ໃນວັນທີ 11 ເມສາຜ່ານມານີ້,ຫ້ອງວ່າການແຂວງວຽງຈັນ ໄດ້ຈັດພິທີບາສີສູ່ຂວັນ ປີໃໝ່ລາວ ພສ 2567ຊຶ່ງນຳພາໂດຍ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນພ້ອມດ້ວຍການນຳຂັ້ນແຂວງ,ການນຳຂັ້ນເມືອງ,ພະນັກງານອາວຸໂສ-ບຳນານ ແລະ ພະນັກງານພາຍໃນແຂວງເຂົ້າຮ່ວມ.ໃນພິທີຍັງໄດ້ມີການຕັກບາດ,ຢາດນ້ຳພະສົງ 10ອົງ,ເພື່ອຄວາມເປັນສິລິມຸງຄຸນໃຫ້ແກ່ຫ້ອງວ່າການແຂວງວຽງຈັນຕື່ມອີກ.
   ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ ຕາງໜ້າໃຫ້ແກ່ຄະນະພັກ, ອົງການປົກຄອງແຂວງວຽງຈັນ ຂໍສະແດງຄວາມຍ້ອງຍໍສັນລະເສີນ ແລະ ຄວາມຂອບອົກ ຂອບໃຈ ມາຍັງສະມາຊິກພັກ, ພະນັກງານ, ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າ, ທຸກຊັ້ນຄົນໃນທົ່ວແຂວງວຽງຈັນ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາຂອງແຂວງວຽງຈັນ ດ້ວຍຄວາມເປັນເຈົ້າການ ຫ້າວຫັນຕະຫຼອດ 1 ປີ ຜ່ານມາ.
ໃນຕອນທ້າຍຍັງໄດ້ມີການບາສີສູ່ຂັວນໃຫ້ແກ່ການນຳແຂວງວຽງຈັນ ແລະ ພະນັກງານອາວຸໂສ-ບຳນານ,ເພື່ອຄວາມເປັນສິລິມຸງຄຸນ ແລະ ເພື່ອເປັນການຮັບໂຊກຮັບໄຊຕ້ອນຮັບປີໃໝ່ ພສ 2567 ອີກດ້ວຍ.
(ຂ່າວ: ແຂວງວຽງຈັນ)