ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ ພ້ອມຄະນະໄດ້ເຄື່ອນໄຫວເຮັດວຽກຢູ່ແຂວງວຽງຈັນໃນວັນທີ 4 ເມສາຜ່ານມາ ທີ່ພະແນກ ຖວທ ແຂວງ. ໂອກາດດັ່ງກ່າວໄດ້ພົບປະແລກປ່ຽນວຽກງານຂ່າວໂດຍເປັນກຽດຕ້ອນຮັບຂອງທ່ານ ສີສະຫວາດ ແສງພະຈັນ ຫົວໜ້າພະແນກ ຖວທ ແຂວງ ພ້ອມດ້ວຍຄະນະ, ມີບັນດາຂະແໜງການກ່ຽວຂ້ອງເຂົ້າຮ່ວມ.
      ໂອກາດນີ້, ທ່ານ ວັນໄຊ ຕະວິນຍານ ກ່າວວ່າ: ການລົງເຄື່ອນໄຫວຄັ້ງນີ້, ເພື່ອຍົກລະດັບວຽກງານຂ່າວອີກບາດກ້າວໜຶ່ງ ຊຶ່ງເປັນວຽກງານທີ່ມີຄວາມສຳຄັນທີ່ສຸດ ໃນການເປັນກະບອກສຽງອັນແຫຼມຄົມໃຫ້ແກ່ພັກເຮົາ ໃນການເຜີຍແຜ່ໂຄສະນາເພື່ອໃຫ້ປວງຊົນລາວໄດ້ຮັບຮູ້ທາງດ້ານວຽກງານຕ່າງໆ ຊຶ່ງເປັນວຽກທີ່ມີຄວາມສຳຄັນທີ່ຄະນະພັກແຕ່ລະຂັ້ນໃຫ້ຄວາມເອົາໃຈໃສ່. ດັ່ງນັ້ນ, ການເຮັດວຽກງານຂ່າວຕ້ອງໃຫ້ມີຄວາມຖືກຕ້ອງ, ວ່ອງໄວ, ທັນເຫດການ ມີຄວາມຊັດເຈນທາງດ້ານເນື້ອໃນ ພ້ອມນີ້ທ່ານຍັງໄດ້ເນັ້ນໃຫ້ບັນດານັກຂ່າວແຂວງ ເອົາໃຈໃສ່ໃນການປະສານສົມທົບກັບບັນດານັກຂ່າວຈາກສູນກາງ ກໍຄືບັນດາສຳນັກຂ່າວຕ່າງໆໃນທົ່ວປະເທດ ເພື່ອເປັນບ່ອນກະຈາຍຂ່າວໃຫ້ແກ່ການນຳຂອງແຂວງ ກໍຄືການນຳເອົາຜົນງານອັນພົ້ນເດັ່ນຂອງບັນດາຄະນະນຳແຂວງອອກສູ່ສັງຄົມລາວໄດ້ຮັບຮູ້ຢ່າງກວ້າງຂວາງ. ພ້ອມເນັ້ນໃຫ້ນັກຂ່າວຮູ້ເຖິງກົນອຸບາຍບໍ່ດີຂອງກຸ່ມຄົນທີ່ຫວັງມ້າງເພປະເທດຊາດ ໃນການໂຄສະນາບິດເບືອນໃສ່ຮ້າຍປ້າຍສີໃນບັນດາຂ່າວອອນລາຍ ເພື່ອໃຫ້ພ້ອມກັນຕ້ານປະກົດການດັ່ງກ່າວໃຫ້ໝົດໄປ.
ຂ່າວ-ພາບ: ບຸນອູ້ມ