ພິທີເຊັນບົດບັນທຶກການຮ່ວມມືດ້ານການສຶກສາ ລະຫວ່າງ ວິທະຍາໄລລາຊາ ແຂວງອຸດົມໄຊ  ສປປ ລາວ ແລະ ວິທະຍາໄລເຕັກນິກວິຊາຊີບ ຢົງໂຈ ສປ ຈີນ ໄດ້ຈັດຂຶ້ນ ຫວ່າງບໍ່ດົນມານີ້ ທີ່ຫ້ອງປະຊຸມຂອງວິທະຍາໄລລາຊາ.
  ບົດບັນທຶກການຮ່ວມມືສອງຝ່າຍ ໄດ້ກຳນົດເນື້ອໃນແຕ່ລະດ້ານຢ່າງລະອຽດ ຊຶ່ງມີສັນຍາການຮ່ວມມືສາກົນດ້ານການສຶກສາອາຊີວະສຶກສາ ວິທະຍາໄລອາຊີວະສຶກສາ ແລະ ເຕັກນິກ ສປ ຈີນ ເພື່ອຮັດແໜ້ນສາຍພົວພັນທີ່ເປັນມູນເຊື້ອ ລະຫວ່າງ ຈີນ-ລາວ, ເພີ່ມທະວີການຮ່ວມມືດ້ານການສຶກສາ ລະຫວ່າງ ສອງປະເທດ, ຊຸກຍູ້ການແລກປ່ຽນດ້ານວັດທະນະທຳ, ທັງສອງຝ່າຍຈະປະຕິບັດຕາມເນື້ອໃນດັ່ງນີ້: ຮ່ວມກັນປະຕິບັດການຮ່ວມມືດ້ານການສຶກສາລະຫວ່າງປະເທດ, ການສຶກສາຂ້າມຊາດ, ການຄົ້ນຄວ້າວິທະຍາສາດ, ການແລກປ່ຽນບົດຮຽນ ຄູ-ນັກຮຽນ, ໄປຮຽນຕໍ່ຕ່າງປະເທດ, ຝຶກອົບຮົມ, ຝຶກງານ ແລະ ຫາວຽກເຮັດງານທຳ. ການຮ່ວມມືດ້ານການສຶກສາພາສາຈີນ ແລະ ພາສາລາວ: ຝ່າຍ ສປ ຈີນ ຈະສົ່ງຄູສອນພາສາຈີນໃຫ້ວິທະຍາໄລລາຊາ ເພື່ອຈັດຝຶກອົບຮົມພາສາຈີນໃຫ້ແກ່ນັກຮຽນ, ການຮ່ວມມືດ້ານການຮຽນ-ການສອນແບບມືອາຊີບ ອອກແບບຫຼັກສູດ ຮ່ວມກັນພັດທະນາມາດຕະຖານວິຊາຊີບ, ຫຼັກສູດ, ສື່ການຮຽນການສອນ ແລະ ການສອນອອນລາຍທີ່ເໝາະສົມກັບປະເທດລາວ, ຝຶກອົບຮົມຄູສອນວິຊາຊີບທ້ອງຖິ່ນໃນລາວ ກັບໂຄງການຮ່ວມມືດ້ານການສຶກສາອາຊີວະສຶກສາ ໂດຍປະຕິບັດການສອນແບບອອນລາຍ ແລະ ການສອນໃນຫ້ອງຮຽນ. ການຮ່ວມມືດ້ານການຮຽນ-ການສອນ ຈະຕ້ອງມີສະຖານທີ່ຮຽນ, ຫ້ອງຮຽນ ແລະ ຫ້ອງການໃນໂຮງຮຽນທັງສອງແຫ່ງ ເພື່ອການຮ່ວມມືສາກົນລະຫວ່າງສອງຝ່າຍ, ພ້ອມທັງມອບສິດຊຶ່ງກັນ ແລະ ຮ່ວມກັນສ້າງຄວາມສາມາດດ້ານວິຊາຊີບລະດັບສາກົນ ຕັ້ງໜ້າສ້າງເງື່ອນໄຂ ຊຸກຍູ້ໃຫ້ນັກສຶກສາຈາກວິທະຍາໄລລາຊາໄປຮຽນຢູ່ຈີນ ໄດ້ຮັບການຝຶກອົບຮົມທັກສະຕົວຈິງຢູ່ໂຮງຮຽນຂອງຝ່າຍ ຈີນ ຫຼື ບັນດາວິສາຫະກິດທີ່ຮ່ວມມື, ເພື່ອຍົກສູງທັກສະວິສາຫະກິດທີ່ທັນສະໄໝ ແລະ ພອນສະຫວັນດ້ານການອື່ນໆ.
ຈາກນັ້ນ, ທັງສອງຝ່າຍກໍໄດ້ລົງນາມເຊັນບົດບັນທຶກຮ່ວມມື ພ້ອມທັງຕັດແຖບຜ້າເປີດປ້າຍສູນຝຶກອົບຮົມ ພາສາຈີນ ແລະ ພັດທະນາສີມືແຮງງານວິຊາຊີບຂອງວິທະຍາໄລເຕັກນິກອາຊີບຢົງໂຈ ສປ ຈີນ ທີ່ ວີທະຍາໄລລາຊາ ທີ່ແຂວງອຸດົມໄຊ ສປປ ລາວ. ຕາງໜ້າຝ່າຍຈີນ ໂດຍ ທ່ານ ອາຈານ ຫວງອີ່ຈູນ ຄະນະກຳມະການພັກວິທະຍາໄລ ເຕັກນິກ ຢົງໂຈ ສປ ຈີນ ແລະ ຕາງໜ້າຝ່າຍລາວ ໂດຍ ທ່ານ ນາງ  ກອງສີ ມະນີພອນ ອຳນວຍການວິທະຍາໄລລາຊາ ແຂວງອຸດົມໄຊ  ສປປ ລາວ ໂດຍຊ້ອງໜ້າ ທ່ານ ຄຳສະຫວ່າງ ຈັນທອງພິລຸນ ຮອງຫົວໜ້າພະແນກສຶກສາທິການ ແລະ ກິລາ ແຂວງອຸດົມໄຊ ແລະ ພາກສ່ວນກ່ຽວຂ້ອງເຂົ້າຮ່ວມ.
ຂ່າວ-ພາບ: ແສງອາທິດ