ຂ່າວສານຊີອາໄອລາຍງານ ໃນວັນທີ 12 ເມສາ ຜ່ານມາ, ຜູ້ຮັບຜິດຊອບກົມການຄ້າກັບຕ່າງປະເທດຂອງກະຊວງການຄ້າຈີນກ່າວວ່າ: ປີ 2023, ຈີນກວມອັດຕາສ່ວນ 14,2% ໃນຕະຫຼາດການສົ່ງອອກຂອງສາກົນ ໄດ້ເປັນອັນດັບໜຶ່ງໃນດ້ານການຄ້າສິນຄ້າເປັນເວລາ 7 ປີລຽນຕິດ. ພາຍໃຕ້ເບື້ອງຫຼັງທີ່ເສດຖະກິດໂລກຟື້ນຟູຢ່າງລຳບາກ,ຈີນໄດ້ຮັກສາກວມອັດຕາສ່ວນໃນຕະຫຼາດສາກົນຢ່າງໝັ້ນທ່ຽງໂດຍລວມ ຊຶ່ງສະແດງໃຫ້ເຫັນເຖິງຄວາມເຂັ້ມແຂງໃນດ້ານການພັດທະນາ.

ຜູ້ຮັບຜິດຊອບກ່າວຕື່ມວ່າ: ການຄ້າຂອງຈີນໃນປີ 2024 ເປັນຕາຄອງຄອຍ. ອົງການການຄ້າໂລກ ຫຼື WTO ຄາດວ່າ: ຈັງຫວະການເຕີບໂຕຂອງການຄ້າທົ່ວໂລກໃນປີ 2024 ແມ່ນ 2,6%, ເພີ່ມຂຶ້ນ 3,8% ເມື່ອທຽບກັບປີ 2023,ໃນໄຕມາດທີ 1 ຂອງປີ 2024, ໃນຂົງເຂດການຄ້າໄດ້ເກີດມີທ່ວງທ່າການຟື້ນຟູຂຶ້ນ. ພ້ອມກັນນັ້ນ, ອົງການ WTO ກໍໄດ້ແຈ້ງອີກວ່າ: ລັກສະນະບໍ່ແນ່ນອນຕ່າງໆ ເຊັ່ນ: ການປະທະກັນໃນພາກພື້ນ ແລະ ລັດທິປົກປັກການຄ້າເປັນຕົ້ນຍັງເພີ່ມຂຶ້ນຢ່າງເດັ່ນຊັດ, ການຄ້າທົ່ວໂລກຍັງອາດຈະຫຼຸດລົງໄດ້. ເພື່ອຮັບມືກັບສະພາບແວດລ້ອມພາຍນອກທີ່ຂ້ຽວຂາດ ແລະສັບສົນ, ກະຊວງການຄ້າຈີນກຳລັງຮ່ວມກັບທ້ອງຖິ່ນຕ່າງໆ ແລະ ພາກສ່ວນຕ່າງໆຄົ້ນຄວ້າຈັດນະໂຍບາຍ ແລະ ມາດຕະການທີ່ຕິດແທດຕົວຈິງຈຳນວນໜຶ່ງໂດຍອີງຕາມການຕັດສິນຂອງສູນກາງພັກກອມມູນິດຈີນ ແລະ ລັດຖະບານຈີນ.