ໃນລະຫວ່າງວັນທີ 11-12 ເມສາຜ່ານມານີ້, ຄະນພັກອົງການປົກຄອງ ບ້ານເມືອງຮຳ ເມືອງບໍ່ແຕນ ແຂວງໄຊຍະບູລີໄດ້ນຳພາປະຊາຊົນບ້ານເມືອງຮຳ ສ້າງຂະບວນການອອກແຮງງານສ້ອມແປງທາງບ່ອນທີ່ເປເພ ແລະ ເທເບຕົງເສັ້ນທາງຂຶ້ນສະຖານທີ່ແຫຼ່ງທ່ອງທ່ຽວນໍ້າຕົກຕາດຮຳ ເພື່ອອຳນວຍຄວາມສະດວກໃນການສັນຈອນໄປມາຂອງປະຊາຊົນ ແລະ ກະກຽມຕ້ອນຮັບນັກທ່ອງທ່ຽວທີ່ເຂົ້າມາທ່ຽວຊົມນໍ້າຕົກຕາດຮຳໃນໄລຍະບຸນປີໃໝລາວປະຈຳປີ 2024.

ເມືອງບໍ່ແຕນ ກໍເປັນເມືອງໜຶ່ງທີ່ມີແຫຼງທ່ອງທ່ຽວຫຼາຍແຫ່ງ, ມີທັງແຫຼ່ງທ່ອງທ່ຽວທາງປະຫວັດສາດ, ແຫຼ່ງທ່ອງທ່ຽວທາງວັດທະນະທຳ ແລະ ແຫຼ່ງທ່ອງທ່ຽວທາງທຳມະຊາດ. ນ້ຳຕົກຕາດຮຳແມ່ນແຫຼ່ງທ່ອງທ່ຽວທາງທຳມະຊາດທີ່ຂຶ້ນຊື່ຂອງເມືອງບໍ່ແຕນ. ສະຖານທີ່ດັ່ງກ່າວ ແມ່ນຕັ້ງຢູ່ໃນຂອບເຂດຄວາມຮັບຜິດຊອບຂອງບ້ານເມືອງຮຳ ຊຶ່ງປະຈຸບັນໄດ້ເລີ່ມພັດທະນາແຫຼ່ງທ່ອງທ່ຽວດັງກ່າວໂດຍການສຳປະທານຂອງບໍລິສັດຈັ້ນທະວົງ ນໍ້າຕົກຕາດຮຳເປັນນ້ຳຕົກທີມີຄວາມສູງເຖີງ 30 ແມັດ. ໃນປີນີ້ ທາງບໍລິສັດຈັນທະວົງໄດ້ມອບໃຫ້ບ້ານເມືອງຮຳເປັນຜູ້ຮັບຜິດອານາໄມ ແລະ ບໍລິການຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງເມືອງທີ່ຈະມາທ່ຽວຊົມນໍ້າຕົກຕາດຮຳ.

(ຂ່າວ-ພາບ: ສາຍຄໍາ ບຸນຍາວົງ)