ເມື່ອບໍ່ດົນມານີ້, ກອງພັນໃຫຍ່ 502 ກອງພົນທີ 5 ໄດ້ຈັດພິທີເຜີຍແຜ່ເຊື່ອມຊຶມເອກະສານ 4 ບົດ ໃນການດໍາເນີນຊີວິດການເມືອງຮັບປະກັນໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນຂອງພັກທົ່ວກອງທັບ, ໂດຍການເປັນປະທານຂອງສະຫາຍ ພັນເອກ ທອງສະໄໝ ສຸກປະເສີດ ຮອງເລຂາຄະນະພັກ ຫົວໜ້າການທະຫານ ກອງພົນທີ 5, ມີສະຫາຍ ພັນເອກ ລືໄຊ ສຸວັນນະສີ ກໍາມະການຄະນະພັກກອງພົນ ຫົວໜ້າການເມືອງກອງພັນໃຫຍ່ 502, ມີຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກເຂົ້າຮ່ວມ.
    ເອກະສານ 4 ບົດຂອງພັກ. ປະກອບມີ, ເອກະສານຕັ້ງໜ້າຝຶກຝົນຄຸນທາດການເມືອງ ແລະ ຄຸນສົມບັດສິນທໍາປະຕິວັດ, ເອກະສານຍົກສູງຄວາມສາມາດນໍາພາ ແລະ ຄວາມເປັນແບບຢ່າງຂອງພັກ, ເອກະສານເດັດດ່ຽວແກ້ໄຂປະກົດການຫຍໍ້ທໍ້ໃນຖັນແຖວພະນັກງານ - ສະມາຊິກພັກ ແລະ ເອກະສານຄວາມເຂົ້າໃຈກ່ຽວກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ.
    ໂອກາດດັ່ງກ່າວ, ສະຫາຍ ພັນເອກ ທອງສະໄໝ ໄດ້ຮຽກຮ້ອງໃຫ້ຄະນະພັກ, ຮາກຖານພັກຢູ່ບັນດາອົງການ, ກົມກອງທົ່ວກອງພັນໃຫຍ່ 502 ເຂົ້າໃຈເຊື່ອມຊຶມກໍາແໜ້ນເນື້ອໃນຂອງເອກະສານ ແຕ່ລະບົດນໍາໄປຈັດຕັ້ງເຜີຍແຜ່ເຊື່ອມຊຶມຈັດຕັ້ງປະຕິບັດຢູ່ຮາກຖານພັກໃຫ້ຖືກຕ້ອງຕາມເນື້ອໃນ, ກົດລະບຽບ, ຫຼັກການຂອງພັກ ເພື່ອເຮັດໃຫ້ພັກມີຄວາມປອດໃສ ເຂັ້ມແຂງ ໜັກແໜ້ນ ຂຶ້ນກວ່າເກົ່າ, ເຮັດໃຫ້ການດໍາເນີນກອງປະຊຸມໃຫຍ່ 3 ຂັ້ນ ຂອງພັກ ດໍາເນີນໄປດ້ວຍດີ ແລະ ປະສົບຜົນສໍາເລັດດ້ວຍໝາກຜົນອັນຈົບງາມ.
    (ຂ່າວ: ສົມພອນໄຊ ພັນທ້າວ)