ພິທີແຫ່ພະພຸດທະຮູບຄູ່ບ້ານຄູ່ເມືອງ ເນື່ອງໃນໂອກາດປີໃໝ່ລາວ ພ.ສ 2567 ໄດ້ຈັດຂຶ້ນໃນວັນທີ 13 ເມສານີ້ ທີ່ເຂດຄຸ້ມເມືອງເກົ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ (ນວ) ຊຶ່ງນຳໂດຍທ່ານ ພູວົງ ວົງຄໍາຊາວ ຮອງເຈົ້າຄອງ ນວ, ມີທ່ານ ດວງຕາ ສຸລິວົງ ເຈົ້າເມືອງຈັນທະບູລີ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນວ; ເຖົ້າແກ່ແນວໂຮມ ພ້ອມດ້ວຍພຸດທະບໍລິສັດ, ພຸດທະສາສະນິກະຊົນ ຕະຫຼອດຮອດມວນຊົນຊາວ ນວ, ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ.

ຂະບວນແຫ່ພະພຸດທະຮູບຄູ່ບ້ານຄູ່ເມືອງ ເປັນໜຶ່ງກິດຈະກຳສຳຄັນຫຼັກທີ່ຈັດຂຶ້ນໃນມື້ເປີດງານບຸນປີໃໝ່ລາວ ຊຶ່ງປີນີ້ພິທີໄດ້ເລີ່ມແຕ່ເວລາ 12:30 ເຕົ້າໂຮມຂະບວນແຫ່ ໂດຍມີພິທີທາງສາສະໜາເພື່ອອັນເຊີນພະພຸດທະຮູບ ຂຶ້ນສູ່ລາດສະລົດ. ຊຶ່ງພິທີແຫ່ແມ່ນເລີ່ມຈາກໜ້າວັດອິນແປງຖະໜົນເສດຖາທິລາດຫາໜ້ານໍ້າພຸ ລ້ຽວຂຶ້ນທາງແຄມ ຂອງ ແລ້ວກັບຄືນມາຫາວັດອິນແປງໂດຍມີໄລຍະທາງ 2 ກິໂລແມັດ ປະກອບມີ 9 ຂະບວນ, 18 ກ້ອນກຳລັງຈາກ ພາກສ່ວນຕ່າງໆຄື: ຂະບວນແຫ່ຂອງພະສົງສາມະເນນ, ຂະບວນລາດສະລົດພະພຸດທະຮູບ, ຂະບວນລົດນໍ້າມົນ ພ້ອມດ້ວຍພະສົງ, ຂະບວນປ້າຍຍິນດີຕ້ອນຮັບເຂົ້າສູ່ ນວ, ຂະບວນລົດມະໂຫລີ, ຂະບວນແຫ່ການນໍາ-ເຖົ້າແກ່ ແນວໂຮມຜູ້ຊົງຄຸນວຸດທິ, ຂະບວນລົດແຄນລາວ ແລະ ໝໍລຳ-ໝໍແຄນ, ຂະບວນສິລະປະ-ວັດທະນະທຳ, ຂະ ບວນມະໂຫລີ 1, ຂະບວນມະໂຫລີ 2. ສຳລັບກ້ອນກຳລັງຕ່າງໆແມ່ນຂົງເຂດການເມືອງ, ການປົກຄອງ, ອົງການຈັດຕັ້ງມະຫາຊົນ, ບັນດາເມືອງ 9 ຕົວເມືອງໃນ ນວ, ຂົງເຂດວັດທະນະທໍາ-ສັງຄົມ, ຂົງເຂດ ປກສ-ປກຊ, ບັນດາສະຖານທີ່ທ່ອງທ່ຽວ ແລະ ຂົງເຂດເສດຖະກິດທີ່ຢູ່ໃນ ນວ. ພ້ອມນັ້ນ, ຍັງມີຂະບວນມວນຊົນທົ່ວໄປ ລວມທັງລົດສີດນໍ້າຫົດສົງຕາມສອງຟາກເສັ້ນທາງ ເຮັດໃຫ້ຂະບວນແຫ່ໃນຄັ້ງນີ້ມີບັນຍາກາດຟົດຟື້ນມ່ວນຊື່ນ.

ໃນໂອກາດດຽວກັນ, ໄດ້ມີພິທີເປີດບຸນປີໃໝ່ລາວ ພ.ສ 2567 ຢ່າງເປັນທາງການ ຕິດພັນກັບປີທ່ອງທ່ຽວ ລາວ 2024 ໂດຍໃຫ້ກຽດເຂົ້າຮ່ວມລັ່ນຄ້ອງ 9 ບາດເປີດງານປີໃໝ່ລາວປະຈຳປີ 2024 ເພື່ອຄວາມເປັນສິລິມຸງຄຸນໂດຍທ່ານ ອາດສະພັງທອງ ສີພັນດອນ ເຈົ້າຄອງ ນວ, ມີການນໍາພັກ-ລັດ, ມວນຊົນທັງພາຍໃນ ແລະ ຕ່າງປະເທດເຂົ້າຮ່ວມ.

ຂ່າວ-ພາບ: ວັນເພັງ