ກະຊວງແຮງງານແລະສະຫວັດດີການ-ສັງຄົມ(ຮສສ)ໄດ້ຈັດພິທີມອບໃບຢັ້ັ້ງຢືນໜ່ວຍພັກປອດໃສ,ເຂັ້ມແຂງ,ໜັກແໜ້ນແລະໃບຍ້ອງຍໍກົມກອງ, ບຸກຄົນດີເດັ່ນປະຈຳປີ 2023 ຂຶ້ນໃນວັນທີ 10 ເມສານີ້ທີ່ກະຊວງດັ່ງກ່າວໂດຍການໃຫ້ກຽດເຂົ້າຮ່ວມແລະກ່າວມອບຂອງທ່ານນາງໃບຄຳ ຂັດທິຍະລັດຖະມົນຕີກະຊວງຮສສ, ມີຮອງລັດຖະມົນຕີພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
ທ່ານ ຄຳໄຊ ເຊຍຢິງຢ່າງ ຫົວໜ້າກົມຈັດຕັ້ງແລະພະນັກງານກ່າວວ່າ: ຜ່ານການນຳພາຊີ້ນຳຢ່າງໃກ້ຊິດຂອງຄະນະພັກ, ຄະນະນຳກະຊວງຮສສ ໂດຍຖືເອົາວຽກງານດັ່ງກ່າວເປັນໜ້າທີ່ໃຈກາງ ແລະ ຄວາມຮັບຜິດຊອບໜ້າທີ່ການເມືອງຂອງຕົນ ຊຶ່ງໄດ້ແຕ່ງຕັ້ງຄະນະຮັບຜິດຊອບຊີ້ນຳ ແລະ ໜ່ວຍງານວິຊາການຊ່ວຍວຽກເພື່ອລົງຊີ້ນຳ ແລະ ແນະນຳວິທີສະຫຼຸບ, ວິທີສ້າງແຜນການ,ຊຸກຍູ້, ຕິດຕາມ,ກວດກາປະເມີນການຈັດຕັ້ງປະຕິບັດແຜນກໍ່ສ້າງໜ່ວຍພັກປອດໃສ, ເຂັ້ມແຂງ,ໜັກແໜ້ນຕາມ 5 ເນື້ອໃນການຄັດເລືອກກົມ-ກອງ ແລະ ບຸກຄົນດີເດັ່ນຊຶ່ງປີ 2023 ໄດ້ຮັບຮອງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ,ໜັກແໜ້ນໄດ້ທັງໝົດ 11 ໜ່ວຍພັກ, ຮັບຮອງເອົາຂໍ້ແຂ່ງຂັນຂອງບັນດາກົມ-ກອງໄດ້12 ພາກສ່ວນ ແລະ ບຸກຄົນທັງໝົດ 468 ທ່ານ, ຜ່ານການຕິດຕາມ, ກວດກາ, ປະເມີນຜົນ ແລະ ຄັດເລືອກສາມາດຮັບຮອງໜ່ວຍພັກເປັນໜ່ວຍພັກປອດໃສ,ເຂັ້ມແຂງ,ໜັກແໜ້ນໄດ້ 7 ໜ່ວຍພັກ ແລະ ກົມ-ກອງດີເດັ່ນປະເພດ 1 ໄດ້ 7 ກົມກອງ ແລະ ບຸກຄົນດີເດັ່ນປະເພດ I ໄດ້ 438 ທ່ານ.
ໂອກາດນີ້, ທ່ານນາງໃບຄຳ ຂັດທິຍະໄດ້ໃຫ້ກຽດໂອ້ລົມເນັ້ນໜັກໃຫ້ຄະນະພັກແຕ່ລະຂັ້ນສຸມໃສ່ເຮັດວຽກງານສຶກອົບຮົມການເມືອງ-ແນວຄິດຢ່າງແຂງແຮງ ຖືເປັນຄວາມຮັບຜິດຊອບໂດຍກົງໃນການນຳພາຂອງຕົນ ເພື່ອເປັນປັດໄຈສຳຄັນຍິ່ງສອດຫ້ອຍໄປທຸກຂົງເຂດການເຄື່ອນໄຫວ ແລະ ມີຄວາມເປັນເອກະພາບຕໍ່ບັນດາແນວທາງນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆຂອງລັດ ເພື່ອນຳພາຈັດຕັ້ງປະຕິບັດໂດຍໃຫ້ຄະນະພັກແຕ່ລະຂັ້ນນຳເອົາບັນດາເອກະສານຕ່າງໆທີ່ຕິດພັນກັບໜ້າທີ່ການເມືອງຂອງຕົນມາເຊື່ອມຊຶມຕໍ່ໃຫ້ພະນັກງານ-ສະມາຊິກພັກຮັບຮູ້ເຂົ້າໃຈ,ຄະນະພັກແຕ່ລະຂັ້ນຕ້ອງໄດ້ຈັດຕັ້ງຄົ້ນຄ້ວາ, ເຊື່ອມຊຶມ, ກຳແໜ້ນເນື້ອໃນຈິດໃຈແຜນສ້າງໜ່ວຍພັກປອດໃສ,ເຂັ້ມແຂງ,ໜັກແໜ້ນ ແລະ ຂໍ້ແຂ່ງຂັນຂອງກົມ-ກອງ ຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາປະຈຳປີ 2024 ໃຫ້ເລິກເຊິ່ງ ຜັນຂະຫຍາຍໃຫ້ເປັນແຜນງານ, ແຜນການ,ຄາດໝາຍສູ້ຊົນຂອງຄະນະພັກແຕ່ລະຂັ້ນໃຫ້ລະອຽດພ້ອມທັງຊີ້ນຳ-ນຳພາຈັດຕັ້ງປະຕິບັດໃຫ້ຖືເປັນຄວາມຮັບຜິດຊອບໂດຍກົງຂອງຄະນະພັກແຕ່ລະຂັ້ນມີຜົນສຳເລັດເປັນຢ່າງດີ.
ຂ່າວ-ພາບ:ບຸນອູ້ມ