ແຂວງໄຊຍະບູລີ ໄດ້ຈັດພິທີສອບເສັງຄັດເລືອກເອົາພະນັກງານລັດຖະກອນຢູ່ຂົງເຂດການເມືອງ ຂຶ້ນໃນວັນທີ 9 ເມສານີ້ ທີ່ສະໂມສອນຫ້ອງວ່າການແຂວງ, ເຂົ້າຮ່ວມເປັນກຽດມີທ່ານ ເພັດພິໄຊ ສູນວິໄລ ກໍາມະການປະຈໍາພັກແຂວງ ຮອງເຈົ້າແຂວງ, ມີຕາງໜ້າແຕ່ລະພາກສ່ວນເຂົ້າຮ່ວມ.
    ໃນພິທີ, ທ່ານ ຮອງເຈົ້າແຂວງ ໄດ້ກ່າວວ່າ: ການສອບເສັງຄັດເລືອກບັນຈຸລັດຖະກອນໃໝ່ຄັ້ງນີ້ ເພື່ອເປັນການຄັດເລືອກເອົາບຸກຄະລາກອນທີ່ມີຄວາມຮູ້, ຄວາມສາມາດເຂົ້າໃນການປະກອບສ່ວນນໍາພັກ-ລັດ, ເວົ້າລວມ, ເວົ້າສະເພາະກໍ່ຄືໃຫ້ໄດ້ປະກອບສ່ວນເຂົ້າໃນກົງຈັກຊ່ວຍວຽກຂັ້ນແຂວງໃຫ້ມີປະສິດທິພາບ ແລະ ໝາກຜົນສໍາເລັດທີ່ການຈັດຕັ້ງມອບໝາຍໃຫ້ ພ້ອມທັງຮຽກຮ້ອງມາຍັງຄະນະກໍາມະການ ແລະ ນັກສອບເສັງທັງໝົດຈົ່ງພ້ອມກັນເອົາໃຈໃສ່ປະຕິບັດຕາມລະບຽບການທີ່ກໍານົດໄວ້ເປັນຕົ້ນແມ່ນ: ຫ້າມຄະນະກໍາມະການເປີດເຜີຍຂໍ້ສອບກ່ອນການສອບເສັງ, ຫ້າມສະແດງການກະທໍາທີ່ບໍ່ເໝາະສົມທີ່ເປັນການລົບກວນຕໍ່ນັກສອບເສັງ, ຫ້າມນັກສອບເສັງໃຊ້ສຽງດັງ ຫຼື ສົນທະນາກັນເວລາສອບເສັງ ແລະ ຫ້າມນັກສອບເສັງນໍາໃຊ້ເຄື່ອງເອເລັກໂຕຼນິກທຸກປະເພດເຂົ້າຫ້ອງສອບເສັງ.
ການສອບເສັງຄັ້ງນີ້, ມີນັກສອບເສັງທັງໝົດ 10 ຄົນ ຍິງ 7 ຄົນ, ຊຶ່ງມາຈາກແຕ່ລະຫ້ອງການໃນຂົງເຂດການເມືອງຄື: ຫ້ອງວ່າການແຂວງ, ຫ້ອງການໂຄສະນາອົບຮົມແຂວງ, ຫ້ອງການ ອພບຕ ແລະ ພະແນກການຕ່າງປະເທດ.
(ຂ່າວ-ພາບ: ອຸ່ນເຮືອນ ໂພທິລັກ)