ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 2 ເມສາ ຜ່ານມາຢູ່ຮ່າໂນ້ຍ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ເປັນປະທານກອງປະຊຸມນາຍົກລັດຖະມົນຕີກັບບັນດາອົງການຜູ້ຕາງໜ້າຂອງຫວຽດນາມ ຢູ່ຕ່າງປະເທດ ກ່ຽວກັບການຊຸກຍູ້ວຽກງານການທູດເສດຖະກິດ ຮັບໃຊ້ການພັດທະນາໃນປີນີ້ ແລະ ໃນອະນາຄົດ.
ຂ່າວລະບຸວ່າ: ກ່າວຄຳເຫັນໃນກອງປະຊຸມ, ທ່ານ ຟ້າມມິງຈິງ ໃຫ້ຮູ້ວ່າ: ໃນສະພາບການປັດຈຸບັນ, ຄວາມຮຽກຮ້ອງຕ້ອງການທີ່ວາງອອກແມ່ນພັດທະນາຢ່າງວ່ອງໄວ ແລະ ຍືນຍົງ; ພັດທະນາຢ່າງກົມກຽວລະຫວ່າງເສດຖະກິດ, ສັງຄົມ, ວັດທະນະທຳ ແລະ ສິ່ງແວດລ້ອມ; ເສີມຂະຫຍາຍກຳລັງບົ່ມຊ້ອນຂອງປະເທດຊາດໃນລະດັບສູງສຸດເພື່ອພັດທະນາ.
ທ່ານ ຟ້າມມິງຈິງ ຮຽກຮ້ອງໃຫ້ບັນດາອົງການຜູ້ຕາງໜ້າຫວຽດນາມຢູ່ຕ່າງປະເທດສືບຕໍ່ກຳແໜ້ນສະພາບການຂອງໂລກ ແລະ ພາກພື້ນ, ປັບປຸງຕະຫຼາດທີ່ມີຢູ່ແລ້ວ, ເປີດກວ້າງຕະຫຼາດໃໝ່; ເພີ່ມທະວີການສົມທົບຢູ່ພາຍໃນ ແລະ ຕ່າງປະເທດ, ລະຫວ່າງກະຊວງ, ຂະແໜງການ, ລະຫວ່າງວິສາຫະກິດ - ລັດ - ປະຊາຊົນ. ກ່ຽວກັບບັນດາກະຊວງ, ຂະແໜງການ ແລະ ວິສາຫະກິດ, ທ່ານຍັງໄດ້ເນັ້ນໜັກວ່າ: ຕ້ອງເປັນເຈົ້າການພັດທະນາເຄື່ອງໝາຍການຄ້າ, ການສົ່ງອອກແບບຍືນຍົງ, ດັດປັບໃຫ້ແທດເໝາະກັບສະພາບການ, ຍົກສູງປະສິດທິຜົນແຫຼ່ງກຳລັງຂອງປະເທດໃນວຽກງານນຳເຂົ້າ ແລະ ສົ່ງອອກ.