ການສະເຫຼີມສະຫຼອງບຸນປີໃໝ່ລາວ ພ.ສ 2567 ຕິດພັນກັບປີທ່ອງທ່ຽວລາວ 2024 ຢູ່ນະຄອນຫຼວງວຽງຈັນ (ນວ) ມີບັນຍາກາດຟົດຟື້ນມ່ວນຊື່ນຫຼາກຫຼາຍກິດຈະກຳ ຕາມຮີດຄອງປະເພນີອັນດີງາມຂອງຊາດລາວ.

ໂດຍສະເພາະຢູ່ເຂດຄຸ້ມເມືອງເກົ່າວັດຈັນ ເມືອງຈັນທະບູລີ ນວໄດ້ຈັດຫຼາກຫຼາຍກິດຈະກຳ ເພື່ອສະຫຼອງປີໃໝ່ລາວໃຫ້ມີບັນຍາກາດຄຶກຄື້ນ ເປັນຕົ້ນກິດຈະກຳທາງສາສະໜາຊຶ່ງໄດ້ອັນເຊີນພະພຸດທະຮູບຄູ່ບ້ານຄູ່ເມືອງລົງຫົດສົງ ພ້ອມແຫ່ໄປຕາມເສັ້ນທາງໃຫ້ມວນຊົນໄດ້ຫົດສົງ ເພື່ອຄວາມເປັນສິສິມຸງຄຸນໃຫ້ກັບຕົນເອງ ແລະ ຄອບຄົວ. ພ້ອມນີ້, ມວນຊົນຊາວນວ ກໍຄືນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ຫົດສົງພະພຸດທະຮູບຢູ່ຕາມວັດວາອາຮາມຕ່າງໆ, ມີການຫົດສົງນ້ຳອວຍພອນຊຶ່ງກັນ ແລະ ກັນ ຕາມຮີດຄອງປະເພນີຢູ່ຕາມສອງຟາກເສັ້ນທາງຢ່າງຄຶກຄື້ນມ່ວນຊື່ນ.

ແມ່ຕູ້ ອ່ອນສາ ບໍລິຫານ ປະຊາຊົນບ້ານຫາຍໂສກ ເມືອງຈັນທະບູລີ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນເມື່ອບໍ່ດົນມານີ້ ທີ່ວັດອິນແປງວ່າ: ໃນແຕ່ລະປີຮອດບຸນປີໃໝ່ລາວແມ່ນໄດ້ພາຄອບຄົວ, ລູກຫຼານມາຫົດສົງພະພຸດທະຮູບ, ມາມັດຂໍ້ຕໍ່ແຂນ ເພື່ອຂໍພອນຈາກຄູບາ-ອາຈານ ພ້ອມນີ້, ຍັງເປັນການໃຫ້ລູກຫຼານໄດ້ຮຽນຮູ້ຂະນົບທຳນຽມ-ຮີດຄອງປະເພນີບຸນປີໃໝ່ລາວ ແລະ ການເຂົ້າວັດທຳບຸນ, ຫົດສົງພະພຸດທະຮູບໃນວັນປີໃໝ່ລາວ ເພື່ອເປັນສິລິມຸງຄຸນໃຫ້ແກ່ຕົນເອງ ແລະ ຄອບຄົວໃຫ້ຢູ່ດີມີແຮງ ມີໂຊກ, ມີໄຊ ຕະຫຼອດໄປນັ້ນເອງ. ພ້ອມນີ້, ແມ່ຕູ້ ອ່ອນສາ ບໍລິຫານ ຍັງໄດ້ຝາກເຖິງມວນຊົນ ຕະຫຼອດຮອດລູກ-ຫຼານທີ່ເຂົ້າໄປຫົດສົງພະພຸດທະຮູບພາຍໃນວັດໃຫ້ນຸ່ງຖືເປັນລະບຽບຮຽບຮ້ອຍນຸ່ງຖືສຸພາບ, ຜູ້ຍິງນຸ່ງສິ້ນ, ເສື້ອສຸພາບບໍ່ສັ້ນເຂີນເກີນໄປ. ພ້ອມນັ້ນ, ການຫົດສົງກໍຕ້ອງແມ່ນນໍ້າທີ່ສະອາດ ຫຼື ນໍ້າອົບນໍ້າຫອມ ຕາມປະເພນີທີ່ເຄີຍປະຕິບັດສຶບທອດກັນມາ.

ເຖິງແນວໃດກໍຕາມຢູ່ ນວ ຍັງໄດ້ຈັດສັນເຂດສະຫຼອງປີໃໝ່ຢູ່ຕາມເສັ້ນທາງບໍລິເວນສະໜາມກິລາເຈົ້າອານຸວົງ, ບໍລິເວນສວນນ້ຳພຸ ແລະ ບໍລິເວນເຂດແຄມຂອງ ຊຶ່ງເຂດດັ່ງກ່າວນີ້ ໄດ້ຈັດເປັນກິດຈະກຳເຕັມຮູບແບບ ເພື່ອໃຫ້ມວນຊົນ ກໍຄື ນັກທ່ອງທ່ຽວທັງພາຍໃນ ແລະ ຕ່າງປະເທດຮ່ວມສະເຫຼີມສະຫຼອງດ້ວຍຄວາມມ່ວນຊື່ນ ແລະ ມີການຂາຍສິນຄ້າອຸປະໂພກ-ບໍລິໂພກ, ສິນຄ້າຫັດຖະກຳ, ຜະລິດຕະພັນຂອງໄວໜຸ່ມ ຢູ່ເຂດດ້ານຫຼັງວັດອິນແປງ-ຮ່ອມວັດອົງຕື້ ແນໃສ່ສົ່ງເສີມກິດຈະກຳການທ່ອງທ່ຽວໃຫ້ມີຄວາມຫຼາກຫຼາຍ, ມີສີສັນໂດດເດັ່ນເພື່ອດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດໃຫ້ ເຂົ້າມາທ່ອງທ່ຽວ ສປປ ລາວ ກໍຄື ນວ ໃຫ້ຫຼາຍຂຶ້ນທັງມີບັນຍາກາດຄຶກຄື້ນ-ເບີກບານຈິດໃຈຕາມຄໍາຂວັນ: ທ່ອງທ່ຽວລາວ ປອດໄພ, ຊື່ນໃຈໃນວັດທະນະທໍາ, ທໍາມະຊາດ ແລະ ປະຫວັດສາດ.

ຂ່າວ-ພາບ: ວັນເພັງ