ທ່ານ ແສງອາທິດ ລາວເບຼຍຢາທໍ່ ວ່າການເຈົ້າເມືອງເມືອງຊຽງຮ່ອນ ໄດ້ຮັບທຶນສະໜັບສະໜູນການສ້ອມແປງທາງຂຶ້ນພູ ບ້ານດອກເກດ ເມືອງເງິນ ຫາ ເມືອງຊຽງຮ່ອນ ແຂວງໄຊຍະບູລີ ຈາກທ່ານ ຢິນແສເສີງ ປະທານບໍລິສັດ ລາວຈູນທົ່ງຢາງພາລາ ຈຳກັດ. ພິທີດັ່ງກ່າວ, ໄດ້ຈັດຂຶ້ນເມື່ອບໍ່ດົນມານີ້ ຢູ່ທີ່ຫ້ອງວ່າການເມືອງຊຽງຮ່ອນ.
ການສ້ອມແປງທາງຂຶ້ນພູ ບ້ານດອກເກດ ເມືອງເງິນ ຫາ ເມືອງຊຽງຮ່ອນ ມີໄລຍະທາງຍາວ 100 ແມັດ, ລວງກ້ວງ 8 ແມັດ ລວມມູນຄ່າການກໍ່ສ້າງທັງໝົດ 50 ລ້ານກີບ. ໂອກາດດັ່ງກ່າວ, ທ່ານ ແສງອາທິດ ລາວເບຼຍຢາທໍ່ ຍັງໄດ້ສະແດງຄວາມຂອບໃຈຕໍ່ບໍລິສັດ ລາວຈູນທົ່ງຢາງພາລາ ຈຳກັດ ທີ່ໄດ້ນໍາເອົາຄວາມເປັນຫ່ວງເປັນໄຍ ແລະ ມອບທຶນໃຫ້ອົງການປົກຄອງເມືອງນໍາໃຊ້ເຂົ້າໃນການປັບປຸງເສັ້ນທາງດັ່ງກ່າວ ແລະ ທ່ານຍັງໄດ້ໃຫ້ສັນຍາວ່າຈະນຳໃຊ້ທຶນດັ່ງກ່າວເຂົ້າການກໍ່ສ້າງເສັ້ນທາງໃຫ້ສໍາເລັດ ແລະ ເຮັດໃຫ້ການສັນຈອນໄປມາສະດວກຂຶ້ນ.
(ຂ່າວ: ດອນ ຂຽວພະນາ)