໂຄງການ, ມູນຄ່າການລົງທຶນທັງໝົດ 753 ລ້ານໂດລາສະຫະລັດ, ທຶນຈົດທະບຽນ 390 ລ້ານໂດລາສະຫະລັດ. ການລົງທຶນແມ່ນກວມເອົາຂົງເຂດວຽກງານ ເຊັ່ນ: ການຂຸດຄົ້ນແຮ່ທາດ, ແຮ່ອຸດສາຫະກໍາກໍ່ສ້າງ, ພະລັງງານ, ການຜະລິດກະສິກໍາ, ອຸດສາຫະກໍາປຸງແຕ່ງ, ການບໍລິການ, ການທ່ອງທ່ຽວ ແລະ ການຮ່ວມມືສາກົນ ບັນດາແຂວງ ແມ່ນໄດ້ຈັດຕັ້ງປະຕິບັດຢ່າງເປັນປົກກະຕິ. ໃນນີ້ ມີຫຼາຍໂຄງການ,ການຮ່ວມມືລາວ-ຫວຽດນາມ, ລາວ-ຈີນ ແລະ ການຮ່ວມມືກັບບັນດາປະເທດເພື່ອນມິດຕ່າງໆ, ສັງລວມການຊ່ວຍເຫຼືອສໍາລັບ 10 ແຂວງ ແມ່ນມີຫຼາຍຮ້ອຍລ້ານໂດລາສະຫະລັດ .

ສໍາຫຼັບທິດທາງແຜນການ ປີ 2024 ຈະໄດ້ສືບຕໍ່ຈັດຕັ້ງປະຕິບັດແຜນການເຄື່ອນໄຫວວຽກງານແຜນການ ແລະ ການລົງທຶນຂອງບັນດາແຂວງ ໃຫ້ບັນລຸໄດ້ຕາມຄາດໝາຍທີ່ວາງໄວ້, ສະມາຊິກພັກ-ພະນັກງານ ທຸກຄົນຈະຕ້ອງໄດ້ສູ້ຊົນ ແລະ ພ້ອມກັນຕັ້ງໜ້າປະຕິບັດວຽກງານຕາມພາລະບົດບາດ, ໜ້າທີ່ຄວາມຮັບຜິດຊອບຢ່າງແຂງແຮງ ເພື່ອເຮັດສຳເລັດໜ້າທີ່ວຽກງານໃນແຕ່ລະດ້ານ ໃຫ້ບັນລຸຜົນສໍາເລັດຕາມລະດັບຄາດໝາຍທີ່ວາງໄວ້. ພ້ອມນີ້ແຕ່ລະແຂວງໄດ້ພ້ອມກັນລາຍງານການຈັດຕັ້ງປະຕິບັດວຽກງານແຜນການ ແລະ ການລົງທືນຂອງຕົນ ພ້ອມທັງປະກອບຄຳຄິດຫັນຢ່າງກົງໄປກົງມາ. ໂອກາດນີ້, ກໍໄດ້ເຊັນບົດບັນທືກມອບ - ຮັບການເປັນເຈົ້າພາບຈັດກອງປະຊູມ ວຽກງານແຜນການ ແລະ ການລົງທືນຄັ້ງທີ່ 11 ໃຫ້ແຂວງຊຽງຂວາງ.

(ຂ່າວ: ອຸ້ມ ສົມນໍວັນ)