ກະຊວງຊັບພະຍາກອນທຳມະຊາດແລະສິ່ງແວດລ້ອມ (ກຊສ)ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານແລະວຽກງານປັບປຸງກົງຈັກການຈັດຕັ້ງປະຈໍາປີ 2023ແລະ ກໍານົດທິດທາງແຜນການປີ 2024 ຕິດພັນກັບຜັນຂະຫຍາຍວຽກງານກໍ່ສ້າງພັກ-ພະນັກງານແລະປັບປຸງກົງຈັກການຈັດຕັ້ງທົ່ວປະເທດປະຈຳປີ 2023. ໃນວັນທີ4ເມສານີ້ ຢູ່ຫ້ອງປະຊຸມໃຫຍ່ຂອງ ກຊສ, ພາຍໃຕ້ການເປັນປະທານຂອງທ່ານ ໄຊນະຄອນ ອິນທະວົງ ຮອງເລຂາຄະນະພັກປະທານກວດກາພັກ ຮອງລັດຖະມົນຕີກຊສ, ມີຄະນະປະຈຳພັກ, ຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກ, ຫົວໜ້າກົມ, ຮອງຫົວໜ້າກົມ, ສະມາຊິກພັກ, ພະນັກງານ-ລັດຖະກອນ ເຂົ້າຮ່ວມ.
ຈຸດປະສົງກອງປະຊຸມ ເພື່ອສະຫຼຸບຕີລາການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ຂອງກຊສໃນໄລຍະ 1ປີຜ່ານມາ (2023)ແລະທິດທາງແຜນການ 1 ປີຕໍ່ໜ້າ (2024) ໄປພ້ອມກັບການເຜີຍແຜ່, ເຊື່ອມຊຶມເນື້ອໃນກອງປະຊຸມວຽກງານກໍ່ສ້າງພັກ-ພະນັກງານແລະປັບປຸງກົງຈັກການຈັດຕັ້ງທົ່ວປະເທດປະຈຳປີ 2023ໃຫ້ແກ່ຄະນະພັກ, ສະມາຊິກພັກ,ພະນັກງານ-ລັດຖະກອນພາຍໃນກະຊວງເພື່ອສ້າງຄວາມຮັບຮູ້, ເຂົ້າໃຈຢ່າງເລິກເຊິ່ງທັງສ້າງຄວາມເອກະພາບທາງດ້ານທັດສະນະຕໍ່ເນື້ອໃນວຽກງານກໍ່ສ້າງພັກ-ພະນັກງານ, ການປັບປຸງກົງຈັກການຈັ້ດຕັ້ງທົ່ວປະເທດຊຶ່ງເນື້ອໃນເອກະສານທີ່ໄດ້ນໍາສະເໜີ ແລະ ເຜີຍແຜ່ມີຄື:ສະເໜີບົດສະຫຼຸບຫຍໍ້ວຽກງານກໍ່ສ້າງພັກ-ພະນັກງານ ແລະປັບປຸງກົງຈັກການຈັດຕັ້ງປະຈຳປີ 2023ແລະ ທິດທາງແຜນການ ປີ 2024ຂອງກຊສ, ເຜີຍແຜ່ເຊື່ອມຊຶມບາງເນື້ອໃນທີ່ສໍາຄັນຕາມບົດສະຫຼຸບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານແລະປັບປຸງກົງຈັກການຈັດຕັ້ງທົ່ວປະເທດປະຈຳປີ 2023ແລະທິດທາງໜ້າທີ່ປີ 2024, ເຊື່ອມຊຶມ ບົດໂອ້ລົມ ຂອງ ສະຫາຍບຸນທອງ ຈິດມະນີກຳມະການກົມການເມືອງສູນກາງພັກຜູ້ປະຈໍາການເລຂາທິການສູນກາງພັກຮອງປະທານປະເທດ ຕໍ່ກອງປະຊຸມສະຫຼຸບວຽກງານກໍ່ສ້າງພັກ-ພະນັກງານແລະປັບປຸງກົງຈັກການຈັດຕັ້ງທົ່ວປະເທດປະຈໍາປີ2023ບາງເນື້ອໃນ, ເຊື່ອມຊຶມ ຄໍາແນະນໍາ ຂອງຄະນະຈັດຕັ້ງສູນກາງພັກ ເລກທີ 13/ຄຈສພ,ລົງວັນທີ11 ມັງກອນ2024, ເຊື່ອມຊຶມຄຳແນະນຳຂອງຄະນະຈັດຕັ້ງສູນກາງພັກເລກທີ14/ຄຈສພ, ລົງວັນທີ11 ມັງກອນ 2024.
ທ່ານ ນາງ ທອງຈັນ ອະຄະມະເຂດ ຄະນະປະຈໍາພັກກະຊວງ ຫົວໜ້າກົມຈັດຕັ້ງ -ຄຸ້ມຄອງພະນັກງານ ໄດ້ຂຶ້ນສະຫຼຸບລາຍງານໂດຍຫຍໍ້ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ,ຂໍ້ຂາດຕົກບົກຜ່ອງ,ບົດຮຽນທີ່ຖອດຖອນໄດ້ ແລະ ທິດທາງໃນຕໍ່ໜ້າຊຶ່ງສະແດງອອກຄື: ໄດ້ດໍາເນີນກອງປະຊຸມຄະນະປະຈຳພັກ9ຄັ້ງ, ຮັບສ່ອງແສງວຽກພັກຈາກບັນດາຮາກຖານພັກໃນແຕ່ລະເດືອນ, ດໍາເນີນກອງປະຊຸມຄົບຄະນະ4ຄັ້ງໃນນີ້ເປີດກວ້າງ2ຄັ້ງ, ອັນທີ່ພົ້ນເດັ່ນແມ່ນໄດ້ຊີ້ນໍາບັນດາຮາກຖານພັກດໍາເນີນກອງປະຊຸມກາງສະໄໝໄປພ້ອມກັບການນໍາພາກອງປະຊຸມກາງສະໄໝຂອງອົງຄະນະພັກກະຊວງສໍາເລັດຕາມກຳນົດເວລາ, ໄດ້ສືບຕໍ່ນໍາເອົານິຕິກຳຂອງຂັ້ນເທິງມາຈັດຕັ້ງເຜີຍແຜ່, ຜັນຂະຫຍາຍເພື່ອໃຫ້ພະນັກງານພາຍໃນກະຊວງໄດ້ຮັບຮູ້ເຖິງວຽກງານພະນັກງານໃນໄລຍະໃໝ່ໂດຍສະເພາະມະຕິຂອງຄະນະບໍລິຫານງານສູນກາງພັກວ່າດ້ວຍການເພີ່ມທະວິນໍາພາຂອງພັກເພື່ອສ້າງການຫັນປ່ຽນຢ່າງແຂງແຮງແລະເລິກເຊິ່ງ, 

ໂດຍອີງໃສ່ແຜນການກຳນົດພະນັກງານນໍາພາ-ຄຸ້ມຄອງທັງ2ແຜນ, ແຜນການກໍ່ສ້າງປະຈຳປີຊຶ່ງໄດ້ມີການສົ່ງພະນັກງານນໍາພາ, ພະນັກງານຫຼັກແຫຼ່ງໄປບຳລຸງທິດສະດີການເມືອງໄລຍະສັ້ນ, ລະບົບຊັ້ນກາງ6ເດືອນ, ລະບົບຊັ້ນສູງ9ເດືອນ, ຄົ້ນຄວ້າທິດສະດີການເມືອງລະດັບປະລິນຍາໂທ, ຍົກລະດັບທາງດ້ານວິຊາສະເພາະໄດ້ຈໍານວນ20ສະຫາຍຍິງ3ສະຫາຍ, ຢູ່ຕ່າງປະເທດມີ4ສະຫາຍຍິງ1ສະຫາຍ, ຢູ່ພາຍໃນປະເທດມີ16ສະຫາຍຍິງ2ສະຫາຍ. ໃນນັ້ນຂັ້ນປະລິນຍາເອກມີ3ສະຫາຍຍິງ1ສະຫາຍ, ປະລິນຍາໂທມີ6ສະຫາຍ, ປະລິນຍາຕີມີ11ສະຫາຍຍິງ1ສະຫາຍ; ຮັບເອົາພະນັກງານທີ່ຮຽນຈົບກັບຄືນກົມກອງຈໍານວນ9ສະຫາຍຍິງ3ສະຫາຍຈົບຈາກຕ່າງປະເທດມີ6ສະຫາຍ (ຍິງ2ສະຫາຍ), ຈົບພາຍໃນປະເທດມີ3ສະຫາຍ (ຍິງ1ສະຫາຍ), ໄດ້ແຕ່ງຕັ້ງ, ສັບຊ້ອນ, ນໍາໃຊ້ພະນັກງານແລະກົນໄກປະສານງານສາຍຕັ້ງ-ສາຍຂວາງ.ນອກນີ້ກໍໄດ້ມີການຍ້ອງຍໍ-ຊົມເຊີຍຕໍ່ຜູ້ທີ່ມີຜົນງານ, ຫ້າວຫັນໃນການປະຕິບັດວຽກງານມີຜົນສໍາເລັດ.
ໃນວາລະທ້າຍຂອງກອງປະຊຸມຍັງໄດ້ມີການເຜີຍແຜ່ເຊື່ອມຊຶມເອກະສານອົບຮົມການເມືອງ-ແນວຄິດສໍາລັບສະມາຊິກພັກ, ພະນັກງານຫຼັກແຫຼ່ງເພື່ອດໍາເນີນກອງປະຊຸມໃຫຍ່ 3 ຂັ້ນຂອງພັກ. ສຸດທ້າຍສະຫາຍໄຊນະຄອນ ອິນທະວົງກໍໄດ້ໃຫ້ທິດຊີ້ນຳຕໍ່ຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກໃຫ້ສືບຕໍ່ນໍາເອົາຜົນຂອງກອງປະຊຸມວຽກງານທີ່ສຳຄັນໃນຄັ້ງນີ້ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງໃນຄວາມຮັບຜິດຊອບຂອງຮາກຖານພັກຕົນ ເພື່ອເຮັດໃຫ້ບັນດາສະມາຊິກພັກເຂົ້າໃຈແລະມີການຫັນປ່ຽນຢ່າງແຂງແຮງແລະເລິກເຊິ່ງຂຶ້ນກວ່າເກົ່າ.
(ຂ່າວ-ພາບ: ແສງຈັນ)