ວັນທີ 12 ເມສາຜ່ານມາ ທີ່ຫ້ອງຮັບແຂກ ຫ້ອງວ່າການ ແຂວງຄໍາມ່ວນ ຄະນະການນໍາກອງພົນທະຫານຮາບທີ 4 ນໍາໂດຍ ທ່ານ ພົວ ຂັນທີ ສະໜາມອຸ່ນ ຫົວໜ້າການທະຫານ ກອງພົນທະຫານຮາບທີ 4 ໄດ້ເຂົ້າອວຍພອນ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ເນື່ອງໃນໂອກາດ ສົ່ງທ້າຍປີເກົ່າ ປີເຖາະ ພສ 2566 ແລະ ຕ້ອນຮັບປີໃໝ່ ປີມະໂລງ ພໍສໍ 2567 ໂດຍທ່ານໄດ້ນໍາເອົາ ຄຳອວຍພອນໄຊອັນປະເສີດ ມາຍັງທ່ານເຈົ້າແຂວງຄໍາມ່ວນ ໃນປີໃໝ່ນີ້ ຈົ່ງມີສຸຂະພາບເຂັ້ມແຂງ, ມີພາລະນະໄມສົມບູນ ແລະ ປະສົບຜົນສຳເລັດໃນໜ້າທີ່ວຽກງານທຸກປະການ ແລະ ສືບຕໍ່ນໍາພາ ພັດທະນາ ແຂວງຄໍາມ່ວນ ໃຫ້ນັບມື້ຈະເລີນກ້າວໜ້າ, ພ້ອມດຽວກັນ ຍັງໄດ້ຕີລາຄາສູງຕໍ່ຄວາມເອົາໃຈໃສ່ຂອງການນໍາພັກ-ລັດ ແຂວງຄໍາມ່ວນ ໃນການນໍາພາ-ຊີ້ນໍາ ວຽກງານປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ແຂວງຄໍາມ່ວນ ມີຄວາມສະຫງົບໂດຍພື້ນຖານ ແລະ ມີຄວາມເປັນລະບຽບຮຽບຮ້ອຍ.

ທ່ານ ເຈົ້າແຂວງຄໍາມ່ວນ ກໍໄດ້ສະແດງຄວາມຂອບໃຈ ມາຍັງຄະນະການນໍາກອງພົນທະຫານຮາບທີ 4 ທີ່ໄດ້ສະຫຼະເວລາເຂົ້າອວຍພອນໃນຄັ້ງນີ້ ດ້ວຍຄວາມຈິງໃຈ ພ້ອມທັງໄດ້ລາຍງານສະພາບໂດຍສັງເຂບກ່ຽວກັບ ດ້ານວຽກງານ ປ້ອງກັນຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ຢູ່ພາຍໃນແຂວງ ໃຫ້ຄະນະດັ່ງກ່າວໄດ້ຮັບຊາບ.

(ຂ່າວ-ພາບ: ກອງຄໍາ)