ນະຄອນຫຼວງວຽງຈັນ ໄດ້ຈັດພິທີອັງເຊີນພຣະພຸດທະຮູບ ພຣະພຸດທະສຸວັນນະສາທານ ທຳມິກະຣາຊ (ພຣະອົງຄໍາ) ລົງມາຫົດສົງ ໃນໂອກາດປີໃໝ່ລາວ ພ.ສ 2567 ໃນຕອນແລງວັນທີ 13 ເມສານີ້ ທີ່ກົມມະລຽນພະທາດຫຼວງວຽງຈັນ, ໂດຍເປັນກຽດເຂົ້າຮ່ວມມີ ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ມີບັນດາທ່ານການນໍາພັກ-ລັດ, ພ້ອມດ້ວຍຄະນະສົງ ແລະ ພໍ່, ແມ່, ປະຊາຊົນເຂົ້າຮ່ວມຢ່າງຫຼວງຫຼາຍ.

ພິທີດັ່ງກ່າວ ໄດ້ນິມົນພະສົງ 45 ອົງເພື່ອເຮັດພິທີກຳທາງສາສະໜາ. ການຈັດພິທີດັ່ງກ່າວນີ້, ກໍເພື່ອສືບສານວັດທະນະທໍາ ແລະ ປະເພນີອັນດີງາມຂອງຊາວລາວເວົ້າລວມ, ເວົ້າສະເພາະ ຂອງຊາວນະຄອນຫຼວງວຽງຈັນ ຊຶ່ງໃນໂອກາດປີໃໝ່ລາວຂອງທຸກໆປີ ກໍຈະມີພິທີອັງເຊີນພຣະພຸດທະຮູບ ພຣະເຈົ້າອົງຄໍາ ລົງມາຮັບການຫົດສົງເພື່ອເປັນສິລິມຸງຄຸງແກ່ປະເທດຊາດບ້ານເມືອງ.

ໃນພິທີ, ນອກຈາກ ອັງເຊີນຫົດສົງ ພຣະພຸດທະຮູບ ພຣະເຈົ້າອົງຄໍາ ແລ້ວ, ການນໍາພັກ-ລັດ ແລະ ບັນດາປະຊາຊົນທີ່ເຂົ້າຮ່ວມ ກໍໄດ້ຫົດສົງຄະນະພະສົງ ຮັບຄໍາອວຍພອນໃຫ້ໂຊກດີປີໃໝ່, ຢູ່ເຢັນເປັນສຸກ ຕະຫຼອດປີ ພສ 2567 ອີກດ້ວຍ.

(ຂ່າວ-ພາບ: ສຸກສະຫວັນ)