ໃນວັນທີ 13 ເມສາຜ່ານມາ (ມື້ສັງຂານລ່ວງ ບຸນປີໃໝ່ລາວ ພສ 2567) ຊາວນະຄອນປາກເຊແຂວງຈຳປາສັກ ໄດ້ຮ່ວມພິທີແຫ່ ແລະ ສົງນໍ້າພະ ເນື່ອງໃນໂອກາດສະເຫຼີມສະຫຼອງບຸນປີໃໝ່ລາວ ພສ 2567 ຢ່າງຄຶກຄື້ນມ່ວນຊື່ນ ແລະ ຖືກຕ້ອງສອດຄ່ອງກັບຮີດຄອງປະເພນີ ທີ່ເຄີຍສືບທອດກັນມາ ໂດຍເປັນປະທານຝ່າຍສົງມີ ພະ ອາຈານມະຫາ ສຸວັນ ຈັນທະລາດ ກຳມະການບໍລິຫານງານປະຈໍາການສູນກາງ ອົງການພຸດທະສາສະໜາສໍາພັນ ແຫ່ງ ສປປ ລາວປະທານອົງການພຸດທະສາສະໜາສຳພັນລາວ ແຂວງຈຳປາສັກ, ມີ ທ່ານວິໄລວົງ ບຸດດາຄໍາ ເຈົ້າແຂວງຈຳປາສັກ ພ້ອມພັນລະຍາ, ມີການນຳຂອງແຂວງ, ນະຄອນປາກເຊ, ການນໍາ 9 ເມືອງ, ປະຊາຊົນບັນດາເຜົ່າ ຕະຫຼອດຮອດນັກທ່ອງທ່ຽວພາຍໃນ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ.

ໃນພິທີ ທ່ານ ບົວລີ ເພັດສົງຄາມເຈົ້ານະຄອນປາກເຊ ໄດ້ລາຍງານການກະກຽມສະເຫຼີມສະຫຼອງສົ່ງທ້າຍປີເກົ່າ ພສ 2566 ແລະ ຕ້ອນຮັບປີໃໝ່ ພສ 2567 ທີ່ນະຄອນປາກເຊ ແຂວງຈໍາປາສັກ ໂດຍປະຕິບັດຕາມການຕົກລົງ ແລະ ມອບໝາຍຈາກອົງການປົກຄອງແຂວງຈໍາສັກ, ມອບໃຫ້ນະຄອນປາກເຊ ກະກຽມຈັດງານສະເຫຼີມສະຫຼອງ ບຸນປີໃໝ່ລາວ ພສ 2567, ຄສ 2024 ຕິດພັນກັບກິດຈະກຳ ຕ້ອນຮັບປີທ່ອງທ່ຽວລາວ ປີ 2024 ໂດຍມີຫຼາຍກິດຈະກໍາ ຄື: ຂະບວນແຫ່ພະພຸດທະຮູບ ຈາກ 9 ວັດ, ຂະບວນນາງສັງຂານ, ຂະບວນພາຂວັນໃຫຍ່ນະຄອນປາກເຊ ແລະ ຂະບວນແຫ່ຂອງມວນຊົນຊາວເມືອງ ພາຍໃນນະຄອນປາກເຊ, ຈາກບັນດາບ້ານ - ກຸ່ມບ້ານ, ພາກສ່ວນອົງການຈັດຕັ້ງ ແລະ ພາກທຸລະກິດ ທີ່ຢູ່ໃນນະຄອນປາກເຊ ລວມຈໍານວນ 14 ຂະບວນ, ຄາດຄະເນຜູ້ເຂົ້າຮ່ວມຂະບວນແຫ່ 2 ພັນກວ່າຄົນ. ແຕ່ລະຂະບວນແຫ່ ມີການສະແດງທີ່ເປັນເອກະລັກຂອງແຕ່ລະພາກສ່ວນ ເພື່ອໂຄສະນາສົ່ງເສີມແຕ່ລະວຽກງານ ແລະ ມ່ວນຊື່ນ ຕ້ອນຮັບປີໃໝ່ ທີ່ເປັນເອກະລັກ ຖືຕົ້ນກາລະພຶກ ແລະ ນໍ້າຫົດສົງ.

ໂອກາດນີ້, ທ່ານ ເຈົ້າແຂວງຈຳປາສັກ ໄດ້ຂຶ້ນໃຕ້ທຽນໄຊບູຊາ, ລັ່ນຄ້ອງ 9 ບາດ ແລະ ນຳພາການນຳ ແລະ ມວນຊົນເຂົ້າຫົດສົງພະພຸດທະຮູບ “ພະມໍລະດົກຈໍາປາ” ພະພຸດທະຮູບສັກສິດຄູ່ບ້ານຄູ່ເມືອງ ນະຄອນປາເຊ ດ້ວຍຄວາມສັດທາ ຂອງປວງຊົນທັງຫຼາຍ.

ສໍາລັບກິດຈະກຳຖະໜົນຊຸ່ມເຢັນ ແລະ ກິດຈະກຳບັນເທີງ ຄື: ກິດຈະກໍາຖະໜົນຊຸ່ມເຢັນມີ 3 ເສັ້ນ ຄື: ເສັ້ນທາງແຄມເຊໂດນ ແຕ່ວົງວຽນທ່າສາລາຄໍາ ເຖິງ ສາມແຍກວິທະຍາໄລສົງ (ເສັ້ນທາງເຂົ້າສູ່ຫໍຫລັກເມືອງປາກເຊ ແລະ ວັດຫລວງປາກເຊ); ເສັ້ນທາງເຊື່ອມ ແຕ່ 4 ແຍກໄຟແດງໂພນໄຊ ລົງຫາ 4 ແຍກໄຟແດງຮ່ອງຂະຍອມ - ສາງນໍ້າມັນ ແລະ ເສັ້ນທາງເຊື່ອມ ແຕ່ 4 ແຍກ ຮ້ານສິລິສົມບູນ (ຮ້ານແຄນນອນ) ຮອດ 4 ແຍກທາງ 42, ລ້ຽວໃສ ່4 ແຍກໄຟແດງບ້ານຮ່ອງຂະຍອມ ເຊື່ອມຈອດກັບ ເສັ້ນທີ 2 ຮ່ອງຂະຍອມ. ສ່ວນກິດຈະກຳບັນເທິງ, ສວນອາຫານ, ຄອນເສີດ ແລະ ອື່ນໆ ເພື່ອຄວາມສະໜຸກສະໜານ ໄດ້ອະນຸຍາດ 3 ຈຸດ ຄື: ບຸດເບຍຂອງບໍລິສັດເບຍລາວ ຈັດທີ່ສະໜາມກິລາແຂວງ ກິລາຫຼັກ 2; ຕະຫຼາດສູນການຄ້າ Friendship Mall (ຫຼັກ 2) ແລະ ຢູ່ຕະຫຼາດຮ້ານໄລເຮົາ (ທ່າສາລາຄໍາ).

(ຂ່າວ-ພາບ: ຈັນທະວີສັກ)