ພະແນກ ໂຍທາທິການ ແລະ ຂົນສົ່ງ (ຍທຂ) ແຂວງອຸດົມໄຊ ໄດ້ຈັດກອງປະຊຸມສະຫຼູບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ຕິດພັນກັບການມອບໃບຢັ້ງຢືນໜ່ວຍພັກປອດໃສ ເຂັ້ມແຂງໜັກແໜ້ນປະຈຳປີ 2023 ຂອງຄະນະພັກຮາກຖານ ພະແນກ ຍທຂ ແຂວງ ຂຶ້ນໃນວັນທີ 9 ເມສາຜ່ານມາ ທີ່ຫ້ອງປະຊຸມຂອງພະແນກ ໂດຍການເປັນປະທານຂອງສະຫາຍ ຄຳສຸກ ສຣິດທິລາດ ຮອງເລຂາຄະນະພັກຮາກຖານ ຮອງຫົວໜ້າພະແນກ ຍທຂ ແຂວງ, ມີຄະນະໜ່ວຍພັກ ລັດວີສາຫະກິດການບີນ, ໄຟຟ້າລາວ ພ້ອມດ້ວຍຮາກຖານພະແນກ ຍທຂ ເຂົ້າຮ່ວມ.
ກອງປະຊຸມໄດ້ສະຫຼູບການຈັດຕັ້ງປະຕິບັດວຽກງານກໍ່ສ້າງພັກ ພະນັກງານ ແລະ ປັບປຸງກົງຈັກການຈັດຕັ້ງປະຈຳປີ 2023 ແລະ ທິດທາງແຜນການ, ເປັນຕົ້ນແມ່ນການກໍ່ສ້າງພັກທາງດ້ານການເມືອງ-ແນວຄິດ, ການກໍ່ສ້າງພັກທາງດ້ານການຈັດຕັ້ງ, ການກໍ່ສ້າງພັກທາງດ້ານແບບແຜນວິທີນໍາພາ, ວຽກງານພະນັກງານ ແລະ ການປັບປຸງການຈັດຕັ້ງ ແລະ ອື່ນໆ ບັນລຸຕາມລະດັບຄາດໝາຍທີ່ກຳນົດໄວ້. ພ້ອມນີ້ ກໍເຜີຍແຜ່ຄໍາແນະນໍາຂອງຄະນະຈັດຕັ້ງສູນກາງພັກ ວ່າດ້ວຍການເລືອກເຟັ້ນ, ແຕ່ງຕັ້ງ, ສັບປ່ຽນໜ້າທີ່ຂອງພະນັກງານນຳພາຄຸ້ມຄອງ, ຮັບຟັງກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍການຕີລາຄາພະນັກງານ, ຮັບຟັງບົດໂອ້ລົມຂອງສະຫາຍຜູ້ປະຈຳການເລຂາທິການສູນກາງພັກ, ຮັບຟັງການເຜີຍແຜ່ເອກະສານເສີມຂະຫຍາຍມູນເຊື້ອແຫ່ງການນຳພາຂອງພັກເຂົ້າໃນການປະຕິບັດພາລະກິດປ່ຽນແປງໃໝ່ຢ່າງແຂງແຮງ ແລະ ເລີກເຊີ່ງ (ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວຄົບຮອບ 69 ປີ), ເຊື່ອມຊືມເອກະສານມູນເຊື້ອວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍຊີວິດ ເພື່ອປະເທດຊາດ ຄົບຮອບ 78 ປີ, ໂອກາດດຽວກັນ ຍັງໄດ້ມີພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2023.
(ຂ່າວ: ແສງອາທິດ)