ໃນວັນທີ 8 ເມສາຜ່ານມາ, ທີ່ຫ້ອງການແຮງງານ ແລະ ສະຫວັດດີການສັງຄົມ (ຮສສ) ເມືອງອຸທຸມພອນ ແຂວງສະຫວັນນະເຂດ ໄດ້ຈັດພິທີມອບສັງກະສີ ແລະ ເຫຼັກຕະປູ ໃຫ້ແກ່ປະຊາຊົນ 7 ບ້ານ ມີ 14 ຄອບຄົວ. ໃນນີ້, ບ້ານທີ່ໄດ້ຮັບຜົນກະທົບຈາກອັກຄີໄພ (ໄຟໄໝ້ເຮືອນ) ມີບ້ານໂພນໝາກຫຍ້າ ມີ 1 ຄອບຄົວ,ບ້ານອາຮົງໃຫຍ່ ມີ 1 ຄອບຄົວ ແລະ ບ້ານທີ່ໄດ້ຮັບຜົນກະທົບຈາກລົມພະຍຸພັດເສຍຫາຍ ມີບ້ານໂຄກປ່າຫວາຍ ມີຈໍານວນ 7 ຄອບຄົວ, ໂນນສະຫວ່າງ ມີ 2 ຄອບຄົວ, ແມດ ມີ1 ຄອບຄົວ ແລະ ບ້ານກີບມ້າ ມີ 2 ຄອບຄົວ ທີ່ໄດ້ຮັບຜົນກະທົບຈາກລົມພະຍຸພັດເສຍຫາຍ ແລະ ເກີດອັກຄີໄພ (ໄຟໄໝ້ເຮືອນ) ຕັ້ງແຕ່ ປີ 2023 ທີ່ຜ່ານມາ. ໃຫ້ກຽດກ່າວມອບໂດຍແມ່ນທ່ານ ພັນໂທ ໄພລົມ ໂນດນາໂພ ຫົວໜ້າກອງບັນຊາການທະຫານເມືອງ, ມີພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານນຳ
    ສັງກະສີທີ່ນໍາມາມອບຄັ້ງນີ້, ແມ່ນມອບໃຫ້ຄອບຄົວລະ 40 ຫາ 60 ແຜ່ນ, ເຫຼັກຕະປູຄອບຄົວລະ 15 ຫາ 20 ກິໂລ, ອີງໃສ່ຄວາມເສຍຫາຍໜ້ອຍຫຼາຍຂອງແຕ່ລະຄອບຄົວ, ໂດຍເຄື່ອງດັ່ງກ່າວແມ່ນໄດ້ມາຈາກກອງທຶນສັງຄົມສົງເຄາະແຂວງ ມອບໃຫ້ຜູ້ທີ່ປະສົບກັບລົມພະຍຸພັດ ແລະ ເກີດອັກຄີໄພ ໂດຍຜ່ານຫ້ອງການແຮງງານ-ສະຫວັດດີການສັງຄົມເມືອງ.
    (ຂ່າວ: ບຸນຊູ ພົມມະເທບ)